បណ្តាអ្នកគាំទ្រឧកញ៉ា ព្រាប សុវត្ថិ បានបង្ហាញក្តីរំភើបជាមួយនឹងវត្តមានរបស់កំពូលតារាចម្រៀងរូបនេះ លើឆាកប្រគំតន្ត្រីនៃស្រុកមួយ ក្បែររាជធានីភ្នំពេញ ដោយបានរៀបរាប់ពីក្តីសោមន្យបស់ខ្លួន ក្រោយបានទស្សនា និងស្តាប់លោកបង្ហើរសំនៀងយ៉ាងពីរោះរណ្តំរបស់លោក។
ក្នុងនោះ ក៏មានយុវវ័យដែលជាគាំទ្រ បានចូលរួមបញ្ចេញមតិដែរថា សប្បាយនឹងច្រៀងក្នុងកម្មវិធីប្រគំតន្ត្រីជាមួយកំពូលតារាចម្រៀង ព្រាប សុវត្តិខ្លាំងណាស់ ខណៈខ្លះទៀត បង្ហាញការនឹករលឹកដល់កូនប្រុសទាំង៣ របស់ឧកញ៉ារូបនេះ ដោយចង់ឱ្យកម្មវិធីប្រគំតន្ត្រីនៅស្រុកកោះធំក្រោយៗ នាំយកមុនីវណ្ណ មុនីវុឌ្ឍ និងមុនីនាគ មកជាមួយផង។
ការលើកឡើងនេះ គឺបន្ទាប់ពីឧកញ៉ា ព្រាប សុវត្ថិ បានឡើងច្រៀងលើឆាកប្រគំតន្ត្រីមួយ លើទឹកដីនៃស្រុកកោះធំ ខេត្តកណ្តាល។
តាមរយៈការបញ្ចេញព្រោងព្រាត ភ្ជាប់ជាមួយនឹងវីដេអូសកម្មភាពជាច្រើន របស់តារាចម្រៀងល្បីឈ្មោះ ព្រាប សុវត្តិ សង្កេតឃើញថា ប្រជាប្រិយភាពរបស់លោកសម្រាប់យុវវ័យនៅស្រុកកោះធំនេះ ពិតជាមិនធម្មតា ខណៈលោកបានញ៉ាំងអារម្មណ៍ឱ្យសប្បាយរីករាយនឹងលោក ជាមួយនឹងបទចម្រៀងជាច្រើនបទ។ អ្វីដែលគួរកត់សម្គាល់ ត្រឹមតែបង្ហើរសំនៀងជាមួយប្រយោគដំបូងនៃក្បាលបទចម្រៀង “សែកមន្ត” អ្នកគាំទ្រនាំគ្នាស្រែកហ៊ោខ្ញៀវខ្ញារ និងបន្ទោរតាមផងដែរ។
ឈរលើឆាកតន្ត្រីនៅស្រុកកោះធំ លោកមិនត្រឹមតែអង្រួនយកបានបេះដូងយុវវ័យប៉ុណ្ណោះទេ សូម្បីតែកូនៗដ៏ស្រស់សង្ហារទាំងបីរូបរបស់លោក ក៏មានប្រជាប្រិយភាពសម្រាប់អ្នកគាំទ្រនៅទីនេះផងដែរ ខណៈក្នុងចំណោមនោះ មានអ្នករំលឹកនិងស្នើឱ្យមានវត្តមានជាមួយលោកដែរ ក្នុងការប្រគំលើទឹកស្រុកនេះក្រោយៗ៕
