ក្នុងដំណើរបំពេញទស្សនកិច្ច រយៈពេល៣ថ្ងៃនៅប្រទេសចិន កាលពីថ្ងៃទី១០ ខែកុម្ភៈ ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចបង្កើតប៉ូលសេដ្ឋកិច្ចទី៤ របស់កម្ពុជា គ្រប់ដណ្តប់លើខេត្តចំនួន៤ ស្ថិតនៅទិសពាយ័ព្យរួមមាន ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ និងប៉ៃលិន បន្ទាប់ពីលោក ស៊ី ជីនពីង ប្រធានាធិបតីចិន បានបង្ហាញនូវគំនិតផ្តួចផ្តើម ក្នុងការអភិវឌ្ឍកសិកម្ម និងវារីវប្បកម្ម នៅតំបន់ជុំវិញបឹងទន្លេសាប ដើម្បីបង្កើតរបៀងមច្ឆជាតិ និងអង្ករនៅភាគពាយ័ព្យរបស់កម្ពុជា។
ទាក់ទងនឹងការបង្កើតប៉ូលសេដ្ឋកិច្ចទី៤ ខាងលើនេះ លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា កន្លងមករាជរដ្ឋាភិបាលកម្ពុជា បានកំណត់ប៉ូលសេដ្ឋកិច្ចរបស់ប្រទេសកម្ពុជា ជា៣ រួមមាន ខេត្តព្រះសីហនុ ជាក្បាលនាគ រាជធានីភ្នំពេញជាខ្លួននាគ និងភូមិភាគឥសាន្ត ជាកន្ទុយនាគ។ លោកឧកញ៉ា បានបន្តថា ការកំណត់តំបន់ប៉ូលសេដ្ឋកិច្ចថ្មីមួយ (ទី៤) ដែលមានចំនួន៤ ខេត្តនៅភូមិភាគពាយ័ព្យនេះ ជាគោលដៅនិងទិសដៅនៃថ្នាក់ដឹកនាំរដ្ឋាភិបាល ក្រោយវិបត្តិកូវីដ១៩ ដែលបានចាត់ទុកវិស័យកសិកម្ម ជាវិស័យស្នូល ក្នុងការជំរុញកំណើនសេដ្ឋកិច្ច និងក្នុងបរិបទសង្គ្រាមអ៊ុយក្រែនរុស្ស៊ីនៅតែបន្តផងដែរ។
ជាមួយគ្នានេះ លោកអគ្គនាយកក្រុមហ៊ុន Heng Mean Investment Group និង An Mady Group យល់ឃើញថា ការបង្កើតប៉ូលសេដ្ឋកិច្ចទី៤ នេះ ជាគោលដៅដ៏ត្រឹមត្រូវមួយ របស់ថ្នាក់ដឹកនាំនៃរាជរដ្ឋាភិបាលកម្ពុជា ពីព្រោះប្រទេសកម្ពុជា ជាប្រទេសមួយពឹងផ្អែកលើវិស័យកសិកម្ម និងឈានដល់វិស័យកសិកឧស្សាហកម្ម ដែលទាមទារឱ្យមានការកែច្នៃផលិតផល សម្រាប់ការនាំចេញ ដើម្បីបង្កើនចំណូលថវិកាជាតិ។ លោកឧកញ៉ា បន្តលើកឡើងថា រដ្ឋាភិបាលគួរពិចារណា ក្នុងការលើកលែងពន្ធផ្សេងៗ ដូចជា ពន្ធកាត់ទុក VAT ពន្ធនាំចេញ ដើម្បីលើកទឹកចិត្ត និងទាក់ទាញការវិនិយោគលើវិស័យនេះបន្ថែម ទាំងវិនិយោគិនក្នុងស្រុក និងវិនិយោគិនមកពីក្រៅប្រទេស។
លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ ក្រុមប្រឹក្សាអភិវឌ្ឍន៍កម្ពុជា ក៏បានថ្លែងឱ្យដឹងកាលពីប៉ុន្មានថ្ងៃមុននេះផងដែរថា ប៉ូលសេដ្ឋកិច្ចទី៤ របស់កម្ពុជា នឹងផ្តោតលើការផលិត និងកែច្នៃផលិតផលកសិកម្ម កាន់តែទំនើប និងមានប្រសិទ្ធភាព។
លោករដ្ឋមន្ត្រី បានលើកឡើងយ៉ាងដូច្នេះថា៖ “យើងនឹងធ្វើការអភិវឌ្ឍន៍វិស័យកសិកម្ម វារីវប្បកម្ម តាមបែបទំនើប យើងដល់ពេលមួយ ដែលកាលពីមុននោះ យើងធ្វើកសិកម្មរបៀបគ្រួសារប៉ុណ្ណោះ។ ខេត្តទាំងនោះសុទ្ធតែមានសក្តានុពលទាំងអស់ ប៉ុន្តែយើងចង់ធ្វើយ៉ាងណា ឱ្យទំនើប ឱ្យមានប្រសិទ្ធភាព ដើម្បីមានភាពប្រកួតប្រជែងលើទីផ្សារអន្តរជាតិ ធ្វើយ៉ាងណាឱ្យផលិតផលរបស់យើងល្អជាងគេ ហើយតម្លៃសមរម្យ ដូច្នេះវារីវប្បកម្មនៅទីនោះ ការធ្វើវិស័យកសិកម្មមួយចំនួន នឹងទទួលបានការលើកកម្ពស់មួយកម្រិតទៀតផ្នែកបច្ចេកទេស ហើយតំបន់នោះនឹងមានការបង្កើត នូវរោងចក្រកែច្នៃផលិតផលកសិកម្ម កាន់តែទំនើប និងមានប្រសិទ្ធភាព”។
គួររំឭកថា ក្នុងវេទិកាជំរុញពាណិជ្ជកម្ម វិនិយោគ និងទេសចរណ៍កម្ពុជា-ចិន ដែលប្រារព្ធធ្វើឡើងនៅរដ្ឋធានីប៉េកាំង ប្រទេសចិន កាលពីយប់ថ្ងៃទី១០ ខែកុម្ភៈ ឆ្នាំ២០២៣ សម្តេចតេជោ ហ៊ុន សែន បានអំពាវនាវទៅកាន់អ្នកវិនិយោគទាំងកម្ពុជា និងចិន ឱ្យពិនិត្យលទ្ធភាពវិនិយោគនៅតំបន់ប៉ូលសេដ្ឋកិច្ចទី៤ របស់កម្ពុជា ស្ថិតនៅភាគពាយ័ព្យប្រទេសនេះ។ សម្តេចបញ្ជាក់ថា នៅតាមបណ្តាខេត្តទាំងនេះ ទទួលបានការវិនិយោគជាច្រើនរួចទៅហើយ ដូចជាវារីអគ្គិសនីនៅខេត្តពោធិ៍សាត់ ការសាងសង់ប្រព័ន្ធធារាសាស្ត្រ និងការសាងសង់បណ្តាញផ្លូវសំខាន់មួយចំនួន។ យ៉ាងណាមិញ សម្រាប់សម្តេច ការវិនិយោគនៅប៉ូលសេដ្ឋកិច្ចទី៤នេះ គឺជាឱកាសដ៏ល្អសម្រាប់អ្នកវិនិយោគ ទាំងក្នុងនិងក្រៅស្រុក៕
