ក្រោយសាងផ្នួសសងគុណមាតារយៈពេលខ្លី ចំនួនពីរសប្តាហ៍ នៅក្នុងពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា ព្រះតេជគុណ លាង ពៅ (ភីធើរ) បានលាចាកសិក្ខាបទវិញហើយ កាលពីថ្ងៃអាទិត្យ ទី២០ ខែតុលា ឆ្នាំ២០២៤។
ពិធីលាចាកសិក្ខាបទរបស់ព្រះតេជគុណ លាង ពៅ (ភីធើរ) ត្រូវបានធ្វើឡើងនៅក្នុងពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា ដែលមានទីតាំងស្ថិតនៅខាងលិចភ្នំព្រះរាជទ្រព្យ (ភ្នំឧដ្តង្គ) ឃុំផ្សាដែក ស្រុកពញាព្ម ខេត្តកណ្តាល ដោយមានវត្តមានស្ថាបនិកជាន់ខ្ពស់របស់ក្រុមហ៊ុន ជីប ម៉ុង ដូចជា លោកអ្នកឧកញ៉ា ភាព ហៀក លោកអ្នកឧកញ៉ា លាង ឃុន អ្នកឧកញ៉ា លាង ម៉េង ឧកញ៉ា លាង ហួង ព្រមទាំងថ្នាក់ដឹកនាំ និងបុគ្គលិកក្រុមហ៊ុន ជីប ម៉ុង ជាច្រើនរូបទៀត។
ពិធីខាងលើនេះ ក៏ត្រូវបានធ្វើឡើងក្នុងឱកាសដែល ថ្នាក់ដឹកនាំជាន់ខ្ពស់របស់ក្រុមហ៊ុន ជីប ម៉ុង ដង្ហែអង្គកឋិនទានយ៉ាងធំ ចាប់ផ្តើមនៅវត្តមណិរតនារាម ( វត្តទូលទំពូង ) រាជធានីភ្នំពេញ ទៅកាន់ពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា ព្រមទាំងការប្រគេនទេយ្យទានចំពោះព្រះសង្ឃផងដែរ។
ឧកញ៉ា លាង ពៅ (ភីធើរ) អគ្គនាយកពហុពាណិជ្ជកម្ម និងជាសមាជិកក្រុមប្រឹក្សា ភិបាល ក្រុមហ៊ុន ជីប ម៉ុង និងជាស្ថាបនិក Rev Up Cambodia បានសម្រេចចិត្តសាងផ្នួសសងគុណមាតារយៈពេលខ្លី នៅក្នុងពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា កាលពីថ្ងៃទី៧ ខែតុលា ឆ្នាំ២០២៤។
សូមជម្រាបថា ប្រទេសកម្ពុជា ជាប្រទេសកាន់ព្រះពុទ្ធសាសនា ដូច្នេះតាំងពីដើមមក ប្រជាជនខ្មែរបានឃើញប្រយោជន៍នៃការបួសទើបបានគិតថា បើមិនអាចបួសបានរហូតទេ យ៉ាងហោចណាស់គ្រាន់តែបួសរយៈពេលខ្លី ក៏ជាប្រយោជន៍ដែរ ដើម្បីបានឱកាសដុសខាត់សម្អាតចិត្ត ស្វែងរកសេចក្តីពិតនៃជីវិតឱ្យផុតចាកពីការសៅហ្មង តាមគន្លងព្រះធម៌របស់ព្រះពុទ្ធជាអង្គម្ចាស់ រួចទើបលាចាកសិក្ខាបទមកទទួលខុសត្រូវក្នុងសង្គមគ្រួសារ និងសង្គមជាតិវិញ៕
