ឧកញ៉ា ឡាង ទីលាង អគ្គនាយកក្រុមហ៊ុន ធីអិល (ខេមបូឌា) និងជាម្ចាស់គម្រោង បុរី ទីលាង ដង្កោ ហ្គ្រីនផាក ត្រូវបានអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា ទទួលឱ្យក្លាយជាសមាជិកថ្មីរបស់សមាគមអ្នកអភិវឌ្ឍន៍លំនៅឋានកម្ពុជាមួយរូបទៀត។
លោកឧកញ៉ា ឡាង ទីលាង គឺជាម្ចាស់ បុរី ទីលាង ដង្កោ ហ្រ្គីនផាក មានទីតាំងស្ថិតនៅលើផ្លូវព្រៃស ភូមិព្រៃវែងខាងកើត ខណ្ឌដង្កោ រាជធានីភ្នំពេញ។ លោកឧកញ៉ា បានចាប់ផ្ដើមគម្រោងនេះឡើងនៅថ្ងៃទី១៥ ខែធ្នូ ឆ្នាំ២០២០ នៅលើផ្ទៃដី ២៥ហិកតា ដែលធំជាងគម្រោងនានានៅក្នុងតំបន់ និងជាគម្រោងដែលមានទីតាំងល្អ បរិយាកាសស្រស់ស្រាយ។ បុរី ទីលាង ដង្កោ ហ្រ្គីនផាក ជាគម្រោងអភិវឌ្ឍលំនៅឋានច្រើនប្រភេទមានដូចជា៖ វីឡាទោល, វីឡាភ្លោះ, វីឡាកូនកាត់ និងផ្ទះអាជីវកម្ម ជាដើម។
សូមជម្រាបថា សមាគមអ្នកអភិវឌ្ឍន៍លំនៅឋានកម្ពុជា ត្រូវបានទទួលស្គាល់ជាផ្លូវការពីរាជរដ្ឋាភិបាលកម្ពុជា តាមរយៈសេចក្តីសម្រេចរបស់ក្រសួងមហាផ្ទៃលេខ ៩៨៥៧ប្រក ចុះថ្ងៃទី១៣ ខែវិច្ឆិកា ឆ្នាំ២០១៥ និងទទួលបានការគាំទ្រយ៉ាងខ្លាំងពីសំណាក់ក្រុមហ៊ុនអ្នកវិនិយោគ វិស័យអភិវឌ្ឍន៍លំនៅឋាន ដើម្បីទ្រទ្រង់សមាគមឲ្យមានសកម្មភាព ដោយមានអ្នកឧកញ៉ា លី ហួរ ជាប្រធានសមាគម។
ឧកញ៉ាល្បីៗក្នុងវិស័យលំនៅឋាន និងអចលនទ្រព្យ ដែលចូលរួមក្នុងការដឹកនាំសមាគមរួមមាន៖ អ្នកឧកញ៉ា ហុង ពីវ (ប្រធានកិត្តិយស), អ្នកឧកញ៉ា លី យ៉ុងផាត់ (ឧត្តមទីប្រឹក្សា) រួមទាំងអនុប្រធានសមាគមជាង១០រូបដូចជា អ្នកឧកញ៉ា សៀ ឬទ្ធី, ឧកញ៉ា ថៃ ជាហួត, អ្នកឧកញ៉ា លាង ឃុន, អ្នកឧកញ៉ា លាង ម៉េង, ឧកញ៉ា លីហុង, ឧកញ៉ា ប៊ុន ហៃ, ឧកញ៉ា ជាម ឃុនណាត, ឧកញ៉ា តាំង គួង, ឧកញ៉ា ចាប ហុងលី, ឧកញ៉ា លី សេងឃាង, ឧកញ៉ា តេង ហឿង និងលោកជំទាវ ខា ឡេង ជាដើម៕
