ឧកញ៉ា ខេមរៈ សិរីមន្ត កំពូលតារាចម្រៀងផលិតកម្ម Galaxy Navatra បានលើកឡើងថា ខ្លួនពិតជាមានកិត្តិយសណាស់ ដែលត្រូវបានក្រសួងវប្បធម៌ និងវិចិត្រសិល្បៈ ជ្រើសរើសឱ្យសម្តែងជាតួអង្គព្រះបាទជ័យវរ្ម័នទី៧ នៅក្នុងព្រឹត្តិការណ៍ ស្នាមញញឹមនៃកម្ពុជា លើកទី២ នាថ្ងៃទី២៩-៣០ ខែតុលា ឆ្នាំ២០២៤នេះ ខណៈដែលលោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ សម្តែងជាព្រះនាង ឥន្ទ្រទេវី។
ព្រឹត្តិការណ៍ ស្នាមញញឹមនៃកម្ពុជា លើកទី២ ក្រោមគំនិតផ្តួចផ្តើមរបស់លោកជំទាវអ្នកឧកញ៉ា ម៉ៅ ចំណាន កំពុងចាប់ផ្តើមដំណើរការជាផ្លូវការ នៅព្រឹកថ្ងៃទី២៩ ខែតុលា ឆ្នាំ២០២៤នេះ ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រី ក្រសួងវប្បធម៌ និងវិចិត្រសិល្បៈ។ ព្រឹត្តិការណ៍នេះ ត្រូវបានធ្វើឡើងដើម្បីអបអបអរសាទរ ព្រះរាជពិធីបុណ្យខួបលើកទី២០ នៃការគ្រងព្រះបរមសិរីរាជសម្បត្តិ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅថ្ងៃទី២៩ ខែតុលា ឆ្នាំ២០២៤នេះផងដែរ។
នៅលើទំព័រហ្វេសប៊ុក នាព្រឹកថ្ងៃទី២៩ ខែតុលានេះ លោកឧកញ៉ា ខេមរៈ សិរីមន្ត បានគូសបញ្ជាក់ដូច្នេះថា៖ “ខ្ញុំបាទ ខេមរៈ សិរីមន្ត ពិតជាមានមហាកិត្តិយសខ្លាំងមែនទែន ដោយទទួលបានកិត្តិយសសម្តែងជាតួអង្គព្រះបាទជ័យវរ្ម័នទី៧ នៅក្នុងមហាព្រឹត្តិការណ៍ដ៏ធំអស្ចារ្យ គឺកម្មវិធីស្នាមញញឹមកម្ពុជា ដើម្បីបង្ហាញនូវវប្បធម៌ អរិយធម៌ នាសម័យអាណាចក្រអង្គរដ៏បវរនៃយើង”។
លោកឧកញ៉ា បានឱ្យដឹងទៀតថា ការសម្តែងទ្រង់ទ្រាយធំនេះ មានការចូលរួមពីសិល្បករសិល្បការិនីរាប់ពាន់នាក់។ ជាពិសេស លោកជំទាវអ្នកឧកញ៉ា ម៉ៅ ចំណាន ដែលបានចំណាយពេលវេលាដ៏មានតម្លៃ មកសម្តែងជាតួអង្គព្រះនាង ឥន្ទ្រទេវី ដែលជាអគ្គព្រះមហេសី របស់ព្រះបាទជ័យវរ្ម័នទី៧។ លោកឧកញ៉ា បន្តថា លោកពិតជាមានក្តីរំភើប និងសូមកោតសរសើរដល់សិល្បករសិល្បការិនីរាប់ពាន់នាក់ ដែលបានដាក់ចិត្តដាក់កាយ ដើម្បីបុព្វហេតុនៃទេសចរណ៍កម្ពុជា ដោយបាននាំគ្នាមកហាត់សមជាច្រើនថ្ងៃ ពុំខ្លាចនឿយហត់។
គួរបញ្ជាក់ថា ព្រឹត្តិការណ៍ «ស្នាមញញឹមនៃកម្ពុជា» ត្រូវបានផ្តួចផ្តើមគំនិតឡើងដោយ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ក្នុងគោលបំណងរួមចំណែកបង្កើតស្នាដៃផ្សព្វផ្សាយវប្បធម៌ អរិយធម៌ បរិយាកាស និងស្នាមញញឹមជូនដល់ភ្ញៀវទេសចរណ៍ជាតិ-អន្តរជាតិ និងជាផ្នែកមួយជួយដល់កំណើនសេដ្ឋកិច្ចជាតិផងដែរ៕
