ឧកញ៉ា សំ សុខនឿន៖ អ្នកបកប្រែភាសាចិនមួយចំនួនបោកភ្នាក់ងារអចលនទ្រព្យខ្មែរយើងច្រើនណាស់

នៅប៉ុន្មានឆ្នាំចុងក្រោយនេះ វិស័យអចលនទ្រព្យនៅកម្ពុជា បាននឹងកំពុងងើបឡើង បន្ទាប់ពីមានក្រុមអ្នកវិនិយោគិនជាតិ និងអន្តរជាតិដាក់ទុនវិនិយោគមកលើគម្រោងអភិវឌ្ឍន៍នានា ខណៈពេលបច្ចុប្បន្នមានតម្រូវការខ្ពស់។ វិស័យដែលជាផ្លូវដង្ហើមសេដ្ឋកិច្ចជាតិមួយនេះកំពុងវិវឌ្ឍន៍ខ្លួនរីកចម្រើន ក៏មានក្រុមហ៊ុន និងភ្នាក់ងារអចលនទ្រព្យ បានបង្ហាញក្តីបារម្ភជុំវិញ អ្នកទិញ លក់អចលនទ្រព្យមួយចំនួន ដែលដើរបោកប្រាស់កេញចំណេញរកផលប្រយោជន៍ផ្ទាល់ខ្លួន ជាពិសេសនោះមានអ្នកបកប្រែភាសាចិនមួយចំនួនបោកភ្នាក់ងារអចលនទ្រព្យតែម្តង។

ថ្លែងនៅក្នុងសិក្ខាសាលាអចលនទ្រព្យប្រចាំឆ្នាំ ២០២២ ដែលព្យាករណ៍ពី “អនាគតនៃវិស័យអចលនទ្រព្យនៅកម្ពុជា” កាលពីថ្ងៃអាទិត្យ ទី២៣ ខែមករាម្សិលមិញ ឧកញ៉ា សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន KWSam Sn Realty បានគូសបញ្ជាក់ថា មានបងប្អូនខ្មែរដែលប្រកបរកស៊ីអចលនទ្រព្យច្រើនណាស់បានចាញ់បោកអ្នកបកប្រែចិន។ ក្នុងន័យនេះលោកបានអះអាងថា មិនមែនចាញ់បោកលុយនោះទេ គឺចាញ់បោកគំនិត និងពេលវេលា។

លោកថ្លែងយ៉ាងដូច្នេះថា៖ “ អ្នកទិញពិតប្រាកដត្រូវតែជួបនិយាយគ្នាឲ្យច្បាស់ មិនមែនសន្ទនាគ្នាតាមទូរសព្ទនោះទេ “។ លោកបានសង្កត់ធ្ងន់ថា បើយើងមិនដឹងថាភ្ញៀវនៅកន្លែងណា គម្រោងនៅទីណានោះ ដោយគ្រាន់តែតេមកប្រាប់ថាជាអ្នកទិញពិតប្រាកដហើយយើងជឿនោះទេ ពេលខ្លះអ្នកបកប្រែភាសាចិនក៏បានបោកភ្នាក់ងារអចលនទ្រព្យយើងច្រើនណាស់ដែរ។

តែយ៉ាងណា អ្នកជំនាញអចលនទ្រព្យរូបនេះ បានគូសបញ្ជាក់បន្ថែមថា អ្នកគូកជេទាំងឡាយគួរតែភ្ញាក់ខ្លួនឡើង ហើយសម្លឹងមើលម្តងទៀត ព្រោះទង្វើនេះគេយកយើងធ្វើជាស្ពានចម្លងគេតែប៉ុណ្ណោះ។ ជាមួយគ្នានេះលោកបានបង្ហាញនូវឲ្យដឹងនូវពេលកន្លងមកមានក្រុមចិនមួយចំនួនដើរមកជួបភ្នាក់ងារអចលនទ្រព្យតាមភូមិ ឬតំបន់ផ្ទាល់ ដោយប្រាប់ថា ចង់ទិញដីប្រមាណ ១០ហិចតា ដល់ចឹងយើងនាំគេទៅឲ្យស្គាល់ដី ស្គាល់ម្ចាស់ ដល់ពេលគេស្គាល់គេឲ្យក្រុមផ្សេងចូលទិញ ព្រោះក្រុមចិននោះជាអ្នកគូកជេរ។

សម្រាប់ឧកញ៉ា សំ សុខនឿន សង្កត់ធ្ងន់ថា៖ “អ្នកទិញពិតប្រាកដនៅពេលបច្ចុប្បន្នគេមិនមែនទិញតាមភ្នាក់ងារដែលគ្មានក្រុមហ៊ុនត្រឹមត្រូវនោះទេ គេទិញទៅលើទំនុកចិត្ត”៕