ស្របតាមការសម្រេចចិត្តបង្កើតរោងចក្រកែច្នៃផ្លែឈើស្រស់ រួមមានដូចជា ផ្លែមៀន, ផ្លែតាង៉ែន, ផ្លែសាវម៉ាវ, ផ្លែគូលេន , ផ្លែស្វាយ, ផ្លែម្នាស់, និងផ្លែឈើផ្សេងៗទៀតដើម្បីផលិតជាទឹកផ្លែឈើ ដំណាប់ផ្លែឈើកំប៉ុង និងដំណាប់ផ្លែឈើក្រៀម ក្នុងពេលឆាប់ៗខាងមុខនេះ ឧកញ៉ា ស្រី ចាន់ថន បានឲ្យដឹងពីដំណើរការលើកិច្ចការងារក្នុងការឈានទៅបង្កើតរោងចក្រកែច្នៃផ្លែឈើស្រស់ក្នុងស្រុក។
ឧកញ៉ា ស្រី ចាន់ថន បានលើកឡើងគោលដៅចំនួនពីរកំពុងសិក្សាក្នុងការឈានទៅបើករោងចក្រឆាប់ៗនេះ។ គោលដៅទី១ ក្រុមការងារកំពុងតែដុតដៃដុតជើងរៀបចំរចនាសំបកកំប៉ុង ការសិក្សាពីគុណភាពចំណីអាហារ និងស្តង់ដាសុវត្ថិភាព រសជាតិ ដែលអាចរក្សាទុកបានរហូតទៅដល់២ឆ្នាំ ។ ចំណែកគោលដៅទី២គឺការសិក្សាពីតម្រូវការទីផ្សារក្នុងស្រុក និងលទ្ធភាពនាំចេញទៅក្រៅប្រទេស ដើម្បីធានាអោយបាននូវនិរន្តរភាពនៃសង្វាក់ផលិតកម្ម។
ឧកញ៉ាម្ចាស់ក្រុមហ៊ុនអភិវឌ្ឍ Skyland រំពឹងថា រោងចក្រនឹងលេចរូបរាង អាចជួយដល់កសិករខ្មែរផង ក៏ដូចជាគាំទ្រអោយមានការបង្កើតរោងចក្រនៅក្នុងប្រទេស ដើម្បីផ្តល់ការងារដល់បងប្អូនខ្មែរមានប្រាក់ខែ មានចំណូលសម្រាប់ទ្រងទ្រង់គ្រួសារ៕
