ឧបនាយករដ្ឋមន្ត្រីប្រចាំ វង្ស៊ី វិស្សុត រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រី បានអញ្ជើញចូលរួមកាត់ខ្សែបូរសម្ពោធស្តង់ពិព័រណ៍កម្ពុជា ដែលរៀបចំតាំងបង្ហាញនៅមជ្ឈមណ្ឌលសន្និសីទ និងពិព័រណ៍អន្តរជាតិណាននីង នៅប្រទេសចិន នាថ្ងៃទី២៤ ខែកញ្ញា ឆ្នាំ២០២៤។
អមដំណើរឧបនាយករដ្ឋមន្ត្រីប្រចាំ វង្ស៊ី វិស្សុត កាត់ខ្សែបូរសម្ពោធស្ដង់ពិព័រណ៍កម្ពុជានៅប្រទេសចិននេះ ឃើញមានវត្ដមានចូលរួមពីសំណាក់អ្នកឧកញ៉ា លី ឃុនថៃ,ឧកញ៉ា តែ តាំងប៉, ឧកញ៉ា កែវ មុំ និងអ្នកមុខអ្នកការ ឥស្សរជនជាន់ខ្ពស់ជាច្រើនរូបទៀត។
ពិព័រណ៍ចិន-អាស៊ានលើកទី២១ ជាវេទិកាដ៏ធំមួយដែលថ្នាក់ដឹកនាំកំពូលៗក្នុងតំបន់អាស៊ានយកចិត្តទុកដាក់ខ្ពស់ក្នុងការលើកស្ទួយ និងជំរុញសកម្មភាពពាណិជ្ជកម្ម សេដ្ឋកិច្ច វិនិយោគ ទេសចរណ៍ ទំនាក់ទំនងនយោបាយការទូត ការផ្លាស់ប្តូរវប្បធម៌រវាងប្រជាជន និងប្រជាជន និងជាយុទ្ធសាស្ត្រនៃកិច្ចសហប្រតិបត្តិការគ្រប់ជ្រុងជ្រោយតំបន់រវាងមហាយក្សចិន និង អាស៊ាន។
ពិព័រណ៍ចិន-អាស៊ានលើកទី២១ នេះដែរ ក៏ជាឱកាសដ៏ល្អមួយបើកឲ្យមានការជួបប្រាស្រ័យទាក់ទងគ្នា ផ្គួរផ្គងគ្នាក្នុងការធ្វើជាដៃគូពាណិជ្ជកម្ម ការវិនិយោគក៏ដូចជា ការផ្សព្វផ្សាយផលិតផលរបស់ខ្មែរ ទៅក្នុងទីផ្សារតំបន់អាស៊ាន ជាពិសេសទីផ្សារចិនតែម្តង។
នៅក្នុងឆ្នាំ២០២៤នេះដែរ ពិព័រណ៍ចិន-អាស៊ានលើកទី២១ មានការចូលរួមតាំងបង្ហាញផលិតផល និងសេវាក្រុមហ៊ុន/សហគ្រាស សរុបមានចំនួន ៥៨ ក្រុមហ៊ុន ស្មើនឹង ៨៩ស្តង់ ក្នុងនោះដែរមានការដាក់តាំងបង្ហាញផលិតផលរបស់ខ្មែរជាច្រើនមុខ មានដូចជា អង្ករ ម្រេច ស្វាយ គ្រប់ស្វាយចន្ទីរ មៀនប៉ៃលិន សាប៊ូ ស្រាបៀរ ស្រាផ្លែឈើ ស្ករត្នោតធម្មជាតិ កាហ្វេខ្មែរ គ្រឿងចម្លាក់ដោយដៃ គ្រឿងអលង្ការ ក្រណាត់ និងសម្លៀកបំពាក់ខ្មែរ និងផលិតផលកសិកម្មជាច្រើនទៀត។
ឧបនាយករដ្ឋមន្ត្រីប្រចាំ វង្សី វិស្សុត បានថ្លែងលើកទឹកចិត្តបងប្អូនពាណិជ្ជករ និងអ្នកវិនិយោគចូលរួមជំរុញការនាំចេញផលិតផលកសិកម្មខ្មែរឱ្យកាន់តែច្រើន ដើម្បីជួយដល់កសិកឱ្យមានជីវភាពកាន់តែប្រសើឡើង។ ឧបនាយករដ្ឋមន្ត្រីប្រចាំការ វង្សី វិស្សុត ក៏បានកោតសរសើរ និងវាយតម្លៃខ្ពស់ចំពោះក្រុមការងារក្រសួង-ស្ថាប័នពាក់ព័ន្ធទាំងអស់ និងអាជីវករ ដែលបានប្រឹងប្រែងក្នុងការរៀបចំ និងនាំយកផលិតផលរបស់កម្ពុជា មកតាំងបង្ហាញដល់សាធារណជនក្នុងកម្មវិធី «ពិព័រណ៍ចិន-អាស៊ានលើកទី២១»៕
