លោកឧកញ៉ា សំ សុខនឿន ប្រធានសមាគមអចលនទ្រព្យសកល និងជាប្រធានក្រុមហ៊ុន Sam SN Realty យល់ឃើញវិស័យអចលនទ្រព្យនៅខេត្តព្រះសីហនុ នៅឆ្នាំ២០២៣នេះ នៅតែបន្តជួបស្ថានភាពលំបាកដដែល ដោយសារតែបញ្ហាអគារជាប់គាំងជាង ១០០០កន្លែង។
លោកឧកញ៉ា សំ សុខនឿន បានលើកឡើងយ៉ាងដូច្នេះថា «បើយើងនិយាយពីខេត្តព្រះសីហនុ គឺជាខេត្តដ៏មានសក្តានុពលជាងគេ ក្នុងចំណោមខេត្តផ្សេងៗ ដោយសារខេត្តនេះស្ថិតនៅតាមឆ្នេរសមុទ្រដ៏ស្រស់ស្អាត។ ដោយឡែក និយាយពីវិស័យអចលនទ្រព្យនៅពេលនេះវិញ ខេត្តព្រះសីហនុ ហាក់មានភាពស្ងប់ស្ងាត់មែនទែន ដោយសារកត្តាមួយចំនួនដូចជា ការត្រឡប់ទៅវិញរបស់ជនជាតិចិន បន្ទាប់ពីរាជរដ្ឋាភិបាលសម្រេចបិទល្បែងអនឡាន, បញ្ហាកូវីដ-១៩ ដែលធ្វើឱ្យមានភាពស្ងប់ស្ងាត់ និងមិនអាចវិនិយោគបានទាំងចិន និងសកលលោកទាំងមូល, សង្គ្រាមរុស្ស៊ី-អ៊ុយក្រែន ធ្វើឱ្យប៉ះពាល់សេដ្ឋកិច្ចពិភពលោកទាំងមូល»។
លោកឧកញ៉ាបន្តថា កត្តាទាំង៣នេះ ធ្វើឱ្យអគារមួយចំនួននៅខេត្តព្រះសីហនុ ខ្ទង់ប្រហែលជាង ១ពាន់អគារកំពុងជាប់គាំង ហើយការជាប់គាំងនេះយើងសង្កេតឃើញថា អ្នកខ្លះជាម្ចាស់ដីស្រាប់ ពេលសាងសង់អគារទៅ ជួបបញ្ហាមិនមានអ្នកជួល ដូច្នេះក៏ឈប់សាងសង់បន្ត។ ប្រភេទទី២ អគារនោះសាងសង់លើផ្ទៃដីរបស់ខ្មែរ ខ្មែរយើងជាម្ចាស់ដី ជួលដីឱ្យជនជាតិចិនជាអ្នកសាងសង់អគារ ក្នុងលក្ខខណ្ឌរយៈពេលយូរ ហើយកត្តាដែលធ្វើឱ្យជាប់គាំងពេលនេះ ដោយសារចិនដែលជាអ្នកវិនិយោគ កំពុងមានបញ្ហាផ្នែកហិរញ្ញវត្ថុ ឬក៏មានបញ្ហាផ្សេងៗ ដែលពួកគេមិនអាចបន្តការសាងសង់អគារទាំងនោះ ឱ្យចប់សព្វគ្រប់បាន។
បើតាមប្រធានសមាគមអចលនទ្រព្យសកល បានគូសបញ្ជាក់ថា ការជាប់គាំងនេះ ពិតជាលំបាកក្នុងការដោះស្រាយមែនទែន។ ទោះយ៉ាងណា ថ្មីៗនេះរាជរដ្ឋាភិបាល បានបង្កើតក្រុមការងារអន្តរក្រសួងមួយ ដើម្បីធ្វើការជួយដោះស្រាយ មានទាំងក្រសួងរៀបចំដែនដី នគរូបនីយកម្ម និងសំណង់ ក្រសួងយុត្តិធម៌ ក្រសួងសេដ្ឋកិច្ច ក្រសួងមហាផ្ទៃ រដ្ឋបាលខេត្តព្រះសីហនុ អគ្គនាយកដ្ឋានពន្ធដារ និងក្រសួងផ្សេងៗដែលពាក់ព័ន្ធ ដើម្បីរួមគ្នាធ្វើការរកវិធីដោះស្រាយ។
យ៉ាងណាមិញ ថ្មីៗនេះដែរ ប្រទេសចិនបានប្រកាស បើកជើងហោះហើរឡើងវិញ ហើយការបើកធំជាងគេ គឺការបើកនៅក្នុងស្រុក ប្រទេសចិន។ ក្នុងនោះក៏មានការបើកជើងយន្តហោះមួយចំនួន មកកាន់ប្រទេសកម្ពុជា ប៉ុន្តែតាមការអង្កេតរបស់លោកឧកញ៉ា ការមករបស់ចិនពេលនេះ មិនទាន់មានច្រើននោះទេ ហើយមកគឺមកជាលក្ខណៈទេសចរណ៍ទៀត មិនមែនមកដើម្បីវិនិយោគអចលនទ្រព្យនៅខេត្តព្រះសីហនុ ឬក៏តំបន់ផ្សេងៗនោះទេ។
ចំណែកឯតម្លៃជួលដីនៅពេលបច្ចុប្បន្ន គឺមិនអាចជួលបានតម្លៃថ្លៃដូចពេលមុននោះទេ ប៉ុន្តែម្ចាស់ដីនៅតែទាមទារថ្លៃជួលពីជនជាតិចិន ក្នុងតម្លៃដូចពីមុន ហើយបើមិនដូច្នោះទេពួកគេប្តឹងទាមទាររឹបអូសយកអគារ។ បើតាមផ្លូវច្បាប់ គឺម្ចាស់ដីមានសិទ្ធិ ប៉ុន្តែបើគិតលើគុណធម៌ ការវិនិយោគ និងការលើកទឹកចិត្តដល់ជនជាតិចិន លោកយល់ថាដំណោះស្រាយបែបនេះ គឺមិនត្រូវទេ ដូច្នេះហើយទើបរាជរដ្ឋាភិបាល បង្កើតក្រុមការងារអន្តរក្រសួង ដើម្បីជួយសម្របសម្រួលដោះស្រាយបញ្ហានេះ។ លោកឧកញ៉ាបន្ថែម។
ជាមួយគ្នានោះ លោកឧកញ៉ាក៏បានបង្ហាញការមើលឃើញថា៖ «ដរាបណាខេត្តព្រះសីហនុ នៅមិនទាន់បានដោះស្រាយបញ្ហាជាប់គាំងសរុបប្រហែល ១០០០អគារ ក្នុងនោះមានអគារខ្ពស់ៗជាង ៣០០អគារ យើងនៅតែលំបាកក្នុងការទាក់ទាញអ្នកវិនិយោគចិន មកកាន់ខេត្តព្រះសីហនុ ព្រោះថាបើយើងដោះស្រាយដោយមិនបានគិតលើការលើកទឹកចិត្តដល់ចិនទេ នោះពួកគេនឹងនាំពាក្យពីផលបំបាកទាំងនេះទៅប្រាប់ជនជាតិចិននៅប្រទេសចិន ដែលជាអ្នកវិនិយោគិនផ្សេងទៀតផងដែរ»។
ទន្ទឹមនឹងនោះលោកឧកញ៉ា សំ សុខនឿន ជឿថារាជរដ្ឋាភិបាល និងរដ្ឋបាលខេត្តព្រះសីហនុ កំពុងតែរកវិធីដោះស្រាយយ៉ាងខ្លាំង ព្រោះបញ្ហាអគារជាប់គាំងនឹងលំបាកក្នុងការដោះស្រាយមែនទែន ព្រោះបើយើងដោះស្រាយឱ្យអគារទាំងអស់ទៅម្ចាស់ដីវិញ តើអ្នកវិនិយោគជនជាតិចិន នឹងមានអារម្មណ៍បែបណា។ ជារួម សម្រាប់ទស្សនៈរបស់លោកឧកញ៉ាផ្ទាល់ នៅឆ្នាំ២០២៣នេះ វិស័យអចលនទ្រព្យខេត្តព្រះសីហនុ នៅមានភាពលំបាកដដែល ដោយសារយើងនៅមិនទាន់បានដោះស្រាយបញ្ហាអគារជាប់គាំងណាមួយបានល្អ ដើម្បីឱ្យសាធារណៈជនបានឃើញថា ជាការដោះស្រាយពិតជាមានតម្លាភាព ឬការពារលើកទឹកចិត្តដល់វិនិយោគិនជនជាតិចិន។ ដូច្នេះម្ចាស់ដីទាំងអស់ គួរតែជួយសម្របសម្រួលធ្វើយ៉ាងណា ឱ្យបានឈ្នះ-ឈ្នះទាំងអស់គ្នា ទាំងអ្នកជួលអគារ និងម្ចាស់អគារផងដែរ ហើយការដោះស្រាយបញ្ហានេះត្រូវការចូលរួមពីភាគីច្រើន និងត្រូវការពេលវេលាច្រើន។
សូមជម្រាបថា ទាក់ទងនឹងអគារជាប់គាំងជាង ១០០០កន្លែងក្នុងខេត្តព្រះសីហនុនេះ បើយោងតាមលោក ឡុង ឌីម៉ង់ អភិបាលរងខេត្តព្រះសីហនុ ធ្លាប់ប្រាប់ឱ្យដឹងថា បញ្ហាអគារជាប់គាំងនៅក្នុងខេត្តព្រះសីហនុ លោកមិនទាន់អាចជឿថា ១០០ភាគរយវានឹងអាចដោះស្រាយទំាងអស់ នៅក្នុងពេលឆាប់ៗនេះបានទេ ពីព្រោះបញ្ហាកន្លងមក វានៅមានបញ្ហាស្មុគស្មាញច្រើន ដែលត្រូវដោះស្រាយ និងទាមទារឱ្យមានគោលនយោបាយលើកទឹកចិត្តជាកញ្ចប់មួយ ដូចដែលក្រសួងសេដ្ឋកិច្ចនិងហិរញ្ញវត្ថុ ពិសេសគណកម្មការចម្រុះសម្រាប់ដោះស្រាយបញ្ហាគម្រោងវិនិយោគជាប់គំាងនៅក្នុងខេត្តព្រះសីហនុនេះ មកធ្វើការរួមគ្នា និងពិភាក្សារួមគ្នារកគោលការណ៍សមស្របមួយ ដើម្បីឈ្នះ-ឈ្នះទាំងអស់គ្នា៕
