អាមេរិកសម្រេចផ្ដល់ជំនួយឡើងវិញឲ្យកម្ពុជាក្នុងទំហំទឹកប្រាក់ប្រមាណ ១៨លានដុល្លារ

ជំនួបទ្វេភាគី និងពិភាក្សាការងាររវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកស្រី វ៉ិចតូរីយ៉ា នូលែន (Victoria Nuland) អនុរដ្ឋមន្ត្រីការបរទេសស្ដីទី សហរដ្ឋអាមេរិក កាលថ្ងៃសុក្រ ទី២២ ខែកញ្ញា បានពិភាក្សាផ្តោតលើការរិះរកវិធី និងមធ្យោបាយ សម្រាប់ពង្រឹងទំនាក់ទំនង និងកិច្ចសហប្រតិបត្តិការទ្វេភាគី ឱ្យឈានឡើងមួយកម្រិតទៀត។

នៅក្នុងជំនួបនេះ លោកស្រី វ៉ិចតូរីយ៉ា នូលែន បានគូសបញ្ជាក់ថា សហរដ្ឋអាមេរិក ស្វាគមន៍ឱកាសដើម្បីពង្រីកកិច្ចសហប្រតិបត្តិការ រវាងប្រទេសទាំងពីរ តាមរយៈការធ្វើការជិតស្និទ្ធជាមួយ សម្ដេចធិបតី និងចង់ឃើញសម្ដេចធិបតី ក៏ដូចប្រទេសកម្ពុជាទាំងមូលទទួលបានជោគជ័យ។

នៅចំនោះមុខសម្តេចធិបតីនាយករដ្ឋមន្រ្តី លោកស្រី វ៉ិចតូរីយ៉ា នូលែន បានបញ្ជាក់ថា សហរដ្ឋអាមេរិកបានសម្រេចផ្ដល់ជូនឡើងវិញ នូវជំនួយក្នុងទំហំទឹកប្រាក់ប្រមាណ ១៨លានដុល្លារអាមេរិក តាមរយៈទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) ដែលសហរដ្ឋអាមេរិកបានផ្អាក ក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣។

ក្រៅពីនេះ ភាគីទាំងពីរក៏បានពិភាក្សាផងដែរ លើវិស័យដែលប្រទេសទាំងពីរកំពុងយកចិត្តទុកដាក់៕