អ្នកដំណើរដែលធ្វើដំណើរឆ្លងកាត់ផ្លូវជាតិលេខ ៤ ចាប់ពីត្រង់គីឡូម៉ែត្រលេខ ១៥៨ នឹងប្រទះឃើញវាលចម្ការដូងប្រេងដ៏ធំល្វឹងល្វើយដាច់កន្ទុយភ្នែក ដែលគេស្គាល់របស់អ្នកឧកញ៉ា ម៉ុង ឫទ្ធី សេដ្ឋីកសិកម្មដ៏ល្បីល្បាញក្នុងប្រទេស។
បើនិយាយផ្ទៃដីចម្ការដូងប្រេងរបស់សេដ្ឋីកសិកម្មរូបនេះគឺរាប់ចាប់ពីបង្គោលគីឡូម៉ែត្រលេខ ១៥៨ ដល់គីឡូម៉ែត្រលេខ១៧១ សរុបចម្ងាយផ្លូវមិនក្រោម ១៣ គីឡូម៉ែត្រនោះទេ។
ឆ្នាំ២០២២ គំរប់ខួប២៧ឆ្នាំដែលអ្នកឧកញ៉ាបានចាប់ផ្តេីម វិនិយោគទុនលេីដំណាំកសិកម្ម កសិឧស្សាហកម្មជាពិសេសលើការដាំដុះចម្ការដូងប្រេង នៅតាមបណ្ដោយផ្លូវជាតិលេខ៤ ស្ថិតនៅស្រុកព្រៃនប់ ដែលបច្ចុប្បន្នបានក្លាយជាក្រុមហ៊ុនដាំដុះដូងប្រេងធំជាងគេនៅកម្ពុជា និងជាប់លំដាប់ទី ៤នៅអាស៊ីអាគ្នេយ៍។
រយៈពេលប្រឡូកមជាង ២០ ឆ្នាំ លើការវិនិយោគអភិវឌ្ឍន៍វិស័យកសិកម្ម កសិឧស្សាហកម្មពហុវិស័យរួមទាំងការដាំដុះដំណាំដូងប្រេងរាប់ម៉ឺនហិកតា អ្នកឧកញ៉ាប្រាប់ថាគ្មានអ្វីក្រៅពីចង់ចូលរួមចំណែកកាត់បន្ថយភាពក្រីក្ររបស់ប្រជាពលរដ្ឋជាមួយរាជរដ្ឋាភិបាល។
បើតាមអ្នកជំនួញជើងចាស់បានរំលឹករយៈពេល ២៧ ឆ្នាំក្នុងការធ្វើកសិកម្មគឺតាំងពីលោកមានអាយុទេីបតែ ៤០ ឆ្នាំ ឥលូវនេះចូលដល់វ័យ ៦៨ ឆ្នាំហេីយ ដែលលោកបានពុះពារដាំដុះវិស័យមួយដែលអ្នកមានៗភាគច្រើនមិនសូវចង់ប្រឡូក ដោយសារប្រើទុនធំចំណាយពេលយូរ ហើយបានផលមិនសមកម្លាំង។
ដោយនឹកសញ្ជឹងគិតនៅថ្ងៃខាងមុខ អ្នកឧកញ៉ាបង្ហើបថា មិនដឹងលោកអាចរស់នៅបាន ១០ ឆ្នាំប៉ុន្មានដងទៀតទេ។ ប្រហែលជាមិនអាចរស់នៅរហូតដល់សម្រេចបានតាមគោលបំណង១០០% បានទេ បេីពេលនេះលោកទេីបតែសម្រេចគោលបំណងបានតែត្រឹម ៥០% តែប៉ុណ្ណោះ។
អ្នកឧកញ៉ាបន្តថា អ្វីៗទាំងអស់អាស្រ័យទៅលេីព្រះលោកកំណត់ ត្រឹមណាបានត្រឹមហ្នឹង។ ប៉ុន្តែលោកនៅតែមានសង្ឃឹមយ៉ាងមុតមាំថា អ្នកបន្តវេនទាំងអស់ ពិតជាយល់ព្រមកាត់បន្ថយនូវអំពេីលោភលន់ហួសប្រមាណ ងាកមករួមគ្នាចូលរួមចំណែកអភិវឌ្ឍន៍បន្តវេន ដេីម្បីឲ្យប្រទេសជាតិរីកចម្រើនជឿនលឿនលេីវិស័យកសិកម្ម កសិឧស្សាហកម្មដូចអរិយប្រទេស កាត់បន្ថយការនាំចូលរហូតដល់សូន្យ ផ្លាស់ប្ដូរជីវភាពរស់នៅរបស់ប្រជាពលរដ្ឋពីផ្ទះស្លឹក មករស់នៅផ្ទះថ្មពីកង្ហារមកប្រេីម៉ាស៊ីនត្រជាក់ ពីធ្វើការហាលភ្លៀងហាលខ្យល់រងារញ័រញាក់រងផ្គររន្ទះ មកធ្វើការនៅក្នុងម្លប់មានអាហារបីពេល មានមន្ទីរពេទ្យ សាលាអោយកូនរៀនជាដើម។
អ្នកឧកញ៉ាដែលមានប្រវត្តិជាក្មេងវត្ត ក៏អំពាវនាវដល់អ្នកដែលមានលទ្ធភាពសូមមេត្តាជួយចូលរួមចំណែក កសាងអភិវឌ្ឍន៍ជាតិលេីវិស័យកសិកម្ម កសិឧស្សាហកម្មអោយបានកាន់តែច្រេីន តែបេីមិនបានចូលរួមចំណែកទេសូមមេត្តាកុំរំខានដល់អ្នកវិនិយោគ៕
