នាព្រឹកថ្ងៃអង្គារ ទី៧ ខែសីហា ឆ្នាំ២០២៤ អ្នកឧកញ៉ា ភួ វាសនា អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មខេត្តបាត់ដំបង បានបើកកិច្ចប្រជុំពិភាក្សាជាមួយក្រុមការងារវិស័យឯកជន ស្ដីពី “បញ្ហាប្រឈមដែលម្ចាស់អាជីវកម្មបានជួបប្រទះ និងបានលើកឡើង កាលពីថ្ងៃទី២៥ ខែកក្កដា ឆ្នាំ២០២៤“ កន្លងមក។
កិច្ចប្រជុំនេះ មានការចូលរួមពីលោកអនុប្រធាន សមាជិក សមាជិកា ប្រធានសម្ព័ន្ធសមាគមដំឡូងមីខេត្ត ប្រធានសមាគមសណ្ឋាគារខេត្ត ប្រធានសមាគមស្ត្រីកម្ពុជាសាខាខេត្ត ប្រធាន LOSCBA-BTB តំណាងស៉ីអ៉ីអូ បាត់ដំបង ផាវវេីធីម នៅការិយាល័យសភាពាណិជ្ជកម្មខេត្តបាត់ដំបង។
គោលបំណងក្នុងកិច្ចប្រជុំនេះ មានចំនួន២សំខាន់ៗគឺ៖ ១.បែងចែក និងកំណត់ បញ្ហាប្រឈមជូនតាមផ្នែក ដើម្បីធ្វើការងារបន្តជូនដល់មន្ទីរពាក់ព័ន្ធក្នុងការដោះស្រាយ និង ២.កំណត់ពេលវេលាសម្រាប់កិច្ចប្រជុំជាមួយអាជីវករ និងអ្នកពាក់ព័ន្ធតាមផ្នែករបស់ខ្លួន។
គួររំឭកឱ្យដឹងថា អ្នកឧកញ៉ា ភួ វាសនា អនុប្រធានសភាពាណិជ្ជកម្មកម្ពុជា បានឈរឈ្មោះបោះឆ្នោត ជាប់ជាប្រធានសភាពាណិជ្ជកម្មខេត្តបាត់ដំបង សម្រាប់អាណត្តិទី១ ជាលើកទី២ កាលពីថ្ងៃ ពុធ ទី០៤ ខែមករា ឆ្នាំ២០២៣ កន្លងទៅ។ ក្នុងអាណត្តិ និងតួនាទី ជាអ្នកដឹកនាំសភាពាណិជ្ជកម្មក្នុងមូលដ្ឋានខេត្តរបស់ខ្លួន អ្នកឧកញ៉ាវ័យក្មេង និងជាអ្នកជំនួញ ការទូតដ៏បុិនប្រសព្វ ពោរពេញដោយសក្ដានុពល ប្រចាំខេត្តបាត់ដំបងរូបនេះ បានដឹកនាំក្រុមការងារពាក់ព័ន្ធ បញ្ចេញសកម្មភាពជួយជំរុញ ការងារសភាពាណិជ្ជកម្មខេត្តឱ្យចេញជាផ្លែផ្កាជាច្រើន។ ការស្វែងរកបញ្ហាប្រឈម ការកសាងបណ្ដាញសហគ្រិន ក្នុងខេត្តបាត់ដំង ជាមួយអ្នកវិនិយោគពីប្រទេសជិតខាង ជាពិសេសការផ្សព្វផ្សាយពីកាលានុវឌ្ឍភាពអាជីវកម្មលើវិស័យជាច្រើនក្នុងខេត្តបាត់ដំបង ឱ្យកាន់តែទូលំទូលាយ បានក្លាយជាបេសកកម្មដឹកនាំអាទិភាព របស់អ្នកឧកញ៉ា ភួ វាសនា៕
