ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ សម្រេចតែងតាំងមុខតំណែង និងផ្តល់ឋានៈដល់ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា ចំនួន១១រូប ក្នុងនោះមាន៥រូប តែងតាំងជាអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា នៅថ្ងៃទី២៥ ខែតុលា ឆ្នាំ២០២៣។
បើតាមព្រះរាជក្រឹត្យ អគ្គលេខាធិការដ្ឋានចំនួន៥រូប ដែលត្រូវបានតែងតាំងនោះ រួមមាន ១,លោក ជួប សុភក្តិ អតីតអនុរដ្ឋលេខាធិការក្រសួងសាធារណការ និងដឹកជញ្ជួន ជាអគ្គលេខាធិការរង មានឋានៈស្មើរដ្ឋលេខាធិការ ២,លោក ហឿន សំនៀង អតីតនាយកវិទ្យាស្ថានតេជោសែន សាធារណការ និងដឹកជញ្ជួន ៣,លោក ណុប សោភ័ណតារា អតីតនាយករងខុទ្ទកាល័យរដ្ឋមន្ត្រីក្រសួងសាធារណការ លោក ស៊ុន ចាន់ថុល ៤,លោក ណុប វណ្ណថារ៉ូ អគ្គលេខាធិការរង សហព័ន្ធកីឡាការ៉ាតេកម្ពុជា និង៥,លោក សារ សំបូរ អតីតប្រធានរដ្ឋបាលនៃក្រុមប្រឹក្សាអភិវឌ្ឍន៍កម្ពុជា ជាអគ្គលេខាធិការរង មានឋានៈស្មើអនុរដ្ឋលេខាធិការ។
ក្រៅពីការតែងតាំងអគ្គលេខាធិការដ្ឋានចំនួន៥រូបនេះហើយ ក៏មានការតែងតាំងអគ្គលេខាការដ្ឋាននៃគណៈកម្មាធិការវិនិយោគកម្ពុជាចំនួន៤រូប និងគណៈកម្មាធិការសហប្រតិបត្តិការអភិវឌ្ឍន៍កម្ពុជាចំនួន២រូបទៀតផងដែរ។
សូមជម្រាបជូនថា ក្រុមប្រឹក្សាអភិវឌ្ឍន៍កម្ពុជា (CDC)ជាសេនាធិការរបស់រាជរដ្ឋាភិបាល ឈរលើបេសកកម្មទាក់ទាញការបណ្ដាក់ទុន និងសម្រួលដល់ការវិនិយោគពីបរទេស និងក្នុងស្រុក តាមរយៈការអនុវត្តកិច្ចការនីតិសម្បទា និងការអភិវឌ្ឍ ការវិនិយោគសាធារណៈ និងឯកជន និងការបង្កើត ព្រមទាំងគ្រប់គ្រងតំបន់សេដ្ឋកិច្ចពិសេស ដើម្បីសម្រេចបាននូវវិស័យឯកជនដែលមានស្ថិរភាព និងរឹងមាំ ព្រមទាំងជាចលករជំរុញកំណើនសេដ្ឋកិច្ច។
ក្រុមប្រឹក្សាអភិវឌ្ឍន៍កម្ពុជា (CDC) បច្ចប្បន្នដឹកនាំដោយឧបនាយករដ្ឋមន្ត្រី លោក ស៊ុន ចាន់ថុល ជាអនុប្រធានទី១ និងលោក ជា វុទ្ធី ជាអគ្គលេខាធិការគណៈកម្មាធិការវិនិយោគកម្ពុជា៕
