នៅថ្ងៃទី០៧ ខែកញ្ញា ឆ្នាំ២០២២នេះ ឧកញ៉ាបណ្ឌិត គីម ហ៊ាង ម្ចាស់គម្រោងលំនៅឋានលំដាប់អភិជន បុរី វិមានសំណាង បានប្រកាសពីគោលបំណងរបស់ខ្លួន ចង់សាងសង់ «វិមានសំណាង ថោន» នៅប្រទេសកម្ពុជា ឱ្យបានលើសពី ១២ទីតាំង សម្រាប់អ្នកស្នាក់នៅ និងអ្នកធ្វើអាជីវកម្មជាង ៥០ម៉ឺននាក់ នៅមុនឆ្នាំ២០៤២។
លោកឧកញ៉ា បានបង្ហោះសារលើបណ្តាញសង្គម នៅថ្ងៃពុធនេះថា៖
១. បុរី វិមានសំណាង (Borey Vimean Samnang) លើដី ២៥ហិកតា ខាងជើងក្រសួងដែនដី ២៥០០ម៉ែត្រ គឺមានតែវីឡាទោលទាំងអស់ តម្លៃចាប់ពីជាង ៤២មុឺនដុល្លារ ដល់ជាង ៥លានដុល្លារ។
២. វិមានសំណាង ថោន (Vimean Samnang Town) លើដី ៥០ហិកតា តម្លៃ ៥០០លានដុល្លារ នឹងចាប់ផ្តើមក្នុងឆ្នាំ ២០២៣ រួមមានផ្ទះអាជីវកម្ម វីឡាទោល សាលារៀន មន្ទីរពេទ្យ សណ្ឋាគារ ផ្សាទំនើប ខុនដូ និងកីឡាដ្ឋាន សម្រាប់មនុស្ស ២០ ០០០នាក់ស្នាក់នៅ។
៣. គ្រាន់តែចង់សង់ វិមានសំណាង ថោន នៅកម្ពុជាឱ្យបានលើសពី ១២ ទីតាំង សម្រាប់មនុស្សជាង ៥០មុឺននាក់ស្នាក់នៅ និងធ្វើអាជីវកម្ម ឱ្យបានមុនឆ្នាំ២០៤២។
ម្ចាស់បុរី វិមានសំណាង រូបនេះ បានបន្ថែមថា៖ “គីម ហ៊ាង មិនហ៊ានតូចចិត្ត ដែលម្តាយឆាប់ស្លាប់ ឪពុកអត់លុយ បងប្អូនបង្កើតនៅក្មេង តែបានសាច់ញាតិ និងមិត្តភក្តិរាប់អាន ពិសេសបាន Hollywood Club & KTV ផ្តល់ការងារឱ្យធ្វើជាអ្នករត់តុ (Waiter) និងកុដិលេខ១៨ វត្តមហាមន្រ្តី ផ្តល់ជាកន្លែងស្នាក់នៅ និងបាយបិណ្ឌបាយបាត្រ ៦ឆ្នាំ ក្នុងនាមជា និស្សិតក្មេងវត្ត។ បើ គីម ហ៊ាង អាចធ្វើបាន នោះមានន័យថា យុវជនកម្ពុជាទាំងអស់ មកពីគ្រួសារក្រីក្រ ក៏អាចធ្វើបានដូចគ្នា”។
សូមបញ្ជាក់ថា គម្រោងវិមានសំណាងថោន (Vimean Samnang Town) ដែលមានតម្លៃវិនិយោគដល់ទៅជាង ៥០០លានដុល្លារ បានកំណត់ថ្ងៃត្រៀមបុកគ្រឹះសាងសង់យ៉ាងច្បាស់លាស់ នាថ្ងៃព្រហស្បត៌ ២៤ សីហា ២០២៣។ គម្រោងនេះនឹងមានការសាងសង់ដូចជា៖ ផ្ទះអាជីវកម្ម វីឡាព្រីង វីឡាឃ្វីន និងវីឡាឃីង, ខុនដូ ផ្សារទំនើប សាលារៀន សណ្ឋាគារ មន្ទីរពេទ្យ អគារការិយាល័យ កន្លែងរៀបចំជប់លៀង អាពាហ៌ពិពាហ៌ និងសាលប្រជុំ។ លោកឧកញ៉ា គីម ហ៊ាង បញ្ជាក់ថា គម្រោងនេះត្រូវការពេល៦ឆ្នាំ ដើម្បីលក់អស់ និង ៩ឆ្នាំដើម្បីសង់បញ្ចប់ ហើយក្នុងនោះអាចផ្តល់ការងាររាប់ពាន់កន្លែង ដល់ប្រជាជនកម្ពុជា ពន្ធគ្រប់ប្រភេទ រាប់សិបលានដុល្លារ ដល់រាជរដ្ឋាភិបាលកម្ពុជា មុខរបររាប់រយ ដល់អ្នករស់នៅក្នុងសហគមន៌ ហើយក៏ជាលំនៅដ្ឋានដល់ប្រជាជនរាប់ម៉ឺននាក់៕
