អ្នកឧកញ៉ា គួច ម៉េងលី ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន យល់ឃើញថា ចំណេះដឹងគឺប្រសើរជាងថ្នាំពេទ្យ ព្រោះចំណេះដឹងអាចនឹងជួយឱ្យយើងចេះការពារខ្លួន និងថែរក្សាសុខភាពបានល្អពេញមួយជីវិត។
អ្នកឧកញ៉ា វេជ្ជបណ្ឌិត បានលើកឡើងថា ចំណេះដឹងប្រសើរជាងថ្នាំពេទ្យ ត្រង់ថានៅពេលយើងចេះដឹងទៅ យើងនឹងចេះការពារ ចេះរស់នៅដោយសុខភាពល្អ ចេះអនាម័យ ចេះទុកដាក់ ចេះទៅពិនិត្យសុខភាព។ល។ បើយើងជាអ្នកអប់រំ យើងយល់ ដល់ខែយើងនឹងទៅពិនិត្យសុខភាព ហើយញ៉ាំរបស់ ដែលមានគុណភាព មានអនាម័យត្រឹមត្រូវតាមក្បួនវេជ្ជសាស្ត្រជាដើម។
អ្នកឧកញ៉ា បានបន្ថែមថា បើយើងជាអ្នកអប់រំ យើងយល់ដឹងទាំងអស់ហ្នឹង អំពីការទុកដាក់ ការរស់នៅ ភាពថ្លៃថ្នូរ សុខភាពល្អ ហើយដឹងរបស់ណាគួរញ៉ាំនិងរបស់ណាមិនគួរញ៉ាំ។ ចំណេះដឹង គឺព្យាបាលជំងឺ ១០០ទៅ១០០០ជំពូក ប៉ុន្តែថ្នាំពេទ្យជួយព្យាបាលយើងបានតែមួយជំពូកប៉ុណ្ណោះ។
ជាមួយគ្នានេះ អ្នកឧកញ៉ា បានផ្តាំផ្ញើថា ដូច្នេះហើយ សូមចងចាំថា ថ្នាំពេទ្យមិនអាចជួយព្យាបាលយើងគ្រប់ពេលនោះទេ តែការអប់រំពិតប្រាកដអាចជួយយើងបាន។ ទីណាមានចំណេះដឹង ទីនោះមានសន្តិភាព ហើយទីណាមានសន្តិភាព ទីនោះនឹងមានភាពរីកចម្រើននិងអភិវឌ្ឍន៍ជឿនលឿន។ សូមចូលរួមវិនិយោគលើការសិក្សាអប់រំទាំងអស់គ្នា ដើម្បីចៀសឆ្ងាយពីជំងឺអវិជ្ជា។
គួរបញ្ជាក់ថា អ្នកឧកញ៉ា គួច ម៉េងលី ជាបុគ្គលមួយរូប ដែលតែងតែឱ្យតម្លៃខ្លាំងលើការអប់រំ ខណៈដែលអ្នកឧកញ៉ា ជាម្ចាស់សាលារៀន អន្តរទ្វីបអាមេរិកកាំង (AIS) និងមជ្ឈមណ្ឌលភាសា អេអាយអាយ (Aii)។ អ្នកឧកញ៉ា គួច ម៉េងលី បានបញ្ចប់ការសិក្សាថ្នាក់វិទ្យាល័យនៅសហរដ្ឋអាមេរិក ហើយនៅឆ្នាំ២០០៧ ហើយលោកក៏បានបញ្ចប់ថ្នាក់អនុបណ្ឌិតផ្នែករដ្ឋបាលសាធារណៈ ពីសាកលវិទ្យាល័យ Massachusetts ទីក្រុង Amherst សហរដ្ឋអាមេរិក ផងដែរ៕
