អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ កាលពីរសៀលថ្ងៃទី២០ ខែកក្កដា ឆ្នាំ២០២៤ បានដឹកនាំគណៈប្រតិបត្តិ និងសមាជិកនៃសមាគម ចូលរួមកិច្ចប្រជុំជាមួយក្រុមប្រឹក្សាភិបាល ដើម្បីពិភាក្សាលើការរៀបចំកិច្ចការផ្ទៃក្នុងមួយចំនួនដែលនៅសេសសល់ និងរៀបចំនូវសេចក្ដីព្រាងផែនការសកម្មភាពរបស់សមាគមរយៈពេល ៦ខែចុងឆ្នាំ២០២៤។
តាមសមាគមសិល្បករខ្មែរ បានឱ្យដឹងថា កិច្ចប្រជុំរៀបចំផែនការសកម្មភាពនេះ គឺដើម្បីចូលរួមចំណែកជួយដល់កិច្ចការផ្សព្វផ្សាយវប្បធម៌ និងផ្សព្វផ្សាយពីទេសចរណ៍នៅកម្ពុជា ឆ្លើយតបតាមអនុសាសសន៍ណែនាំដ៏ខ្ពង់ខ្ពស់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
ក្នុងឱកាសនោះដែរ អ្នកឧកញ៉ាប្រធានសមាគមសិល្បករខ្មែរ បានបង្ហាញនូវមោទនភាព ចំពោះថ្នាក់ដឹកនាំ និងក្រុមការងារសមាគមទាំអស់ ដែលលះបង់កម្លាំកាយចិត្ត ពេលវេលា ចូលរួមដឹកនាំ និងអនុវត្តតតួនាទីភារកិច្ចផ្សេងៗរបស់សមាគមរហូតមកប្រកបដោយស្មារតីទទួលខុសត្រូវខ្ពស់បំផុត ដើម្បីបុព្វហេតុវិស័យសិល្បៈវប្បធម៌ ក៏ដូចជាសកម្មភាពសប្បរសធម៌នានា។
តាមរយៈផែនការសកម្មភាពដែលកំពុងពិភាក្សានាពេលនេះ នឹងក្លាយជាផែនទីចង្អុលផ្លូវ សម្រាប់សមាគមសិល្បករខ្មែរប្រតិបត្តិតាមប្រកបដោយប្រសិទ្ធភាព និងសក្ដិសិទ្ធិភាពលើការចូលរួមជួយដល់សង្គមជាតិតាមរយៈវិស័យវប្បធម៌ និងទេសចរណ៍ ដែលត្រូវបានចាត់ទុកថា ជាឧស្សាហកម្មគ្មានផ្សែង និងជាការនាំចេញនៅនឹងកន្លែងនោះ។
អ្នកឧកញ៉ាប្រធានសមាគម បានប្រកាសជំហរចូលរួមជាមួយនឹងក្រុមប្រឹក្សាភិបាល ដើម្បីធ្វើយ៉ាងណាឱ្យផែនការសកម្មភាពនេះត្រូវបានអនុវត្តជាសកម្មភាពពិតប្រាកដក្នុងពេលឆាប់ៗ ស្របតាមអនុសាសន៍ណែនាំរបស់ថ្នាក់ដឹកនាំរាជរដ្ឋាភិបាលផង និងបង្ហាញពីការប្ដេជ្ញាចិត្តរបស់សមាគមចូលរួមក្នុងកិច្ចការជួយសង្គមជាតិផងដែរ។
គួរបញ្ជាក់ថា អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ បានដាក់ចេញផែនការសកម្មភាពអាទិភាពចំនួន ៥ចំណុច សម្រាប់អាណត្តិទី៦នេះ។ ក្នុងចំណោមផែនការសកម្មភាពទាំង៥ គឺមានផែនការសកម្មភាពមួយលើកឡើងអំពីការជំរុញសកម្មភាពឧស្សាហកម្មវប្បធម៌សិល្បៈ តាមរយៈការបង្កើតស្នាដៃផលិតកម្មសិល្បៈគ្រប់ទម្រង់ ក្នុងគោលបំណងផ្តល់ឱកាសការងារជូនដល់សិល្បករ អ្នកនិពន្ធ និងអ្នកពាក់ព័ន្ធ រួមចំណែកជាមួយរាជរដ្ឋាភិបាល និងក្រសួងពាក់ព័ន្ធក្នុងឆន្ទៈរួមជាកម្លាំង ដើម្បីពង្រីកនូវការផ្សព្វផ្សាយអំពីវប្បធម៌ និងទេសចរណ៍៕
