ឧកញ៉ា ហ៊ួត ជា៖ អ្នកដឹកនាំក្រុមហ៊ុនមួយជោគជ័យគប្បីមាន ៣ចំណុចនេះក្នុងខ្លួន

ឆ្លងកាត់តាមបទពិសោធន៍នៃការគ្រប់គ្រងទាំងធនធានមនុស្ស និងមុខជំនួញក្នុងដៃ អស់រយៈពេលជាច្រើនឆ្នាំកន្លងមក ឧកញ៉ា ហ៊ួត ជា អគ្គនាយកក្រុមហ៊ុន ហ៊ួត ជា ផ្គត់ផ្គង់គ្រឿងសំណង់គ្រប់ប្រភេទនៅកម្ពុជា បានចែករំលែកនូវទ្រឹស្ដីនៃការគ្រប់គ្រង និងដឹកនេះស្ថាប័ន ឬក្រុមហ៊ុនក្រោមបង្គាប់ថា ត្រូវមានធាតុផ្សំ ៣ចំណុចសំខាន់ៗ។

ថ្នាក់ដឹកនាំកំពូលប្រចាំក្រុមហ៊ុន ហ៊ួត ជា ផ្គត់ផ្គង់គ្រឿងសំណង់គ្រប់ប្រភេទ និងជាស្ថាបនិក “មូលនិធិឧកញ៉ា ហ៊ួត ជា” រូបនេះលើកឡើងនាថ្ងៃទី២៦ ខែតុលា ២០២១នេះថា៖ “ដឹកនាំក្រុមហ៊ុនគាប្បីមាន 3 ចំនុចនេះ រួមមាន៖ ១. ចេះចែករំលែក ចំណេះដឹង ២. ចេះណែនាំ និងគោរពបទបញ្ជាផ្ទៃក្នុងក្រុមហ៊ុន  ៣. មានចិត្តល្អ និងទូលាយ” ។

ដើរតាមលំអានទ្រឹស្ដីនៃការដឹកនាំបុគ្គលិកក្រោមបង្គាប់រាប់ពាន់នាក់ និងជាក្បាលម៉ាស៊ីនគ្រប់គ្រងប្រចាំក្រុមហ៊ុន ហ៊ួត ជា គ្រុប ដែលមានបុត្រសម្ព័ន្ធជាច្រើន  ក្រុមហ៊ុនរបស់លោក តែងតែបង្កើតវគ្គបណ្តុះបណ្តាលដល់បុគ្គលិក និងគ្រប់សាខាដែលជាតំណាងចែកចាយគ្រឿងសំណង់ទូទាំង ២៥ រាជធានីខេត្ត-ក្រុង ក្នុងប្រទេសកម្ពុជាជារឿយៗ។

ចំពោះចក្ខុវិស័យ និងមហិច្ឆិតា នាពេលខាងមុខ ឧកញ៉ា ហ៊ួត ជា ធ្លាប់បានបង្ហើបឱ្យដឹងថា លោកនឹងពង្រីកសាខាផ្គត់ផ្គង់គ្រឿងសំណង់បន្ថែមឱ្យបានដល់ ១៥០ សាខាក្នុងពេលឆាប់ៗ។ ក្រៅពីមានភាពល្បីល្បាញក៏សាងម៉ាកយីហោលក់គ្រឿងសំណង់គ្រប់ប្រភេទ និងមានតំណាងដេប៉ូចែកចាយលក់បន្តឈរជើង ពាសពេញប្រទេសកម្ពុជាហើយនោះ លោកក៏ជាអ្នកអភិវឌ្ឍន៍គម្រោង បុរី ហ៊ួត ជា ម៉ាកិត្យា ដែលមានទីតាំងនៅស្រុកស្អាង ខេត្តកណ្ដាល ជិតព្រលានយន្តហោះថ្មីផងដែរ៕