ប្រជាពលរដ្ឋប្រមាណជិត៦ម៉ឺននាក់ បានជិះរថយន្តក្រុងឥតគិតថ្លៃទាំងនៅក្នុងរាជធានីភ្នំពេញ និងទៅស្រុកកំណើតតាមបណ្តាខេត្តនានា នៅក្នុងឳកាសពិធីបុណ្យភ្ជុំបិណ្ឌ រយៈពេល៥ថ្ងៃ ចាប់ពីថ្ងៃទី១២ ដល់ថ្ងៃទី១៦ ខែតុលា ។ នេះបើតាមការបញ្ជាក់របស់លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ នៅថ្ងៃនេះ។
លោក ម៉េត មាសភក្តី បានបន្តថា បានកត់សម្គាល់ថា ចំនួនអ្នកជិះរថយន្តក្រុង ប្រមាណជិត៦ម៉ឺននាក់នៅក្នុងឳកាសបុណ្យភ្ជុំបិណ្ឌនេះ គឺមានការកើនឡើងបើប្រៀបធៀប ទៅនឹងការដឹកជញ្ជូនកាលពីបុណ្យឆ្នាំថ្មីប្រពៃណីជាតិឆ្នាំនេះ ។ ខេត្តដែលមានពលរដ្ឋជិះរថយន្តក្រុងទៅច្រើន មានចំនួន៣ខេត្ត រួមមាន ខេត្តសៀមរាបមានចំនួនជាង១ម៉ឺន៥ពាន់នាក់ ខេត្តបាត់ដំបង មានចំនួនជិត១ម៉ឺននាក់ និងខេត្តបន្ទាយមានជ័យ មានចំនួនជិត១ម៉ឺននាក់។
អ្នកនាំពាក្យរដ្ឋបាលរាជធានីភ្នំពេញ បន្តថា ក្នុងអំឡុងពេលដឹកជញ្ជូនអ្នកដំណើរនៅក្នុងឳកាសពិធីបុណ្យភ្ជុំបិណ្ឌនេះ គឺមិនមានបញ្ហាអ្វីកើតឡើងគួរឲ្យកត់សម្គាល់ ពោលគឺការដឹកជញ្ជូនបានដំណើរការដោយ រលូនប្រកបដោយសុខសុវត្ថិភាពល្អប្រសើរ។ ជាមួយគ្នានេះ ពលរដ្ឋគ្រប់មជ្ឈដ្ឋានក៏បានសាទរ និងថ្លែងអំណរគុណសម្តេចធិបតី ហ៊ុន ម៉ាណែត នាយករដ្ឋមន្ត្រី ក៏ដូចជារដ្ឋបាលរាជធានីភ្នំពេញ ចំពោះការបន្តផ្តល់រថយន្តក្រុងឥតគិតថ្លៃ ទៅស្រុកកំណើតតាមបណ្តាខេត្តនានា នៅក្នុងឳកាសពិធីបុណ្យភ្ជុំបិណ្ឌនេះផងដែរ។
គួរបញ្ជាក់ថា ដើម្បីជួយសម្រួលបន្ទុកចំណាយរបស់ប្រជាពលរដ្ឋដែលត្រូវធ្វើដំណើរទៅស្រុកកំណើតជួបជុំក្រុមគ្រួសារនៅក្នុងឳកាសពិធីបុណ្យភ្ជុំបិណ្ឌ ប្រពៃណីជាតិខ្មែរ សម្រាប់ឆ្នាំនេះ រដ្ឋបាលរាជធានីភ្នំពេញ បានបញ្ចេញរថយន្តក្រុងចំនួន៤៥៥គ្រឿង សម្រាប់ដឹកពលរដ្ឋដោយឥតគិតថ្លៃ ។
ក្នុងនោះរថយន្តក្រុងចំនួន ៣៩៥គ្រឿង សម្រាប់អ្នកធ្វើដំណើរទៅមកស្រុកកំណើតតាមបណ្តាខេត្តនានា និងចំនួន៦០គ្រឿងទៀតសម្រាប់ដឹកពលរដ្ឋ នៅក្នុងរាជធានីភ្នំពេញ។ ប្រតិបត្តិការដឹកអ្នកដំណើរ បានធ្វើឡើងរយៈពេល ០៥ថ្ងៃ ចាប់ពីថ្ងៃទី១២ ដល់ថ្ងៃទី១៦ ខែតុលា ទាំងនៅក្នុងរាជធានីភ្នំពេញ និងទៅមកស្រុកកំណើតនៅតាមបណ្តាខេត្តនានា៕
