ឧកញ៉ាបណ្ឌិត គីម ហ៊ាង អគ្គនាយកបុរី វិមានសំណាង ប្រកាសថានឹងផ្តល់ប្រាក់លើកទឹកចិត្តដល់បុគ្គលិកទាំងអស់ ដែលបម្រើការងារនៅបុរី វិមានសំណាង, បុរី ខេអេស រ៉េស៊ីដេន និងក្រុមហ៊ុន ខ្មែរ រៀល អ៊ីស្ទេត បន្ទាប់ពីក្រុមហ៊ុនទទួលបានលទ្ធផលល្អប្រសើរក្នុងខែមីនា ឆ្នាំ២០២៥។ លោកឧកញ៉ាបណ្ឌិត បានលើកឡើងថា ខំធ្វើការទៅតាមជំនាញ ចំណេះ និងការទទួលខុសត្រូវ ដោយចាត់ទុកការងារជាឆ្នាំងបាយ និងជាមុខរបរ នោះពួកយើងនឹងរីកចម្រើនជាមួយគ្នា។
នៅលើបណ្តាញសង្គមហ្វេសប៊ុក នាថ្ងៃទី០១ ខែមេសា ឆ្នាំ២០២៥នេះ លោកឧកញ៉ាបណ្ឌិត គីម ហ៊ាង បានបង្ហើបឱ្យដឹងថា ផ្នែករកចំណូលរបស់បុរី វិមានសំណាង បុរី ខេអេស រ៉េស៊ីដេន (Borey KS Residence) និងក្រុមហ៊ុន ខ្មែរ រៀល អ៊ីស្ទេត (Khmer Real Estate Co., Ltd ធ្វើបានល្អសមរម្យក្នុងខែមីនា ឆ្នាំ២០២៥ ដូច្នេះបុគ្គលិក គ្រប់លំដាប់ថ្នាក់ និងតំណែងទាំងអស់ នៅក្នុងអង្គភាពអាជីវកម្មទាំងបីខាងលើ រាប់តាំងពីសន្តិសុខ អ្នកអនាម័យ បុគ្គលិកហាត់ការ រហូតដល់ប្រធានផ្នែក និងនាយកផ្នែក សុទ្ធតែបានប្រាក់លើកទឹកចិត្តទាំងអស់ ទៅតាមគោលការណ៍លើកទឹកចិត្តក្នុងឆ្នាំ២០២៥។
លោកឧកញ៉ាបណ្ឌិត បានបន្ថែមបែបនេះថា៖ “ខំធ្វើការទៅតាមជំនាញ ចំណេះ និងការទទួលខុសត្រូវ ដោយចាត់ទុកការងារជាឆ្នាំងបាយ និងជាមុខរបរ នោះពួកយើងនឹងរីកចំរើនជាមួយគ្នា។ ការងារម្សិលមិញ បានផ្តល់លទ្ធផលថ្ងៃនេះ ហើយការងារថ្ងៃនេះ នឹងផ្តល់លទ្ធផលនៅថ្ងៃស្អែក”។
សូមជម្រាបជូនថា លោកឧកញ៉ាបណ្ឌិត គីម ហ៊ាង គឺជាកូនអ្នកក្រុងបាវិត ខេត្តស្វាយរៀង។ លោកឧកញ៉ាបណ្ឌិតជាស្ថាបនិក និងជានាយកប្រតិបត្តិ Khmer Real Estate Co., Ltd, ស្ថាបនិក និងជានាយកប្រតិបត្តិ បុរី ខេអេស រ៉េស៊ីដេន និងជាស្ថាបនិក និងជានាយកប្រតិបត្តិ បុរី វិមានសំណាង ផងដែរ៕
