ឧកញ៉ាបណ្ឌិត ហោ សេរីវឌ្ឍន៍ បង្ហាញពីរបៀបគណនាអត្រាកំណត់ពន្ធរបស់លោក ត្រាំ មកលើប្រទេសកម្ពុជា

ឧកញ៉ាបណ្ឌិត ហោ សេរីវឌ្ឍន៍ ប្រធានក្រុមប្រឹក្សាភិបាលសមាគមវិនិយោគិន នវានុវត្តន៍ និងអភិវឌ្ឍន៍ (IDI) បានប៉ាន់ស្មានពីរបៀបគណនាអត្រាកំណត់ពន្ធរបស់លោក ដូណាល់ ត្រាំ ប្រធានាធិបតីអាមេរិក ដែលប្រកាសដំឡើងអត្រាពន្ធមកលើប្រទេសកម្ពុជា ក្នុងតួលេខ ៩៧% និង ៤៩%។

នៅលើបណ្តាញសង្គមហ្វេសប៊ុក នាព្រឹកថ្ងៃទី២ ខែមេសា ឆ្នាំ២០២៥នេះ ឧកញ៉ាបណ្ឌិត ហោ សេរីវឌ្ឍន៍ បានលើកឡើងថា ប្រហែលនេះជារបៀបដែលលោកត្រាំ គណនាលេខ ៩៧% និង ៤៩%៖ ការនាំចេញរបស់កម្ពុជាទៅសហរដ្ឋអាមេរិកក្នុងឆ្នាំ ២០២៤ គឺ ៩,៩ពាន់លានដុល្លារ ការនាំចូលគឺ ០,២៦ពាន់លានដុល្លារ ។ ដូច្នេះចំនួនពាណិជ្ជកម្មសរុបគឺ ១០,២ ពាន់លានដុល្លារ។

$៩,៩/$១០,២=០,៩៧=៩៧%
០,៩៧ ចែកនឹង២ =៤៩%

លោកឧកញ៉ាបណ្ឌិត បានឱ្យដឹងទៀតថា ប្រទេសផ្សេងក៏ប្រហាក់ប្រហែលនេះដែរ។ បើមើលបែបវិជ្ជមាន យើងអាចបញ្ចុះពន្ធនាំចូលផលិតផលអាមេរិកបាន។ តែបើចង់ឲ្យមានតុល្យភាពលើទំហំនាំចេញ-នាំចូល Trade Balance វិញ, កម្ពុជានឹងពិបាក ព្រោះទីផ្សារយើងតូចណាស់សម្រាប់ផលិតផលអាមេរិក។ តែក៏យើងមានឱកាសបង្កើនគុណភាពផលិតផល និងសេវាកម្មយើងបន្ថែមពីអាមេរិកផងដែរ។

សូមជម្រាបថា លោក ដូណាល់ ត្រាំ នៅថ្ងៃព្រហស្បតិ៍ ទី៣ ខែមេសានេះ បានប្រកាសដំឡើងពន្ធគយទ្រង់ទ្រាយធំបន្ថែមទៀត ជាមួយនឹងការយកពន្ធ ១០% លើការនាំចូលទំនិញពីជុំវិញពិភពលោក និងការយកពន្ធបន្ថែមយ៉ាងធ្ងន់ធ្ងរលើប្រទេសដែលជាដៃគូពាណិជ្ជកម្មសំខាន់ៗ ជាពិសេសគឺការប្រកាសដំឡើងពន្ធនាំចូលទំនិញពីកម្ពុជា ក្នុងអត្រារហូតដល់ទៅ ៤៩%៕