គិតត្រឹមពេលពេល ៩ខែ ពោលពីខែមករា ដល់ខែកញ្ញា ឆ្នាំ២០២៣នេះ រាជរដ្ឋាភិបាល បានចំណាយលើការជួយដល់ប្រជាពលរដ្ឋងាយរងគ្រោះ រហូតជិត ៤៥លានដុល្លារ ខណៈរាជរដ្ឋាភិបាលនៅតែបន្តជួយជាបន្តបន្ទាប់ទៀត។នេះបើតាមការលើកឡើងពីសម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជា ថ្លែងក្នុងឱកាសបន្តចុះជួបកម្មករជិត ២ម៉ឺននាក់ទៀត ក្នុងរាជធានីភ្នំពេញ កាលព្រឹកថ្ងៃទី០៣ ខែតុលា ឆ្នាំ២០២៣នេះ។
នាឱកាសនោះ សម្តេច ហ៊ុន ម៉ាណែត បានឱ្យដឹងបន្ថែមថា ក្នុងរយៈពេល ៩ខែ ឆ្នាំ២០២៣នេះ រាជរដ្ឋាភិបាល បានចំណាយលើការជួយដល់ប្រជាពលរដ្ឋងាយរងគ្រោះ ស្ត្រីមេម៉ាយ និងកុមារតូច អស់ថវិកាជិត ៤៥លានដុល្លារ។
សម្តេចបន្តថា៖«តាមយៈការចំណាយនេះ ក្នុងនោះ៖ កម្មវិធីផ្តល់អាហារតាមសាលារៀន រាជររដ្ឋាភិបាលបានធ្វើតាំងពីឆ្នាំ២០១៩ ហើយយកផលិតផលពីសហគមន៍ និងបានអនុវត្តន៍លើ ១០ខេត្ត និង ៤១៧សាលា ក្នុងនោះកូនក្មេងទទួលបានផល ១១ម៉ឺននាក់ ហើយរដ្ឋាភិបាលបានចំណាយថវិកា ១៧លានដុល្លារ សម្រាប់បំប៉នអាហារដល់កូនចៅប្រជាពលរដ្ឋ ហើយរាជរដ្ឋាភិបាលនឹងនៅបន្ត និងបន្តពង្រីក»។
បន្ថែមពីនេះ សម្តេចអះអាងថា រាជរដ្ឋាភិបាល ក៏មានគោលដៅធ្វើយ៉ាងណាឱ្យបានគ្រប់ ៩លាននាក់សម្រាប់ប្រជាពលរដ្ឋបានទទួលសេវាគាំពារផ្នែកសុខភាព ហើយរាជរដ្ឋាភិបាលក៏គ្រោងចំណាយថវិកាជិត ១០០លានដុល្លារក្នុងមួយឆ្នាំ ដែលនេះជាអ្វីដែលរាជរដ្ឋាភិបាលគ្រោងពង្រីកជួយដល់ប្រជាពលរដ្ឋ។
គួរបញ្ជាក់ដែរថា បើតាមសម្តេច ហ៊ុន ម៉ាណែត បានសង្កត់ធ្ងន់ទៀតដែរថា ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលបានចំណាយថវិកា ក្នុងការជួយដល់ប្រជាពលរដ្ឋជួបវិបត្តិជំងឺកូវីដ-១៩ និងបញ្ហាអតិផរណា និងសង្គ្រាមសេដ្ឋកិច្ច និងការជួយកុមារ និងស្ត្រីមានផ្ទៃពោះ បានប្រើប្រាក់ថវិកាអស់១២០០លានដុល្លារ៕
អត្ថបទ៖ ពិសី
