សហស្ថាបនិកកម្មវិធី Ethereum លោក Vitalik Buterin បានចូលរួមបរិច្ចាគប្រាក់ជាង១ពាន់លានដុល្លារអាមេរិក នៃកាក់ shiba inu របស់លោកដើម្បីមូលនិធិសង្គ្រោះដល់ប្រទេសឥណ្ឌាដែលកំពុងទទួលរងនៃវិបត្តិកូវីដ-១៩ដ៏កាចសាហាវមួយនេះ។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
ការប្រកាសបរិច្ចាគនេះត្រូវបានចាត់ទុកថាជា«ម្តាយនៃការបរិច្ចាគទាំងអស់» និងកិច្ចខិតខំប្រឹងប្រែងមនុស្សធម៌លក្ខណៈបុគ្គលដ៏ធំបំផុតសម្រាប់មូលនិធិសង្គ្រោះដល់ប្រទេសឥណ្ឌា។
បើយោងតាម wallet ដែលប្រកាសជាសាធារណៈបានឲ្យដឹងថា កាលពីថ្ងៃពុធ អ្នកជំនាញបង្កើតកម្មវិធីសញ្ញាតិរុស្ស៊ី-កាណាដា មានអាយុ២៧ឆ្នាំបានផ្ទេរកាក់ shiba inu ចំនួន៥០ទ្រីលាន ស្មើនឹង១ពាន់លានដុល្លារអាមេរិក ចូលទៅមូលនិធិសង្គ្រោះវិបត្តិកូវីដ-១៩ឥណ្ឌា (India Covid-Crypto Relief Fund )។ ជាមួយគ្នានោះលោកក៏បានផ្ទេរប្រាក់ ៥០០ Ether ប្រហែលជា ១.៩លានដុល្លារអាមេរិកទៅមូលនិធិសង្គ្រោះដែរ។
Coinbase បានឲ្យដឹងថា ពេលវេលានៃការផ្ទេរ កាក់ shiba មានតម្លៃស្មើ១ពាន់លានដុល្លារអាមេរិក ប៉ុន្តែរូបិយប័ណ្ណឌីជីថល (cryptocurrencies)នេះ ងាយនឹងប្រែប្រួល។ តម្លៃរបស់វាបានធ្លាក់ចុះ បន្ទាប់ពីការបរិច្ចាគរបស់លោក Buterin បានធ្វើឡើង ហើយបានធ្លាក់ចុះប្រហែលជា៣០%នៅថ្ងៃព្រហស្បតិ៍។
សូមបញ្ជាក់ថា កាលពីអាយុ១៩ឆ្នាំ លោក Buterin បានបង្កើតកម្មវិធី ethereum នៅឆ្នាំ២០១៣ ហើយទទួលបានជោគជ័យយ៉ាងឆាប់រហ័ស និងទើបបានក្លាយជាមហាសេដ្ឋីវ័យក្មេងបំផុតក្នុងពិភពលោកប្រហែលជាពីរសប្តាហ៍មុននេះ មុនពេលលោកធ្វើការបរិច្ចាគប្រាក់ដ៏ច្រើនសន្ធឹកសន្ធាប់នេះ។
លោកបានរៀនសូត្រអំពី Bitcoin ពីឪពុករបស់លោកឈ្មោះ Dmitry Buterin ដែលមានក្រុមហ៊ុនបច្ចេកវិទ្យា Wild Apricot នៅពេលលោកអាយុ១៧ឆ្នាំ និងជាសហស្ថាបនិកទស្សនាវដ្តី Bitcoin Magazine ដែលបង្កើតក្នុងឆ្នាំ២០១១។
លោក Buterin បានឈប់រៀននៅសកលវិទ្យាល័យ Waterlool បន្ទាប់ពីរៀនបានមួយឆ្នាំលើជំនាញវិទ្យាសាស្ត្រកុំព្យួទ័រ ហើយបានឈ្នះក្នុងការប្រកួតកម្មវិធី Thiel Fellowship ដែលមានប្រាក់រង្វាន់១០ម៉ឺនដុល្លារអាមេរិកដល់មនុស្សវ័យក្មេងដែលចង់បង្កើតអ្វីថ្មីៗជាជាងអង្គុយរៀននៅសាលារៀន៕
ប្រភព៖ forbes
