ឧកញ៉ាបណ្ឌិត គីម ហ៊ាង ម្ចាស់បុរី វិមានសំណាង បានបង្ហាញពីការយល់ឃើញចំពោះស្ថានភាពវិស័យអចលនទ្រព្យ នៅប្រទេសកម្ពុជា នៅឆ្នាំ២០២២នេះ។
លោកឧកញ៉ា បានលើកឡើងថា ចំពោះវិស័យខុនដូ នៅរយៈពេល៩ខែ ឆ្នាំ២០២២កន្លងទៅនេះ គឺនៅជួបបញ្ហាលំបាកនៅឡើយ ព្រោះតែទីផ្សារខុនដូពឹងផ្អែកខ្លាំងពេកលើភ្ញៀវបរទេស ដូច្នេះពេលមានបញ្ហាកូវីដ-១៩ គឺមិនសូវមានភ្ញៀវបរទេសទិញខុនដូនោះទេ។
ចំពោះវិស័យបុរីវិញ លោកឧកញ៉ា យល់ថាទោះបីមានបញ្ហាកូវីដ-១៩ និងសង្គ្រាមរុស្ស៊ី-អ៊ុយក្រែន ក៏នៅតែមានក្រុមហ៊ុនធំៗ ឬក្រុមហ៊ុនជើងចាស់ នៅតែបន្តសាងសង់ និងនៅតែលក់បានធម្មតា ប៉ុន្តែសម្រាប់បុរី ក្រុមហ៊ុនតូចៗដែលមានដើមទុនតិច គឺមានការប៉ះពាល់។ ចំណែកឯដីឡូត៍វិញ ក៏ប៉ះពាល់ក្នុងការលក់ផងដែរ ដោយសារតែបញ្ហាកូវីដ-១៩ ធ្វើឱ្យប៉ះពាល់ដល់ចំណូលរបស់ប្រជាជនដែលមានជីវភាពមធ្យមជាច្រើន ដូចជាកម្មកររោងចក្រ ឬអ្នកធ្វើការនៅផ្នែកឧស្សាហកម្ម ឬសេវាកម្ម ជាដើម ដូច្នេះទើបធ្វើឱ្យសកម្មភាពទិញ-លក់ ដីឡូត៍ មានការធ្លាក់ចុះ។
សូមបញ្ជាក់ផងដែរថា បុរី វិមានសំណាង របស់ឧកញ៉ាបណ្ឌិត គីម ហ៊ាង ដែលជាបុរីលំដាប់អភិជន ពុំមានការប៉ះពាល់ពីបញ្ហាកូវីដ-១៩ ឬសង្គ្រាមរុស្ស៊ី-អ៊ុយក្រែន អ្វីគួរឱ្យកត់សម្គាល់នោះទេ ផ្ទុយទៅវិញ បុរីរបស់លោក កាន់តែបង្កើនល្បឿននៃការសាងសង់។ បុរី វិមានសំណាង ស្ថិតនៅខាងជើងក្រសួងដែនដី ២៥០០ ម៉ែត្រ សាងសង់លើដី ២៥ហិកតា ជាវីឡាព្រីនបែបក្លាសិក វីឡាឃ្វីនបែបក្លាសិក និងជាវីឡាឃីងបែបក្លាសិក ឬបែបបារាំង ដែលចំណាយថ្លៃសាងសង់ច្រើនជាង និងប្រណិតជាងការសាងសង់វីឡាបែបទំនើបនានា។ បុរី មានសួនច្បារ កន្លែងហាត់ប្រាណ កន្លែងលេងកីឡា ផ្លូវធំ ដើមឈើច្រើន និងព្រែកធម្មជាតិ ស្មើជិត ៤០% នៃផ្ទៃដីសរុប ដែលសាកសមបំផុត សម្រាប់គ្រួសារអភិជនកម្ពុជាស្នាក់នៅប្រចាំថ្ងៃ៕
