តាមរយៈជំនួបពិភាក្សាការងារ រវាងលោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជជាមួយ Dr. Jongsoo Shin នាយកប្រចាំតំបន់អាស៊ីរបស់ស្ថាប័នIRRI កាលរសៀលថ្ងៃទី១៥ ខែឧសភា ឆ្នាំ២០២៣ បានឱ្យដឹងថា ភាគីទាំងពីរកំពុងជំរុញឱ្យមានកិច្ចសហការគ្នា លើកិច្ចការគម្រោងស្រាវជ្រាវអំពីពូជស្រូវដែលមានជាតិស្ករទាបនៅកម្ពុជា។
នៅក្នុងជំនួបនោះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងអំណរគុណចំពោះកិច្ចសហប្រតិបត្តិការល្អរវាង IRRI និងក្រសួងកសិកម្ម រុក្ខាប្រមាញ់ និងនេសាទ ពិសេសកិច្ចការស្រាវជ្រាវអំពីពូជស្រូវ ស្របតាមគោលនយោបាយរបស់ក្រសួង។
ជាមួយគ្នានេះ លោកថា សម្រាប់ការផ្តួចផ្តើមរបស់ IRRI អំពីពូជស្រូវមានជាតិស្ករទាបនៅកម្ពុជា (Low Glycemic Index – Low GI) លោករដ្ឋមន្ត្រី ក៏បានណែនាំដល់ IRRI ឱ្យសហការជាមួយ CARDI និងនាយកដ្ឋានសហប្រតិបត្តិការអន្តរជាតិ ហើយត្រូវសិក្សាវិភាគដោយត្រូវយកចិត្តទុកដាក់ទាំងការងារស្រាវជ្រាវពូជស្រូវ និងការអភិវឌ្ឍទីផ្សារ។
លើសពីនេះទៀត លោក ឌិត ទីណា ក៏បានផ្តល់ការណែនាំដល់ស្ថាប័ន IRRI ក៏ត្រូវផ្តោតលើការអភិវឌ្ឍធនធានមនុស្ស ដែលជាទម្រង់នៃភាពជោគជ័យប្រកបដោយនិរន្តរភាព ពេលគម្រោងបិទបញ្ចប់។
បើតាម ក្រសួងកសិកម្ម រុក្ខាប្រមាញ់ និងនេសាទ បានអះអាងដែរថា គម្រោងស្រាវជ្រាវពូជស្រូវមានជាតិស្ករទាបនៅកម្ពុជាទាំងអស់នេះ គឺត្រូវបានគិតគូរយ៉ាងយកចិត្តទុកដាក់លើសុខភាពប្រជាពលរដ្ឋ សុវត្ថិភាពសង្គម ថែមទាំងធ្វើឱ្យកសិករមានចំណូលមានស្ថិរភាពសេដ្ឋកិច្ច និងនិរន្តរភាពផងដែរ៕
អត្ថបទ៖ ពិសី
