ឧកញ៉ា ផន វណ្ណិត អនុប្រធានសមាគមអ្នកអភិវឌ្ឃដីឡូត៍កម្ពុជា បានលើកឡើងពីអប្បគំនិត ដើម្បីចែករំលែកដល់បងប្អូនគិតពិចារណា។
អ្នកជំនួញដែលមានប្រវត្តិធ្លាប់បួសរៀននៅវត្តរូបនេះបានលើកឡើងពីបុគ្គលអប្បគំនិត ជាមនុស្សដែលគិតមិនច្បាស់លាស់ រារែក ចង់បន្តិចអត់បន្តិច គិតថាធ្វើតែបែរជាឈប់វិញ។
អ្នកជំនួញអចលទ្រព្យរូបនេះបន្តថា អប្បគំនិតគឺការគិតនឹងធ្វើអ្វីៗ ឬគិតនឹងទៅណា ហើយប្រែជាឈប់មិនធ្វើវិញ ប៉ុន្តែបើបានសេចក្តីសុខហើយរមែងស្រវឹង ដល់ពេលជួបឧបសគ្គក៏ដល់នូវការវង្វេង។
បើតាមការកត់សម្គាល់របស់ឧកញ៉ា អ្នកដែលមានគំនិតខ្លី កាលបើបានសេចក្ដីសុខ និងទុក្ខព្រួយចូលមកដល់ ក៏រមែងនឹងញាប់ញ័រ ដូចត្រីចាប់ពីទឹកគប់មកលើគោកហាលវាលក្តៅដូច្នេះឯង។
បុគ្គលនោះ ប្រៀបបានទៅនឹងទឹកសមុទ្រដែលមិនអាចហួសច្រាំងបាន កាលបើបានដល់ច្រាំងហើយ តែងបែកធ្លាយទៅ បើទោះដឹងថាសមុទ្រមានទំហំធំ ល្វឹងល្វើយក៏ដោយ។ ផ្ទុយទៅវិញ គំនិតយើងក៏ដូច្នោះដែរ មិនអាចកន្លងហួសពីការវង្វេងឡើយ។ អ្នកមានសម្បត្តិ មិនអាចរំលងនូវអ្នកមានគំនិតបានទេ។ ដ្បិតថា ការវិនិច្ឆ័យបញ្ហាសំខាន់ៗ គឺត្រូវឋិតនៅក្នុងការបើកទំព័រនៃអ្នកមានគំនិតហ្នឹងឯង។
ឈានដំណើរមកដល់សតវត្សន៍ទី២១ នៃជំនាន់ឧស្សាហកម្ម ៤.០ នេះ អ្នកជំនួញដែលមានងារជាឧកញ៉ារូបនេះក៏បានក្រើនរំលឹកដល់អ្នកមានគំនិត ត្រូវតែហ៊ានសម្រេចចិត្តនឹងធឹងក្រាស់ដូចផែនដី ដោយទាញហេតុផលដទៃមកបំបែកទ្រឹស្តី៕
