ទីលានប្រណាំងរថយន្តលំដាប់ពិភពលោករបស់លោកឧកញ៉ា ម៉ុង ឫទ្ធី ដែលសហការវិនិយោគជាមួយក្រុមហ៊ុនជប៉ុន គ្រោងនឹងបើជាផ្លូវការយ៉ាងប្រាកដបន្ទាប់ពីជំងឺឆ្លង Covid-19 ត្រូវបានបញ្ចប់ជាស្ថាពរនៅក្នុងពេលខាងមុខនេះ ។
កាលពីថ្ងៃចុងសប្ដាហ៍កន្លងទៅនេះ លោកបណ្ឌិតឧកញ៉ា ម៉ុង ឫទ្ធី បានចុះត្រួតពិនិត្យមើលសកម្មភាពរបស់លោក Yamamoto ដែលជាអ្នកជំនាញនៅក្នុងការរៀបចំទីលានប្រណាំងរថយន្តលំដាប់ពិភពលោក រួមជាមួយដៃគូ ជាពិសេស ត្រួតពិនិត្យទៅលើរថយន្តប្រណាំង ដែលគ្រោងនឹងបើកសម្ភោធនៅក្រោយពេលជំងឺឆ្លង Covid -19 ផុតរលត់ទៅវិញក្នុងឆ្នាំ២០២០នេះ ។
ជាមួយនឹងការបើកសម្ពោធដាក់ដំណើរការជាផ្លូវការនៅក្នុងពេលខាងមុខនេះ ទីលានប្រណាំងរថយន្តលំដាប់ពិភពលោកលើកដំបូងនៅកម្ពុជាមួយនេះ ក៏មានទទួលការរៀបចំកម្មវិធីប្រណាំងយានយន្តផ្សេងៗអាស្រ័យទៅតាមតម្រូវការរបស់ក្រុមហ៊ុនឯកជននានា ជាពិសេសមានការដាក់ជួលរថយន្តប្រណាំងបែបទំនើប ផងដែរ ប៉ុន្តែចំពោះបញ្ហាតម្លៃនៅមិនទាន់បានកំណត់ជាផ្លូវការនៅឡើយនោះទេ។
លោកឧកញ៉ាបានបញ្ជាក់ថា “សម្រាប់ពេលនេះយើងមិនអាចជួបជុំមនុស្សច្រើនបានទេ បើយើងទាំងអស់គ្នាចូលរួមការពារអនាម័យ គោរពតាមការនែនាំរបស់ក្រសួងសុខាភិបាល ក៏ដូចជាគោរពតាមការណែនាំរបស់ប្រមុខរាជរដ្ឋាភិបាលនោះមិនយូទេយើងនឹងអាចឆ្លងផុតពីការឆ្លងរីករាលមេរោគដ៏កាចសាហាវនេះ បន្ទាប់មកយើងនឹងអាចជួបជុំគ្នាដោយសេរីដូចកាលពីមុនៗវិញបានហើយ” ។
តាមការឱ្យដឹងពីលោកឧកញ៉ា ម៉ុង ឫទ្ធី កាលពីពេលកន្លងទៅបានបញ្ជាក់ថា ទីលានកីឡាយានយន្តនេះ មិនសូវទទួលបានប្រាក់ចំណេញច្រើនទេ តែវានឹងអាចធ្វើជាស្ពានចម្លងនៃកិច្ចទំនាក់ទំនង រវាងក្រុមកីឡាករនៃប្រទេសជប៉ុន-កម្ពុជា រួមជាមួយនឹងបណ្ដាប្រទេសជាច្រើនទៀតនៅលើពិភពលោក ដែលស្រឡាញ់ចូលចិត្តកីឡាយានយន្តនេះផងដែរ។ លោកឧកញ៉ាបានបញ្ជាក់ថា លោកនឹងបង្កើតព្រឹត្តិការណ៍ ឱ្យមានការជួបជុំជាមួយអ្នកស្រឡាញ់វិស័យកីឡាយានយន្ត ដោយនឹងមានការរៀបចំឱ្យបានជួបជុំគ្នាយ៉ាងហោចណាស់ក្នុងរយៈពេលមួយខែឱ្យបានម្តង។
ដោយឡែកសម្រាប់ហេដ្ឋាចនាសម្ព័ន្ធនានានៅក្នុងទីលានប្រណាំងរថយន្តលំដាប់អន្តរជាតិ ដែលមានប្រវែងសរុប ២ ២១៧ម៉ែត្រ ត្រូវបានបែងចែកជា១០ផ្នែកផ្សេងៗពីគ្នា ដូចជា ទី១-ចំណតរថយន្ត និងម៉ូតូ , ទី២-ទីធ្លារដាំដើមឈើ, ទី៣-កន្លែងតាំងពិព័រណ៍រថយន្ត និងលក់សម្ភារៈ ទី៤-ស្ថានីយ៍ប្រេងឥន្ធនៈ, ទី៥-បន្ទប់ទឹកសាធារណៈ, ទី៦-កាហ្វេ និងអាហារដ្ឋាន, ទី៧-ការិយាល័យ សេវាកម្មផ្សេង, ទី៨-កន្លែងអង្គុយទស្សនា, ទី៩-ទីលានទុកដាក់ និងជួសជុលរថយន្ត ហើយទី១០-ទីលានប្រណាំងប្រវែង ២គីឡូម៉ែត្រ។
ក្រុមហ៊ុន ម៉ុង ឫទ្ធីគ្រុប បានសហការជាមួយនឹងក្រុមហ៊ុន YAMAMOTO ROCK PRODOUCTS Co.Ltd កាលពីដើមខែមករា ឆ្នាំ២០១៩កន្លងមកនេះ បានធ្វើពិធីចុះហត្ថលេខាលើកិច្ចព្រមព្រៀងស្តីពី គំរោងសហប្រតិបត្តិការអាជីវកម្ម សាងសង់ទីលានប្រណាំងរថយន្តលំដាប់ថ្នាក់លេខ២នៅលើពិភពលោក ដែលជាគម្រោងវិនិយោគលើកដំបូងបំផុតនៅលើទឹកដី ភូមិសំរោងជើងភ្នំ ឃុំសែនដី ស្រុកសំរោងទង ខេត្តកំពង់ស្ពឺ ប្រទេសកម្ពុជា៕
ប្រភព៖https://www.propertyarea.asia
