ព្រឹត្តិការណ៍ ស្នាមញញឹមនៃកម្ពុជា លើកទី២ ក្រោមគំនិតផ្តួចផ្តើមរបស់លោកជំទាវអ្នកឧកញ៉ា ម៉ៅ ចំណាន កំពុងចាប់ផ្តើមដំណើរការជាផ្លូវការហើយ នៅព្រឹកថ្ងៃទី២៩ ខែតុលា ឆ្នាំ២០២៤នេះ ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រី ក្រសួងវប្បធម៌ និងវិចិត្រសិល្បៈ។
ព្រឹត្តិការណ៍ ស្នាមញញឹមនៃកម្ពុជា លើកទី២នេះ ត្រូវបានធ្វើឡើងដើម្បីអបអបអរសាទរ ព្រះរាជពិធីបុណ្យខួបលើកទី២០ នៃការគ្រងព្រះបរមសិរីរាជសម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី២៩ ខែតុលា ឆ្នាំ២០២៤នេះផងដែរ។
កាលថ្ងៃទី២៨ ខែតុលា ម្សិលមិញ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ និងឧកញ៉ា ខេមរៈ សិរីមន្ត កំពូលតារាចម្រៀងផលិតកម្ម Galaxy Navatra បានហាត់សមក្បួនដង្ហែព្រះមហាក្សត្រ នាសម័យអង្គរ ដោយសម្តែងជាតួអង្គព្រះបាទជ័យវរ្ម័នទី៧ និងព្រះនាង ឥន្ទ្រទេវី។
ព្រឹត្តិការណ៍ ស្នាមញញឹមនៃកម្ពុជា លើកទី២ ដែលផ្តួចផ្តើមរៀបចំដោយសមាគមសិល្បករខ្មែរ ប្រជុំដោយកំពូលតារាល្បីៗនៅក្នុងពិធីដង្ហែក្បួនព្រះមហាក្សត្រនាសម័យអង្គរ នៅថ្ងៃទី២៩-៣០ ខែតុលា ឆ្នាំ២០២៤។ ការដង្ហែក្បួនព្រះមហាក្សត្រខ្មែរនាសម័យអង្គរ នឹងមានសិល្បករសិល្បការិនីចំនួន ៥០០នាក់ចូលរួមសម្តែង ព្រមទាំងមានភ្ញៀវកិត្តិយសរាប់ពាន់នាក់។
លោកជំទាវអ្នកឧកញ៉ា ម៉ៅ ចំណាន ប្រធានសមាគសិល្បករខ្មែរ ធ្លាប់បានគួសបញ្ជាក់ កាលព្រឹត្តិការណ៍ «ស្នាមញញឹមនៃកម្ពុជា» ជាការរួមចំណែកបង្កើតស្នាដៃផ្សព្វផ្សាយវប្បធម៌ បរិយាកាស និង ស្នាមញញឹមជូនដល់ភ្ញៀវទេសចរណ៍ជាតិ-អន្តរជាតិ និងជាផ្នែកមួយជួយដល់កំណើនសេដ្ឋកិច្ចជាតិផងដែរ៕
