នៅរសៀលថ្ងៃទី០៥ ខែកក្កដា ឆ្នាំ២០២២នេះ បុរី វិមានសំណាង របស់ឧកញ៉ាបណ្ឌិត គីម ហ៊ាង ដែលជាបុរីមានវីឡាស័ក្តិសមឥតខ្ចោះសម្រាប់គ្រួសារអភិជន បានចុះហត្ថលេខាលើអនុស្សណៈនៃការយោគយល់គ្នា (MOU) ជាមួយធនាគារ ហ្វីលីព ភីអិលស៊ី ដើម្បីជាការសហការគ្នាបង្កើតលទ្ធភាពហិរញ្ញវត្ថុ សម្រាប់ម្ចាស់គេហដ្ឋាន ធ្វើជាម្ចាស់វីឡាប្រណិតនៅភាគខាងជើង នៃរាជធានីភ្នំពេញ។
ពិធីចុះហត្ថលេខាដែលធ្វើឡើងនៅការិយាល័យកណ្តាលបុរី វិមានសំណាង ស្ថិតនៅលើមហាវិថីឈ្នះ-ឈ្នះ សង្កាត់ព្រែកព្នៅ ខណ្ឌព្រែកព្នៅនេះ លោក ចាន់ ម៉ាច អគ្គនាយកធនាគារ ហ្វីលីព បានមានប្រសាសន៍ថា ភាពជាដៃគូនេះ នឹងក្លាយជាព្រឹត្តិការណ៍ដ៏សំខាន់មួយទៀត ក្នុងការផ្តល់ជូនអតិថិជននូវកម្ចីទិញផ្ទះតម្លៃសមរម្យជាមួយនឹងការផ្តល់ហិរញ្ញប្បទានរហូតដល់ ៨០% ដោយមានរយៈពេលកម្ចីរហូតដល់ ២៥ឆ្នាំ និងសេវារត់ការឯកសារត្រឹមតែ ០,៥%។
លោកឧកញ៉ា គីម ហ៊ាង អគ្គនាយកបុរី វិមានសំណាង ក៏បានមានប្រសាសន៍ផងដែរថា៖ “យើងមានសេចក្តីរំភើបរីករាយដែលបានសហការជាមួយធនាគារ ហ្វីលីព ដើម្បីបន្ថែមភាពរីករាយដល់អតិថិជនរបស់យើង ជាមួយនឹងលក្ខខណ្ឌហិរញ្ញវត្ថុដ៏អស្ចារ្យ សម្រាប់គម្រោងរបស់យើង។ យើងចាត់ទុកបុរី វិមានសំណាង ជាសហគមន៍ដ៏សំខាន់មួយ ហើយមានអ្នកវិនិយោគដែលមានទេពកោសល្យជាច្រើនកំពុងស្វែងរកការតាំងទីលំនៅនៅទីនេះ។ យើងទទឹងរង់ចាំការផ្តល់ជូនដល់អ្នករស់នៅក្នុងបុរី វិមានសំណាង នូវការអភិវឌ្ឍន៏ដ៏លេចធ្លោ និងផ្តាច់មុខ”។
ធនាគារ ហ្វីលីព ភីអិលស៊ី ផ្តល់ជូននូវសេវាកម្មហិរញ្ញវត្ថុ និងផលិតផលជាច្រើនប្រភេទ ដែលបម្រើដល់អតិថិជនសាជីវកម្ម សហគ្រាសធុនតូច និងមធ្យម និងលក់រាយ។ ធនាគារ ហ្វីលីព ជាសមាជិករបស់ Phillip Capital Group ដែលមានទីស្នាក់កណ្តាលនៅប្រទេសសិង្ហបុរី ហើយត្រូវបានបង្កើតឡើងតាំងពីឆ្នាំ១៩៧៥។ ធនាគារ ហ្វីលីព ភីអិលស៊ី ជាធនាគារតែមួយគត់នៅក្នុងប្រទេសកម្ពុជា ដែលមានភាគទុនិកជនជាតិសិង្ហបុរី និងមានសាខាច្រើនជាង ៧០ នៅទូទាំងប្រទេស។
សូមបញ្ជាក់ផងដែរថា បុរី វិមានសំណាង ជាការអភិវឌ្ឍន៍គម្រោងអចលនទ្រព្យលំដាប់ខ្ពស់ដំបូងគេ ដែលនាំមកនូវតុល្យភាពនៃធម្មជាតិ និងលំដាប់ថ្នាក់ខ្ពស់ ដោយផ្តោតលើឧត្តមភាពដល់ឧស្សាហកម្មអចលនទ្រព្យ។ គម្រោង បុរី វិមានសំណាង សាងសង់លើផ្ទៃដី ២៥ ហិកតា ស្ថិតនៅលើមហាវិថីឈ្នះឈ្នះ ខាងជើងក្រសួងរៀបចំដែនដី នគរូបនីយកម្ម និងសំណង់ ប្រមាណ ២៥០០ ម៉ែត្រ។ គម្រោងដ៏ធំស្កឹមស្កៃ របស់ប្រធាន KW Cambodia រូបនេះ បណ្ដុំទៅដោយផ្ទះវីឡាលំដាប់អភិជន សរុបមានជាង ៤៥០វីឡា ដូចជា Royal Villa, King Villa Queen Villa និង Prince Villa ជាដើម៕
