ឧកញ៉ា ឈាង សុវណ្ណរតនៈ ស្ថាបនិក និងអគ្គនាយកនៃក្រុមហ៊ុន RTNK Group បានប្រកាសបើកជាផ្លូវការនូវ “ព្រឹត្តិការណ៍ប្រកួតបាល់ទាត់ដណ្តើមពានរង្វាន់ អ ធី អិន ខេ ឆ្នាំ ២០២៥” នៅក្នុងសន្និសីទសារព័ត៌មានដែលបានប្រារព្ធនៅ Brew Coffee and Lounge កាលពីព្រឹកថ្ងៃទី ២៧ ខែវិច្ឆិកា ឆ្នាំ២០២៤។
ព្រឹត្តិការណ៍ប្រកួតបាល់ទាត់ប្រចាំឆ្នាំនេះ បានកំណត់ធ្វើឡើងចាប់ពីថ្ងៃទី ៣០ ខែវិច្ឆិកា ឆ្នាំ ២០២៤ ដល់ថ្ងៃទី ០៥ ខែមករា ឆ្នាំ ២០២៥ ដោយការប្រកួតនីមួយៗ នឹងរៀបចំឡើងនៅរៀងរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង ៤ រសៀល ដល់ម៉ោង ៦ល្ងាច នៅក្លឹបកីឡាផ្លាទីនីម ជ្រោយចង្វារ។
ព្រឹត្តិការណ៍ប្រកួតបាល់ទាត់ដណ្តើមពានរង្វាន់ អ ធី អិន ខេ ឆ្នាំ២០២៥ នឹងរួមចំណែកជាចលករដ៏ពិសេស និងដើរតួនាទីយ៉ាងសំខាន់មួយផ្នែក ក្នុងការលើកស្ទួយវិស័យកីឡាបាល់ទាត់ក្នុងព្រះរាជាណាចក្រកម្ពុជា។
នាឱកាសបើកព្រឹត្តិការណ៍នេះ ឧកញ៉ា ឈាង សុវណ្ណរតនៈ បានមានប្រសាសន៍ថា៖ «គោលបំណងនៃការរៀបចំការប្រកួតបាល់ទាត់នេះគឺ ដើម្បីបង្កើតឱកាសសម្រាប់យុវជនកម្ពុជាក្នុងការជួបជុំគ្នា រឹតចំណងមិត្តភាព សាមគ្គីភាព និងបង្កើនកិច្ចសហប្រតិបត្តិការ ក៏ដូចជាផ្តល់ឱកាសឱ្យយុវជនកម្ពុជាបញ្ចេញសមត្ថភាព និងទេពកោសល្យរបស់ខ្លួននៅក្នុងវិស័យកីឡាបាល់ទាត់នេះផងដែរ។»
បន្ថែមពីនេះ អ្នកចូលរួមទាំងអស់នឹងទទួលបាននូវការកម្សាន្តដ៏រីករាយ តាមរយៈការសម្តែងរបស់ក្រុមសិល្បករក្មេងខ្មែរ និងការសម្តែងក្បាច់គុនបុរាណខ្មែរ “គុនល្បុក្កតោ” នៅក្នុងពិធីបើកការប្រកួត នៅថ្ងៃទី ៣០ ខែវិច្ឆិកា ឆ្នាំ ២០២៤ ចាប់ពីម៉ោង ៣ រសៀលតទៅ។ សូមសាធារណជន អញ្ជើញចូលរួមឲ្យបានច្រើនកុះករនៅក្លឹបកីឡាផ្លាទីនីម ជ្រោយចង្វារ។
អំពី RTNK Group៖
RTNK Group បានបង្កើតឡើងក្នុងឆ្នាំ ២០២២ ដោយឧកញ៉ា ឈាង សុវណ្ណរតនៈ ដែលជាក្រុមហ៊ុនមានវិសាលភាពទៅលើផ្នែកអាហារ និងភេសជ្ជៈ ការចែកចាយលក់រាយ ហាងសម្លៀកបំពាក់ និងក្លឹបកីឡា។អាជីវកម្មរួមមាន Brew Coffee, Brew Park Restaurant, Brew Catering Service, Brew Coffee and Lounge, Brew Meatballs, PTT Station, 7-Eleven, Café Amazon, Cartenz Tactical Cambodia និងក្លឹបកីឡាផ្លាទីនីម។
អំពីព្រឹត្តិការណ៍៖
កាលបរិច្ឆេទ៖ ចាប់ពីថ្ងៃទី ៣០ ខែវិច្ឆិកា ឆ្នាំ ២០២៤ ដល់ថ្ងៃទី ០៥ខែមករា ឆ្នាំ ២០២៥
ពេលវេលា៖ ម៉ោង ៤ រសៀល តទៅ
ទីកន្លែង៖ ក្លឹបកីឡាផ្លាទីនីម ជ្រោយចង្វារ
សំបុត្រចូលរួមទស្សនា៖ ផ្តល់ជូនដោយឥតគិតថ្លៃ (ចំនួនមានកំណត់)
