ឧកញ៉ាបណ្ឌិត គីម ហ៊ាង ប្រធាន KW Cambodia និងជាអគ្គនាយកបុរី វិមានសំណាង រីករាយក្នុងការតំណាងក្រុមហ៊ុន KW Cambodia ដើម្បីបង្ហាញវត្តមានជាមួយនឹងថ្នាក់ដឹកនាំក្រុមហ៊ុនមកពី ៥២ប្រទេសទៀត និងធ្វើឱ្យពួកគេបានស្គាល់ប្រទេសកម្ពុជា កាន់តែច្រើន ក្នុងកម្មវិធីជួបជុំសន្និបាតរបស់ក្រុមហ៊ុន KW នៅសហរដ្ឋអាមេរិក។
លោកឧកញ៉ាបណ្ឌិត បានថ្លែងឱ្យដឹងថា ពួកយើងគ្រាន់តែចង់បង្ហាញដល់មិត្តភ័ក្តិមកពី ៥២ប្រទេស និងពិភពលោកថា ពួកយើងមកពីកម្ពុជា។ ក្នុងដំណើរបេសកកម្មនេះ លោកឧកញ៉ា ក៏គ្រោងនឹងនាំចូលក្រុមហ៊ុន ផ្នែកបច្ចេកវិទ្យាធំមួយទៀតពីសហរដ្ឋអាមេរិក មកកាន់ប្រទេសកម្ពុជា ក្នុងពេលឆាប់ៗខាងមុខនេះផងដែរ។
សូមជម្រាបជូនថា លោកឧកញ៉ាបណ្ឌិត គីម ហ៊ាង បានដឹកនាំក្រុមការងារក្រុមហ៊ុន KW Cambodia សរុបចំនួន ១៧រូប ចាកចេញពីកម្ពុជា កាលពីអធ្រាត្រឈានចូលថ្ងៃទី១៦ ខែកុម្ភៈ ឆ្នាំ២០២៣ ដើម្បីចូលរួមកម្មវិធី KW Family Reunion ប្រចាំឆ្នាំ២០២៣ នៅ Anaheim Convention Center នារដ្ឋ California សហរដ្ឋអាមេរិក ចាប់ពីថ្ងៃទី១៨-២១ ខែកុម្ភៈ ឆ្នាំ២០២៣ ដែលមានសមាជិកចូលរួមសរុបប្រមាណជាង ២ម៉ឺននាក់ មកពី ៥២ប្រទេស និង ៥ទ្វីបលើពិភពលោក។
ក្នុងកម្មវិធីជួបជុំមហាគ្រួសារ KW World Wide ប្រចាំឆ្នាំ២០២៣ នាទឹកដីសហរដ្ឋអាមេរិចនេះ រួមមានវេទិកានៃចែករំលែកបទពិសោធន៍ពីអ្នកជំនាញអចលនទ្រព្យល្បីៗ ឱកាសនៃសាងបណ្ដាញជាមួយភ្នាក់ងារអចលនទ្រព្យអន្តរជាតិមកពីប្រទេសផ្សេងៗ និងការស្វែងយល់ស៊ីជម្រៅ ពីបច្ចេកវិទ្យាទំនើបៗចុងក្រោយបង្អស់ ដែលកំពុងដាក់ដំណើរការប្រើប្រាស់ក្នុងវិស័យអចលនទ្រព្យ ហើយនេះជាកិត្តិយសដ៏ធំធេងមួយ ដែលប្រទេសកម្ពុជាយើង មានអ្នកតំណាងចូលរួម៕
