លោកជំទាវឧកញ៉ា នឹម វណ្ណៈ ប្រធានក្រុមប្រឹក្សាភិបាល ក្រុមហ៊ុន អេស៊ីអ៊ី គ្រុប ឯ.ក (ACE Group Co.,LTD) បានសម្រេចក្តីស្រមៃរបស់ខ្លួន កម្ម៉ង់ទិញបានរថយន្តទំនើបម៉ាក Tesla Cybertruck សេរីឆ្នាំ២០២៤ ដែលជាប្រភេទរថយន្តអគ្គីសនីសុទ្ធ។
ជំទាវឧកញ៉ា នឹម វណ្ណៈ បានបង្ហោះរូបភាពបើកសាកល្បងរថយន្តអគ្គីសនីសេរីថ្មីនេះ ជាមួយនឹងស្វាមី ភ្ជាប់ជាមួយនឹងសារ នៅលើបណ្តាញសង្គមហ្វេសប៊ុក នៅព្រឹកថ្ងៃទី១៧ ខែកក្កដានេះថា៖ “កម្ម៉ង់បានសម្រេច! ធ្វើឱ្យសុបិនរបស់យើងក្លាយមកជាការពិត (Made our dream came true)”។
រថយន្តទំនើបម៉ាក Tesla Cybertruck សេរីឆ្នាំ២០២៤ ជាប្រភេទរថយន្តអគ្គីសនីសុទ្ធ ដែលសាកមួយពេញជិះបានប្រមាណជាង ៥៤០គីឡូម៉ែត្រ មានតម្លៃ 600HP និងមានប៉ុងពីរ។ បើតាមក្រុមហ៊ុន AUTO US DIRECT CO., LTD បានឱ្យដឹងថា តម្លៃ Tesla Cybertruck សេរីឆ្នាំ២០២៤ មកដល់ទឹកដីប្រទេសកម្ពុជា បូករួមទាំងការបង់ពន្ធ និងសេវាកម្មផ្សេងៗរួចរាល់ គឺមានតម្លៃសរុបជាង ២៧ម៉ឺនដុល្លារអាមេរិក។
លោកជំទាវឧកញ៉ា នឹម វណ្ណៈ ជាអ្នកជំនួញវ័យក្មេងលេចធ្លោរមួយរូប លើពហុវិស័យ ដែលបានកាន់កាប់មុខជំនួញជាច្រើនមានដូចជា៖ (១)ក្លឹបកម្សាន្ត និងភោជនីយដ្ឋាន អេ ស៊ី អ៊ី (ACE Lounge and Restaurant), (២)ភោជនីយដ្ឋានអូសក្រឡា OS KROLA – អូសក្រឡា (ឆ្នេរអូរត្រេះទី១ ក្រុងព្រះសីហនុ), (៣)ឆ្នោតនាគ, (៤)ក្រុមហ៊ុនមេធាវី អេជ អេន អេស (HNS Law Group), (៥)សារាយធម្មជាតិ NNP (NNP Cambodia Shop), (៦)ស្ករសម្រក និង Detox L2ME និង(៧)ប្រេងខ្យល់ ប្រេងកូឡា ផ្កាឈូក ផលិតនៅហុងកុង ប្រទេសចិន ដែលនាំចូលផ្តាច់មុខដោយក្រុមហ៊ុន ACE GROUP៕
