ឧកញ៉ា ភិរម្យ វិចិត្រដារ៉ា បង្ហើបឱ្យដឹងពីផលវិជ្ជមាននិងអវិជ្ជមាន ចំពោះការដំឡើងពន្ធថ្មីរបស់អាមេរិក មកលើប្រទេសកម្ពុជា

ជុំវិញ​ឧកញ៉ា

ឧកញ៉ា ភិរម្យ វិចិត្រដារ៉ា ស្ថាបនិកក្រុមហ៊ុនបញ្ចាំ Vichetdara Cash Express Co., LTD និងជាម្ចាស់បុរី វិចត្រដារ៉ា (វីឡាព្រិស៍) បានបង្ហើបឱ្យដឹងពីផលវិជ្ជមាននិងអវិជ្ជមាន ចំពោះការដំឡើងពន្ធថ្មីរបស់អាមេរិក មកលើប្រទេសកម្ពុជា កាលពីថ្ងៃទី២ ខែមេសា ឆ្នាំ២០២៥។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

លើកឡើងនៅលើបណ្ដាញសង្គមផ្ទាល់ខ្លួននាព្រឹកថ្ងៃទី៣ ខែមេសា ឆ្នាំ២០២៥ បានឱ្យដឹងថា ថ្មីៗនេះ ប្រធានាធិបតី ដូណាល់ ត្រាំ បានប្រកាសអំពីការដាក់ពន្ធថ្មីលើការនាំចូលទំនិញចូលសហរដ្ឋអាមេរិក។ ក្នុងចំណោមនេះ កម្ពុជា ត្រូវបានដាក់ពន្ធខ្ពស់ បំផុតក្នុងអាស៊ី ដោយមានអត្រា 49%។ ការដាក់ពន្ធនេះអាច មានឥទ្ធិពលធ្ងន់ធ្ងរលើវិស័យផលិតកម្ម និងការនាំចេញរបស់ កម្ពុជា។

ជុំវិញបញ្ហានេះ លោកឧកញ៉ាបានឱ្យដឹងពីផលវិជ្ជមានចំនួន៣ចំណុចដែលកម្ពុជាទទួលបានគឺ៖ ១,  ការលើកកម្ពស់ផលិតក្នុងស្រុក។ ត្រង់នេះលោកឧកញ៉ាពន្យល់ថា ជំនួសការនាំចេញ ទំនិញអាចត្រូវបានលក់នៅទីផ្សារក្នុងស្រុក។ ២, ការផ្លាស់ប្តូរទីផ្សារនាំចេញថ្មី អ្នកអាជីវកម្មអាចរកទីផ្សារថ្មី ក្នុងតំបន់អាស៊ី, អឺរ៉ុប ឬទីផ្សារដែលមានការបង់ពន្ធទាបជាង។ និង៣, ជំរុញឱ្យពឹងផ្អែកលើឧស្សាហកម្មក្នុងស្រុក ត្រង់ចំណុចនេះលោកពន្យល់ថា ការកាត់បន្ថយអាស្រ័យលើអាមេរិក អាចជួយកម្ពុជាឲ្យបង្កើតឧស្សាហកម្មរបស់ខ្លួន។

ដោយឡែកចំពោះផលអវិជ្ជមានដែលកម្ពុជានឹងទទួលបានមានចំនួន៣ចំណុចដូចគ្នាគឺ៖ ១, ប៉ះពាល់ធ្ងន់លើវិស័យអេកូណូមិ ដោយអាមេរិកគឺទីផ្សារនាំចេញ ធំបំផុតរបស់កម្ពុជា (ចម្បងជាសម្លៀកបំពាក់ និងស្រោមដៃ), ដូច្នេះការតម្លើងពន្ធអាចធ្វើឱ្យការនាំចេញអន់ថយ។ ២, ការបាត់បង់ការងារ  ក្នុងនោះអាជីវកម្មដែលពឹងផ្អែកលើការនាំចេញ ទៅអាមេរិកអាចបិទដំណើរការ ឬកាត់បន្ថយការងារ។ និងទី៣, ការធ្លាក់ចុះនៃការវិនិយោគបរទេស ក្នុងនោះក្រុមហ៊ុនបរទេសដែល វិនិយោគនៅកម្ពុជាអាចផ្លាស់ទីទៅប្រទេសផ្សេង ដែលមានអាករនាំចេញទៅអាមេរិកទាបជាង។

សូមជម្រាបជូនថា កាលពីថ្ងៃទី២ ខែមេសា លោកដូណាល់ត្រាំបានប្រកាសពីការដំឡើងពន្ធទៅដល់ប្រទេស ចំនួន២៥ នៅទូទាំងពិភពលោក ក្នុងនោះប្រទេសនៅតំបន់អាស៊ីអាគ្នេយ៍ រួមមាន ៖ កម្ពុជា៤៩% , វៀតណាម ៤៧% , មីយ៉ាន់ម៉ា ៤៤%, ថៃ ៣៦%, ឥណ្ឌូនេស៊ី ៣២%, ម៉ាឡេស៊ី ២៤%, ហ្វីលីពីន ១៧% និង សិង្ហបុរី ១០%។ ដែលបញ្ហានេះ លោក Casey Barnett ប្រធានសភាពាណិជ្ជកម្មអាមេរិកប្រចាំព្រះរាជាណាចក្រកម្ពុជា យល់ឃើញថា រាជរដ្ឋាភិបាលកម្ពុជាត្រូវតែចរចាជាបន្ទាន់ ជាមួយរដ្ឋាភិបាលសហរដ្ឋអាមេរិក ដើម្បីបញ្ចៀសវិបត្តិសេដ្ឋកិច្ចធ្ងន់ធ្ងរ៕