ក្រៅពីកាន់ការងារជាអនុប្រធានកិត្តិយសសាខាខេត្តព្រះសីហនុហើយនោះ ឧកញ៉ា រតនៈ សម្បត្តិ ជាពាណិជ្ជករខ្មែរដែលរកស៊ីក្នុងវិស័យម្ហូបអាហារ ភេសជ្ជៈ បដិសណ្ឋារកិច្ច និងអចលនទ្រព្យម្នាក់មានភាពលេចធ្លោក្នុងខេត្តព្រះសីហនុ។
លោកឧកញ៉ាជាប្រធានក្រុមហ៊ុន Kong Pong Devaresort, The Rich Resort, ក្រុមហ៊ុន ក្រោន អីស្ទេត ខូអិលធីឌី និងភោជនីយដ្ឋានម្លប់ជ្រៃប៉ោកី ខេត្តព្រះសីហនុ។
ឧកញ៉ា រតនៈ សម្បត្តិ កាលពីឆ្នាំ២០០២ បានបរិច្ចាគដីចំនួនប្រមាណជាង ១០ហិចតា ទៅឱ្យគណៈកម្មការជាតិអភិវឌ្ឍន៍តំបន់ឆ្នេរសមុទ្រ និងរដ្ឋបាលខេត្តព្រះសីហនុ ដើម្បីរៀបចំជាលម្អឆ្នេរសមុទ្រសាធារណៈបម្រើឱ្យវិស័យទេសចរណ៍។
![](https://www.oknha.news/wp-content/uploads/2022/11/CAD8754B-44AE-45C2-9F8E-C846BE45B002-953x1024.jpg)
ក្នុងការផ្ទេរដីដាច់ដោយឡែកមួយនៅស្រុកព្រៃនប់ ខេត្តព្រះសីហនុ ឧកញ៉ា រតនៈ សម្បត្តិ ទទួលបានដី៩៤ហិកតា ដែលកាលពីមុនត្រូវបានកំណត់ជាគម្របព្រៃឈើ ក្នុងឃុំបិតត្រាង។ មួយសប្ដាហ៍មុនពេលសម្តេចតេជោនាយករដ្ឋមន្ត្រី ហ៊ុន សែន ចុះហត្ថលេខាលើអនុក្រឹត្យនៅថ្ងៃទី២០ ខែឧសភា ឆ្នាំ២០២២ លោកឧកញ៉ាបានបរិច្ចាគថវិកាចំនួន ២ម៉ឺនដុល្លារដល់សាខាកាកបាទក្រហមកម្ពុជាខេត្តព្រះសីហនុ៕