ឧកញ៉ា ហេង បូរិន បរិច្ចាគថវិកា ២,០០០ដុល្លារ ជូនរាជរដ្ឋាភិបាលក្នុងយុទ្ធនាការកម្ពុជាគ្មានមីន ឆ្នាំ២០២៥

តបតាមការអំពាវនាវរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា, ឧកញ៉ា ហេង បូរិន ស្ថាបនិកក្រុមហ៊ុន បុរី ហេង បូរិន គ្រុប និងក្រុមគ្រួសារ បានចូលរួមបរិច្ចាគថវិកាចំនួន ២,០០០ដុល្លារ ជូនដល់រាជរដ្ឋាភិបាលកម្ពុជា ដើម្បីដោះស្រាយបញ្ហាមីន នៅទូទាំងប្រទេសកម្ពុជា។

សកម្មភាពចូលរួមបរិច្ចាគថវិកា ពីសំណាក់អ្នកឧកញ៉ា លោកឧកញ៉ា និងអ្នកមានធនធាននៅកម្ពុជា បានកើតឡើងយ៉ាងផុសផុលបន្ទាប់ពីសម្តេចតេជោ ហ៊ុន សែន អំពាវនាវដល់វិស័យឯកជននានា ដែលមានបំណងចូលរួមជាមួយរាជរដ្ឋាភិបាល ក្នុងយុទ្ធនាការបោសសំអាតមីននៅកម្ពុជា។

ការអំពាវនាវរបស់សម្តេចធ្វើឡើងបន្ទាប់ពី សម្តេចទទួលបានរបាយការណ៍ពីស្ថានភាព នៃការគំរាមកំហែងយ៉ាងខ្លាំងដោយគ្រាប់មីនចំពោះប្រជាពលរដ្ឋ ក្នុងឱកាសសម្តេចអញ្ជើញលែងកូនត្រី នៅឃុំប៉ោយចារ ស្រុកភ្នំស្រុក ខេត្តបន្ទាយមានជ័យ នៅព្រឹកថ្ងៃទី០១ ខែកក្កដា ឆ្នាំ២០២២៕