ជំទាវឧកញ៉ា ម៉ៅ បញ្ចពណ៌ សមាជិកសមាគមឧកញ៉ាកម្ពុជា ប្រកាសផ្ដល់អាហារូបករណ៍រហូតដល់ ៥០% សម្រាប់សិស្សចាប់ពីថ្នាក់ទី៧ ដល់ថ្នាក់ទី១២

លោកជំទាវឧកញ៉ា ម៉ៅ បញ្ចពណ៌ ស្ថាបនិកសាលាអន្ដរជាតិ ធី អាយ អេ (TIA International School) និងជា​សមាជិកទ្រទ្រង់ នៃសមាគមឧកញ៉ាកម្ពុជា បានប្រកាសអំពីការផ្ដល់អាហារូបករណ៍រហូតដល់៥០% ដែលមិន​ធ្លាប់​មានពីមុនមក សម្រាប់សិស្សានុសិស្សចាប់ពីថ្នាក់ទី៧ ដល់ថ្នាក់ទី១២។

ដើម្បីទទួលបាននូវអាហារូបករណ៍នេះ សិស្សានុសិស្សទាំងអស់អាចទៅចុះឈ្មោះដាក់ពាក្យប្រឡង ចាប់ពីថ្ងៃ​ផ្សាយ​ដំណឹងនេះតទៅនៅសាលាអន្ដរជាតិ ធី អាយ អេ ដែលស្ថិតនៅលើមហាវិថី សម្ដេចតេជោ ហ៊ុន សែន ហៅ ផ្លូវ ៦០ម៉ែត្រ រាជធានីភ្នំពេញ។

លោកជំទាវឧកញ៉ា ម៉ៅ បញ្ចពណ៌ បានថ្លែងថា កម្មវិធីនេះត្រូវបានបង្កើតឡើងក្នុងគោលបំណងផ្តល់ដល់​សិស្សានុសិស្ស​នូវឱកាសទទួលបានការសិក្សាដ៏ល្អតាមស្តង់ដារអន្តរជាតិ ដើម្បីពង្រឹងសមត្ថភាពក្នុងការក្លាយ​ខ្លួនជា​ធនធានមនុស្សដ៏សំខាន់សម្រាប់សង្គមជាតិនាពេលអនាគត។

សូមជម្រាបថា សាលាអន្ដរជាតិ ធី អាយ អេ បានបង្កើតឡើងនៅឆ្នាំ២០១៥ ស្ថិតនៅតំបន់បឹងកេងកង បន្ទាប់ពីមានការគាំទ្រខ្ពស់ពីអាណាព្យាបាលរបស់សិស្សានុសិស្ស សាលាលំដាប់អន្ដរជាតិនេះ បានសម្រេចបើក​សាខាថ្មី លើផ្លូវ៦០ម៉ែត្រ ដែលមានទីតាំងធំទូលាយ និងផាសុកភាពខ្ពស់ជាមួយនឹង​បរិយាកាសបរិសុទ្ធនៅជុំវិញ​សាលាដែលល្អបំផុតសម្រាប់សិស្សានុសិស្ស ជាពិសេសសិស្សនៅកម្រិតមត្តេយ្យសិក្សា៕