អ្នកឧកញ៉ា លាង ម៉េង ប្រធានក្រុមប្រឹក្សាភិបាល នៃធនាគារ ជីប ម៉ុង ខមមើសល ប៊ែង ម.ក បានបញ្ជ្រាបកោសិកា (DNA) ផ្ទាល់ខ្លួន ទៅឱ្យបុគ្គលិកធនាគារ ជីប ម៉ុង ឱ្យមានផ្នត់គំនិត ៣យ៉ាង ទើបធនាគាររបស់លោក មានការរីកចម្រើនខ្លាំងមកទល់ថ្ងៃនេះ។
ថ្លែងក្នុងសុន្ទរកថា អ្នកឧកញ៉ា លាង ម៉េង បានលើកឡើងថា ធនាគារ ជីប ម៉ុង ផ្តោតសំខាន់លើការបណ្តុះបណ្តាលច្បាស់លាស់ ដើម្បីប្រែក្លាយធនធានមនុស្សប្រកបដោយវិជ្ជាជីវៈខ្ពស់ និងការប្តេជ្ញាចិត្តខ្ពស់ក្នុងការបំពេញភារកិច្ច ក៏ដូចជាប្រាស្រ័យទាក់ទងជាមួយអតិថិជន ដើម្បីធានាថាការផ្តល់សេវាកម្មជូនអតិថិជនមានលក្ខណៈល្អឥតខ្ចោះ ផ្ដល់ភាពងាយស្រួល ជាពិសេសផ្ដល់ទំនុកចិត្តជូនដល់អតិថិជនទាំងអស់។
អ្នកឧកញ៉ា បានបញ្ជាក់ថា ពេលដែលលោកមកកាន់ធនាគារនេះ រយៈពេល១ឆ្នាំ ពីមុនលោកជាម្ចាស់ក្រុមហ៊ុន និងជាអគ្គនាយកទៀត ហើយលោកគិតថា គួរធ្វើម៉េចដើម្បីឱ្យមនុស្សក្នុងធនាគារ មានកោសិកា (DNA) មួយ ជាផ្នែកលក់ដ៏អស្ចារ្យ។ បន្ទាប់មក អ្នកឧកញ៉ាបានព្យាយាមបញ្ជ្រាបកោសិការបស់ខ្លួនចូលទៅបុគ្គលិក ដើម្បីឱ្យពួកគាត់មានផ្នត់គំនិត៣ នៅក្នុងធនាគារ ជីប ម៉ុង។
ផ្នត់គំនិតទី១ គឺខួរក្បាលបុគ្គលិកដើររកអតិថិជនវិញ ធ្វើម៉េចដើម្បីផ្លាស់ប្តូរគំនិតដែលធ្លាប់តែគេមករកយើង យើងដើរទៅរកគេវិញ, ទី២ យើងធ្វើយ៉ាងណាដើម្បីងាយស្រួលដល់អតិថិជនបំផុត គឺឱ្យតែអ្នកមកប៉ះដៃធនាគារ ជីប ម៉ុង គឺដឹងថា សាមញ្ញ ស្រួល និងមិនមានអ្វីជាឧបសគ្គដល់ពួកគាត់ និងទី៣គឺ ទំនុកចិត្ត ធ្វើម៉េចឱ្យអ្នកនៅក្នុងធនាគារ ធ្វើបានចាំនិយាយ បើធ្វើមិនបានកុំនិយាយ ដូច្នេះពេលនោះហើយដែលធ្វើឱ្យមនុស្សទាំងអស់ មានទំនុកចិត្ត លើធនាគារ ជីប ម៉ុង ខ្លាំង ដូច្នេះទើបយើងធ្វើឱ្យមានការរីកចម្រើនរបស់ធនាគារ ជីប ម៉ុង មកដល់ថ្ងៃនេះ មិនមែនជាការចៃដន្យនោះទេ។ អ្នកឧកញ៉ា លាង ម៉េង បានសង្កត់ធ្ងន់បន្ថែម។
គួរបញ្ជាក់ថា ធនាគារ ជីប ម៉ុង បានសម្ពោធបើកបម្រើអតិថិជនជាផ្លូវការ កាលពីថ្ងៃទី២១ ខែមករា ឆ្នាំ២០១៩ និងមកដល់បច្ចុប្បន្នមានសាខា១៤ហើយ។ បេសកកម្មរបស់ ធនាគារ ជីប ម៉ុង គឺផ្តល់ដំណោះស្រាយខាងសេវាធនាគារល្អបំផុតលំដាប់ពិភពលោក ចំណាយតិច និងប្រសិទ្ធិភាពខ្ពស់។ ធនាគារ ជីប ម៉ុង បានប្រើបច្ចេកវិទ្យាដែលអាចវាស់វែងបាន តាមប្រព័ន្ធឌីជីថល ដោយអនុញ្ញាតឱ្យអតិថិជនអាចភ្ជាប់តម្រូវការក្នុងជីវិតរស់នៅប្រចាំថ្ងៃរបស់ពួកគេ មកកាន់ធនាគារ ដែលដើរតួនាទីស្នូល ក្នុងការបំពេញតាមតម្រូវការប្រចាំថ្ងៃ។ គោលដៅសំខាន់បំផុតរបស់ ធនាគារ ជីប ម៉ុង គឺសហគ្រាសខ្នាតតូច និងមធ្យម (SMEs) អាជីវកម្មលក់រាយ និងសម្រាប់ពលរដ្ឋកម្ពុជា៕
