ឧកញ៉ាបណ្ឌិត គីម ហ៊ាង ស្ថាបនិកបុរី វិមានសំណាង និង បុរី ខេអេស រ៉េសុីដេន បានប្រកាសបើកក្លឹបប្រដាល់ ខ្មែរ យូណាយធីត គុណខ្មែរ (Khmer United Kun Khmer) នៅដើមឆ្នាំ២០២៥ ខាងមុខនេះ ដែលមានទីតាំងស្ថិតនៅក្នុង បុរី ខេអេស រ៉េសុីដេន ស្រុកកៀនស្វាយ។
នៅលើបណ្តាញសង្គមហ្វេសប៊ុក នារសៀលថ្ងៃទី៤ ខែកញ្ញា ឆ្នាំ២០២៤នេះ លោកឧកញ៉ាបណ្ឌិត គីម ហ៊ាង បានលើកឡើងដូច្នេះថា៖ “ក្លឹបប្រដាល់ ខ្មែរ យូណាយធីត គុណខ្មែរ (Khmer United Kun Khmer) នឹងបើកដំណើរការនៅដើមឆ្នាំ ២០២៥ ដោយមានទីតាំងលើដី ៤០ម៉ែត្រ គុណ ៤០ម៉ែត្រ ក្នុងបុរី ខេអេស រ៉េសុីដេន នៅកៀនស្វាយ”។
ជាមួយនឹងការប្រកាសបើកក្លឹបប្រដាល់នេះ លោកឧកញ៉ាបណ្ឌិត ក៏បានប្រកាសជ្រើសរើសគ្រូបង្វឹកអាជីពចំនួន ២ ឬ ៣នាក់ ដែលមានលក្ខណៈសម្បត្តិ ដូចជា៖ ១)ធ្លាប់ជាកីឡាប្រដាល់អាជីព និងធ្លាប់ប្រកួតលើស ១០០ ដង ២)មិនផឹកស្រា មិនជក់បារី និងមិនលេងល្បែងសុីសង ៣)ស្រលាញ់ប្រដាល់ និងចង់ចូលរួមធ្វើឱ្យ ខ្មែរ យូណាយធីត គុណខ្មែរ ក្លាយជាក្លឹបលេខមួយ នៅកម្ពុជា ត្រឹមឆ្នាំ២០៣០។
សូមជម្រាបថា បច្ចុប្បន្នលោកឧកញ៉ាបណ្ឌិត គីម ហ៊ាង គឺជាស្ថាបនិក និងជានាយកប្រតិបត្តិ ក្រុមហ៊ុន ខ្មែរ រៀល អុីស្ទេត (Khmer Real Estate Co., Ltd), ស្ថាបនិក និងជានាយកប្រតិបត្តិ KW Cambodia ដែលមានប្រភពមកពីអាមេរិក, ស្ថាបនិក និងជានាយកប្រតិបត្តិ បុរី វិមានសំណាង (Borey Vimean Samnang), ស្ថាបនិក និងជានាយកប្រតិបត្តិ បុរី ខេអេស រ៉េស៊ីដេន (Borey KS Residence)។ លើសពីនេះ ក្នុងវិស័យកីឡា លោកឧកញ៉ាបណ្ឌិត ក៏ជាស្ថាបនិក និងប្រធានក្រុមបាល់ទាត់ពាក់កណ្តាលអាជីព Khmer United FC ផងដែរ៕
