ក្នុងការគ្រប់គ្រងរដ្ឋតាំងពីដើមរៀងមក មន្ត្រីរាជការតូចធំ សុទ្ធតែមានងារសម្រាប់តំណែងរបស់ខ្លួនទៅតាមកម្រិតឋានៈតួនាទី។ ក្នុងនោះ ងារមួយដែលគួរឱ្យចាប់អារម្មណ៍គឺ «តេជោ»។ ក្នុងវចនានុក្រមខ្មែរ បានពន្យល់មេពាក្យថា តេជ [អានថា ដែច] បា.សំ (ន) (តេជស) មានន័យថា អំណាច, កម្លាំង, កម្តៅ, ភ្លើង ។ល។
យោងតាមឯកសារព្រះរាជពង្សាវតារក្រុងកម្ពុជាធិបតីឆ្នាំ១៩៣៤ បោះពុម្ភឆ្នាំ២០២១ ដោយពុទ្ធសាសនបណ្ឌិត្យ បានប្រមូលស្រង់ងារដែលមានពាក្យ «តេជោ» គិតតាំងពីការកកើតរដ្ឋខ្មែរនៅឆ្នាំ២៦៧ មុន គ.ស រហូតមកដល់រាជព្រះបាទនរោត្តម ដែលទ្រង់បានសោយព្រះសុវណ្ណគត ក្នុងឆ្នាំ១៩០៤ ឃើញថាថ្នាក់ដឹកនាំដែលមានងារ «តេជោ» មានចំនួន ២៩រូប ដូចខាងក្រោម៖
១. ពញាធម្មាតេជោ៖ ឆ្នាំ៨៦, ចៅហ្វាយស្រុកខេត្តបាទី ក្រោយមកទៅឈររក្សាខេត្តបាភ្នំវិញ
២. ពញាតេជោដំឌិន៖ ឆ្នាំ៦២១, មេទ័ព
៣. ឧកញ៉ាតេជោ ស្រី៖ ឆ្នាំ១៤៣៤, ចៅហ្វាយស្រុកខេត្តសំរោងទង ជីកបឹងតេជោ
៤. ឧកញ៉ាតេជោ៖ ឆ្នាំ១៥១២, មន្ត្រីជាន់ខ្ពស់
៥. ឧកញ៉ាពេជតេជោ៖ ឆ្នាំ១៥២២, មេទ័ព
៦. ឧកញ៉ាយសតេជោ៖ ឆ្នាំ១៥២២, មេទ័ព
៧. ឧកញ៉ាតេជោ អួង៖ ឆ្នាំ១៥២២, មេទ័ព
៨. ព្រះឥន្ទ្រាតេជោ ជៃ៖ ឆ្នាំ១៥៧៦, មន្ត្រីម្នាក់ក្នុងចំណោមរាជទូត
៩. ឧកញ៉ាធម្មាតេជោ៖ ឆ្នាំ១៥៧៦, មន្ត្រីចាត់ទៅបោះគោលជាមួយរាជទូតសៀម
១០. ឧកញ៉ាតេជោ ម៉ុក៖ ឆ្នាំ១៦២១, មេទ័ព
១១. ឧកញ៉ាធម្មាតេជោ អ៊ុក៖ ឆ្នាំ១៦២១, មេទ័ព
១២. ឧកញ៉ាធម្មាតេជោ៖ ឆ្នាំ១៦៨២, ចៅហ្វាយស្រុកខេត្តបាភ្នំ
១៣. ឧកញ៉ាធម្មាតេជោ ស្រី៖ ឆ្នាំ១៦៨៣, មេទ័ព
១៤. ឧកម៉ឺនចោមចៃចុងរ័ក្ស អ៊ិន៖ ឆ្នាំ១៦៩៣, ឧកញ៉ាតេជោ ចៅហ្វាយស្រុកខេត្តសំរោងទង
១៥. ឧកញ៉ាតេជោ សោម៖ ឆ្នាំ១៧៥៦, ចៅហ្វាយស្រុកខេត្តកំពង់ស្វាយ
១៦. ពញាជម្នះសង្គ្រាម មូវ ឬមូរ៖ ឆ្នាំ១៧៥៦, ស្តេចតាំងឱ្យធ្វើជាឧកញ៉ាតេជោ នៅស្រុកខេត្តកំពង់ស្វាយ
១៧. ឧកញ៉ាស្រីអនុជិត ទែន៖ ឆ្នាំ១៧៥៩, ឧកញ៉ាតេជោ ចៅហ្វាយស្រុកខេត្តកំពង់ស្វាយ
១៨. ឧកញ៉ាតេជោ ម៉ឺង៖ ឆ្នាំ១៨០៦, ចៅហ្វាយស្រុកខេត្តកំពង់ស្វាយ
១៩. ឧកញ៉ាធម្មាតេជោ មាន្ទ់៖ ឆ្នាំ១៨១១, មេទ័ពជើងទឹក
២០. ឧកញ៉ាតេជោ៖ ឆ្នាំ១៨៤៨, ចៅហ្វាយស្រុកខេត្តកំពង់ស្វាយ ស័ក្តិ១០ហ៊ូពាន់
២១. ឧកញ៉ាយសតេជោ៖ ឆ្នាំ១៨៤៨, ចៅហ្វាយស្រុកខេត្តកំពង់លែង ស័ក្តិ៧ហ៊ូពាន់
២២. ឧកញ៉ាធម្មាតេជោ ប៉ាង៖ ឆ្នាំ១៨៦១, ចៅហ្វាយស្រុកខេត្តបាភ្នំ
២៣. ឧកញ៉ាធម្មាតេជោ ជៃ៖ ឆ្នាំ១៨៦១, ចៅហ្វាយស្រុកខេត្តបាភ្នំ (ខ្សែព្រះអង្គម្ចាស់ វ័ត្ថា)
២៤. ឧកញ៉ាគាមវាន់ចែស្តារិទ្ធីគីរីតេជោ ចៅ ណុប៖ ឆ្នាំ១៨៦១, អ្នកប្រាជ្ញតែងលើកគោរមងារ
២៥. ឧកញ៉ាធម្មាតេជោចក្រី កែប៖ ឆ្នាំ១៨៦១, មេទ័ព
២៦. ឧកញ៉ាធម្មាតេជោ ហែន៖ ឆ្នាំ១៨៦៦, មេទ័ព
២៧. ឧកញ៉ាតេជោ អី៖ ឆ្នាំ១៨៦៦, ចៅហ្វាយស្រុកខេត្តកំពង់ស្វាយ
២៨. ឧកញ៉ាធម្មាតេជោ តី៖ ឆ្នាំ១៨៧៦, មេទ័ព
២៩. ឧកញ៉ាធម្មាតេជោ គង់៖ ឆ្នាំ១៨៧៦, មេទ័ព
ជារួមមក យើងសង្កេតឃើញថា ងារ «តេជោ» ភាគច្រើនមានតួនាទីជាមេទ័ពឆ្នើមៗ ចៅហ្វាយស្រុក ចៅហ្វាយខេត្ត និងមន្ត្រីជាន់ខ្ពស់ ជាដើម។ រីឯនៅសតវត្សទី២១នេះ ព្រះរាជាណាចក្រកម្ពុជា មានតួអង្គមួយទៀត ដែលមានគោរមងារជា «តេជោ» ហើយដែលលោកមានឈ្មោះពេញគឺ សម្តេចអគ្គមហាសេនាបតីតេជោ ហ៊ុន សែន ។ តេជោសែន មិនត្រឹមតែជាមេទ័ព ឬចៅហ្វាយខេត្ត ដូច តេជោសម័យមុនៗនោះទេ ប៉ុន្តែលោកជា នាយករដ្ឋមន្ត្រី នៃព្រះរាជាណាចក្រកម្ពុជា។ ការទទួលបានងារ តេជោរបស់ សម្តេច ហ៊ុន សែន គឺអនុលោមទៅតាមវិរភាពរបស់ សម្តេច ក្នុងការលះបង់កម្លាំងកាយ កម្លាំងចិត្ត និងប្រាជ្ញាស្មារតី ដើម្បីជាតិមាតុភូមិកម្ពុជា៕
