នាព្រឹកថ្ងៃអង្គារ ទី០៣ ខែមករា ឆ្នាំ២០២៣នេះ អ្នកឧកញ៉ា សុខ គង់ ប្រធានក្រុមហ៊ុន សុខា អូតែល បានអញ្ជើញអមដំណើរលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ព្រមទាំងលោកជំទាវ និងថ្នាក់ដឹកនាំក្រសួងជាច្រើននាក់ទៀត អុជធូបថ្វាយគ្រឿងសក្ការៈបូជា ដើម្បីសុំសេចក្តីសុខសេចក្តីចម្រើន ពីលោកយាយម៉ៅ និងអ្នកតាភ្នំ ស្ថិតនៅលើភ្នំបូកគោ ក្រុងបូកគោ ខេត្តកំពត។
ពិធីនេះ ធ្វើឡើងនៅមុនពេលការសម្ពោធសៀវភៅ «អាថ៌កំបាំងពីក្រោយភាពជោគជ័យរបស់ អ្នកឧកញ៉ាបណ្ឌិត សុខ គង់» និងពិធីបើកការដ្ឋានសាងសង់ព្រះពុទ្ធបដិមាខ្ពស់ជាងគេ លើពិភពលោក នៅថ្ងៃទី៤ ខែមករា ឆ្នាំ២០២៣ ស្អែកនេះ។
បើតាមឧត្ដមសេនីយ៍ផ្កាយ៣ ងិន បាណាល់ កូនប្រសារអ្នកឧកញ៉ា សុខ គង់ បានឱ្យដឹងកាលពីថ្ងៃទី០១ ខែមករា ថា សៀវភៅ «អាថ៌កំបាំងពីក្រោយភាពជោគជ័យរបស់ អ្នកឧកញ៉ាបណ្ឌិត សុខ គង់» នឹងសម្ពោធជាផ្លូវការ នាថ្ងៃទី៣ ខែមករា ឆ្នាំ២០២៣ នៅទីតាំងភ្នំបូកគោ ខេត្តកំពត។ ក្នុងពិធីសម្ពោធនេះនឹងមានការចូលរួមពីអ្នកឧកញ៉ាបណ្ឌិតផ្ទាល់ ភ្ញៀវជាតិ-អន្តរជាតិ រួមទាំងក្រុមការងារតាក់តែងនិពន្ធផងដែរ។ ជាមួយគ្នានេះកម្មវិធីក៏មានចាក់បញ្ចាំងខ្សែវីដេអូស្តីអំពីប្រវត្តិ និងសម្រង់ប្រសាសន៍សំខាន់ៗរបស់អ្នកឧកញ៉ាបណ្ឌិត សុខ គង់ ទៀតផង។
យ៉ាងណាមិញ លោកឧបនាយករដ្ឋមន្ត្រី ជា សុផារ៉ា ដំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញធ្វើជាអធិបតីក្នុងពិធីបើកការដ្ឋានសាងសង់ព្រះពុទ្ធបដិមាខ្ពស់ជាងគេ លើពិភពលោក នៅថ្ងៃទី០៤ ខែមករា តបតាមការអញ្ជើញរបស់អ្នកឧកញ៉ា សុខ គង់។
អ្នកឧកញ៉ា សុខ គង់ ប្រធានក្រុមហ៊ុនសុខាអូតែល ធ្លាប់បានបញ្ជាក់ថា ព្រះពុទ្ធបដិមានេះមានកំពស់១០៨ម៉ែត្រ ទ្រង់ភ្នែន ដែលកំពស់នេះ គិតចាប់តាំងពីបល្ល័ង្កខាងក្រោម រហូតដល់ចុងកេសារបស់ព្រះពុទ្ធបដិមា ដែលនឹងចំណាយរយៈពេលសាងសង់ចំនួន ៤ឆ្នាំ និងចំណាយប្រាក់ចន្លោះពី៣០លានដុល្លារ ទៅ៤០លានដុល្លារអាមេរិក។
អ្នកឧកញ៉ា សុខ គង់ ត្រូវបានគេស្គាល់ថា ជាពាណិជ្ជករចាស់វស្សាដ៏ជោគជ័យមួយរូប និងកំពុងក្តោបក្តាប់មុខជំនួញប្រាក់ពាន់លាននៅក្នុងដៃ ដែលលោកចាប់ផ្តើមចេញរកស៊ី ពីមាសត្រឹមតែមួយជីដោយចាប់មុខរបបជាអ្នកផលិតកង់កៅស៊ូនៅរាជធានីភ្នំពេញ។ លោកជាមហាសេដ្ឋីមួយរូប និងជាមនុស្សដ៏មានឥទ្ធិពលក្នុងចំណោមអ្នកជំនួញជាច្រើនរូបទៀត ឬអាចនិយាយបានថា ជាគ្រាប់អុកសេដ្ឋកិច្ចមួយរូប ដែលកំពុងរកស៊ីនៅប្រទសកម្ពុជា៕
