អ្នកឧកញ៉ា លី ឃុនថៃ អនុប្រធានសភាពាណិជ្ជកម្មកម្ពុជា យល់ឃើញថា ការប្រកាសដំឡើងពន្ធ ៤៩% របស់លោក ដូណាល់ ត្រាំ ប្រធានាធិបតីសហរដ្ឋអាមេរិក សម្រាប់ទំនិញនាំចូលពីកម្ពុជា កាលពីថ្ងៃទី៣ ខែមេសា ឆ្នាំ២០២៥ គឺមិនមានការប៉ះពាល់ដល់អ្នកវិនិយោគនាំចេញទេ ដោយសារមានហេតុផលមួយចំនួន។
អ្នកឧកញ៉ា លី ឃុនថៃ ទីប្រឹក្សាផ្ទាល់សម្ដេចធិបតី ហ៊ុន ម៉ាណែត នាយករដ្ឋមន្ត្រី និងជាប្រធានសមាគមសហព័ន្ធអ្នកវិនិយោគកម្ពុជា បានថ្លែងប្រាប់ ឧកញ៉ាញូស៍ នៅព្រឹកថ្ងៃទី៤ ខែមេសានេះថា ការដំឡើងពន្ធមិនមានការប៉ះពាល់ដល់អ្នកវិនិយោគនាំចេញទេ ដោយសារតែការដាក់បញ្ជារទិញនៅប្រទេសកម្ពុជាយ៉ាងតិចពីរទៅបីឆ្នាំមានកិច្ចសន្យា ដូច្នេះហើយក្នុងរយៈពេលពីរបីឆ្នាំនេះមិនមានបញ្ហាអ្វីទេ។
អ្នកឧកញ៉ា បានបន្តទៀតថា ម្យ៉ាងទៀតការដំឡើងពន្ធមិនមែនដំឡើងតែប្រទេសកម្ពុជាទេ គឺដំឡើងនៅទូទាំងពិភពលោក។ ប្រទេសកម្ពុជាការនាំចេញមាន សហភាពអឺរ៉ុប ទីផ្សារអាស៊ាន ទីផ្សារចិន ទីផ្សារកាណាដា ទីផ្សារអារ៉ាប់រួមអេមរ៉ាត់ ទីផ្សារចក្រភពអង់គ្លេស នៅពិភពលោកមានទីផ្សារច្រើនណាស់ដើម្បីបញ្ចេញ ដូច្នេះលោកគិតថាការងារនេះមិនមានអ្វីបារម្ភទេ។
ជាមួយគ្នានេះ អ្នកឧកញ៉ា ក៏សូមអំពាវនាវដល់អ្នកវិនិយោគ ក៏ដូចនិយោជិក និងនិយោជក សូមកុំបារម្ភ ព្រោះស្ថិរភាពនាំចេញនៅតែធម្មតា ដោយសារប្រទេសកម្ពុជាមានចុះកិច្ចព្រមព្រៀងពាណិជ្ជកម្មសេរី (FTA) នៅអាមេរិក អារ៉ាប់រួម ប្រទេសកូរ៉េ ប្រទេសចិន និងបណ្តាប្រទេសជាច្រើនទៀត។ ដូច្នេះសូមអ្នកវិនិយោគទាំងអស់ជាទុកចិត្តលើរាជរដ្ឋាភិបាលកម្ពុជាដែលមានថ្នាក់ដឹកនាំ សម្ដេចមហាបបរអធិបតី ដឹកនាំដ៏ឈ្លាសវៃ។
សូមជម្រាបថា ពាក់ព័ន្ធនឹងការដំឡើងពន្ធរបស់អាមេរិកនេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា បានថ្លែងបញ្ជាក់ប្រាប់សាធារណៈជន កាលពីល្ងាចថ្ងៃទី៣ ខែមេសា ថា កម្ពុជានៅក្នុងនាមជាសមាជិក WTO ក៏ដូចគ្នាទៅនឹងសហរដ្ឋអាមេរិក និងប្រទេស ១៦៦ផ្សេងទៀតដែរ សុទ្ធតែជាសមាជិក WTO យើងមានការកំណត់នូវបន្ទាត់ពន្ធគយជាមួយគ្នាជារួម ក្នុងនោះកម្ពុជាបានកំណត់ នៅក្នុងកាតព្វកិច្ចរបស់ខ្លួន គឺការយកពន្ធនៃផលិតផលនាំចូលមិនថា សហរដ្ឋអាមេរិក ឬក៏របស់ដៃគូពាណិជ្ជកម្មណាផ្សេងៗទេ គឺថា មានចន្លោះពី ០ រហូតដល់អស់កម្ពស់គឺ ៣៥%។
ចំពោះការដំឡើងពន្ធ ៤៩% លោកជំទាវរដ្ឋមន្ត្រី ក៏បានគូសបញ្ជាក់បន្ថែមថា សម្តេច ហ៊ុន ម៉ាណែត បានដាក់ចេញនូវវិធានការជាបន្ទាន់ឱ្យ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ប្រធានគោលនយោបាយ និងសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ វិស័យឯកជន ដើម្បីប្រមូលធាតុចូលដាក់ជូនសម្ដេច ដើម្បីឆ្លើយតប និងការជំរុញវិស័យសេដ្ឋកិច្ចកម្ពុជាផងដែរ៕
