អ្នកឧកញ៉ា គួច ម៉េងលី ស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន បានផ្តល់ជាអនុសាសន៍ថា លើលោកនេះ នរណាក៏ចង់មានចង់បានដែរ តែកុំតក់ក្រហល់ចង់រកស៊ីខ្លាំងពេក ពោលគឺត្រូវរៀនឱ្យចប់ ចេញធ្វើការឱ្យឆ្អិន និងមានបទពិសោធន៍ឱ្យបានច្រើនជោគជាំសិន នោះអាចចេញទៅរកស៊ីតែពីរទៅបីឆ្នាំ នឹងក្លាយជាអ្នកមានហើយ។
ម្ចាស់សាលារៀន អន្តរទ្វីបអាមេរិកកាំង (AIS) និងមជ្ឈមណ្ឌលភាសា អេអាយអាយ (Aii) បានលើកឡើងតាមរយៈទំព័រហ្វេសប៊ុករបស់លោក កាលពីថ្ងៃព្រហស្បតិ៍ម្សិលមិញ យ៉ាងដូច្នេះថា៖ “ម្ង៉ៃៗ ខ្ញុំចេះតែឆ្ងល់! ខ្ញុំឆ្ងល់ត្រង់ថា ក្មួយៗមួយចំនួនរៀនមិនទាន់ចប់ផង ជំនាញក៏គ្មាន បទពិសោធក៏មិនទាន់គ្រប់គ្រាន់ ហើយនាំគ្នាឈូឆរទៅរកស៊ី។ លើលោកនេះ នរណាក៏ចង់មានចង់បានដែរ ប៉ុន្តែ នេះគេហៅថា ផ្លូវកាត់។ ពេលណាក្មួយៗធ្វើផ្លូវកាត់ សូម្បីតែជោគជ័យ ក៏ជោគជ័យបណ្តោះអាសន្នដែរ។ អ៊ីចឹង ធ្វើស្អីក៏ដោយ ក្មួយៗរៀនឱ្យច្បាស់ ហើយធ្វើឱ្យច្បាស់ ដើម្បីមានគំនិតចាស់ទុំ ចេះគិតពិចារណាវែងឆ្ងាយ ចាំក្មួយៗចាប់ផ្តើមបោះទុនរកស៊ី ប៉ុន្តែឥឡូវនេះ ម្នាក់ៗហាក់ដូចជាតក់ក្រហល់ ឃ្លានចង់រកស៊ី ចង់ធ្វើធំ ចង់មានចង់បានភ្លាមៗពេក”។
អ្នកឧកញ៉ា បានបន្ថែមថា នរណាក៏គេចង់មានដែរ ប៉ុន្តែយើងត្រូវឱ្យឱកាសខ្លួនឯង ឱ្យពេលវេលាខ្លួនឯង ហើយបន្ទុំខ្លួនឯងឱ្យទុំសិន។ ទុំគឺមានន័យថា រៀនឱ្យចប់ ធ្វើការឱ្យឆ្អិន ដើម្បីយកបទពិសោធឱ្យបានច្រើនក្នុងជីវិត។ បើយើងមិនប៉ះអ្វីមួយរលាក មិនជាន់អ្វីមួយមុត នោះយើងមិនរឹងមាំទេ។
លោកបានសង្កត់ធ្ងន់ថា៖ “ដូច្នេះហើយ ក្មួយៗកុំតក់ក្រហល់ កុំដើរផ្លូវកាត់ឱ្យសោះ គ្រោះថ្នាក់ខ្លាំងណាស់។ បើក្មួយៗរៀនចេះ ធ្វើការឆ្អិន មានបទពិសោធជោកជាំ ពេលក្មួយទៅរកស៊ី តែពីរទៅបីឆ្នាំ ខ្ញុំធានាថាក្មួយនឹងក្លាយជាអ្នកមានហើយ”៕
