ក្រុមហ៊ុន Wuxi Capital Group Co,Ltd ដែលជាក្រុមហ៊ុនធំមួយរបស់ប្រទេសចិន បានបង្ហាញពីបំណងចង់វិនិយោគវិនិយោគនៅតំបន់សេដ្ឋកិច្ចពិសេសក្រុងព្រះសីហនុ ដោយសារមើលឃើញកត្តាធំៗចំនួន៤។
ការលើកឡើងដូច្នេះ បានធ្វើឡើងនៅក្នុងជំនួបពិភាក្សាការងាររវាង លោក ឡុង ឌីម៉ង អភិបាលរងខេត្តព្រះសីហនុ និងគណប្រតិភូចិនដឹកនាំដោយលោក ZHANG WEIMIN អនុប្រធានក្រុមប្រឹក្សាភិបាល នៃក្រុមហ៊ុន Wuxi Capital Group Co,Ltd នៅព្រឹកថ្ងៃទី២៣ ខែកុម្ភៈ ឆ្នាំ២០២៤។ ជំនួបនេះ គឺដើម្បីស្វែងយល់ឱ្យកាន់តែច្បាស់អំពីស្ថានភាព សេដ្ឋកិច្ច សក្តានុពលរបស់ខេត្ត និងជាពិសេសតំបន់សេដ្ឋកិច្ចក្រុងព្រះសីហនុ។
នាឱកាសនោះ លោក ឡុង ឌីម៉ង បានឱ្យដឹងថា បានបញ្ជាក់ថា ខេត្តព្រះសីហនុ ជាខេត្តដែលមានសក្តានុពលភូមិសាស្ត្រ ហេដ្ឋារចនាសម្ព័ន្ធ និងបរិយាកាសរស់ប្រកបដោយសុខុដុមរមនា ដែលមានប្រជាពលរដ្ឋចម្រុះជាតិសាសន៍ ប្រកបរបរគ្រប់ប្រភេទ ហើយក្នុងនោះមានជនជាតិចិនដែលលេចធ្លោជាងគេ។
ជាងនេះទៀត លោកថា ភាពខ្លាំងរបស់ខេត្តព្រះសីហនុ គឺមានផែនការមេប្រែក្លាយខេត្តនេះទៅជាតំបន់សេដ្ឋកិច្ចពិសេសគំរូពហុបំណង និងកម្មវិធីពិសេសជំរុញការវិនិយោគនៅខេត្តព្រះសីហនុឆ្នាំ២០២៤។ លើសពីនេះ លោកថា ខេត្តព្រះសីហនុ នឹងប្រែក្លាយជាតំបន់មជ្ឈមណ្ឌលពាណិជ្ជកម្ម និងភស្តុភារកម្មអន្តរជាតិ, មជ្ឈមណ្ឌលដឹកជញ្ជូនទំនិញពហុមធ្យោបាយអន្តរជាតិ មជ្ឈមណ្ឌលហិរញ្ញវត្ថុអន្តរជាតិ តំបន់ទេសចរណ៍ប្រណិត ជាពិសេសជាទីក្រុងវៃឆ្លាតនាំមុខ។
ហេតុនេះ លោក ឡុង ឌីម៉ងបានសង្កត់ធ្ងន់ថា៖«ខេត្តព្រះសីហនុ ជាខេត្តដែលទទួលបានការយកចិត្តទុកដាក់ខ្ពស់ ពីរាជរដ្ឋាភិបាលកម្ពុជា ហើយឆ្នាំ២០២៤នេះជា ពេលវេលាដ៏ល្អបំផុតសម្រាប់ការបណ្តាក់ទុនវិនិយោគនៅក្នុងខេត្តព្រះសីហនុ»។
ក្នុងពេលនោះផងដែរ លោក ZHANG WEIMIN អនុប្រធានក្រុមប្រឹក្សាភិបាលនៃក្រុមហ៊ុន Wuxi Capital Group Co,Ltd ក៏បានលើកឡើងថា ឆ្នាំ២០២៤ ជាឆ្នាំនៃការផ្លាស់ប្តូរប្រជាជននៃប្រទេសទាំងពីរ និងជាខួបលើកទី៦៦ នៃទំនាក់ទំនងការទូតកម្ពុជា-ចិន នេះជាការឆ្លនេះជាការឆ្លុះបញ្ចាំងពីទំនាក់ទំនងល្អរវាងប្រជាជននៃប្រទេសទាំង២។
បន្ថែមពីនេះ បន្ទាប់ពីស្វែងយល់ពីគោលនយោបាយវិនិយោគនៅកម្ពុជា ជាពិសេសការវិនិយោគនៅតំបន់សេដ្ឋកិច្ចពិសេសក្រុងព្រះសីហនុរួចនោះ លោកថា តាមការសង្កេតរបស់លោក តំបន់សេដ្ឋកិច្ចពិសេសក្រុងព្រះសីហនុ មានការអភិវឌ្ឍរីកចម្រើនខ្លាំង។
ជាមួយគ្នានេះ លោកបានអះអាងថា៖«ក្រុមហ៊ុនរបស់ប្រទេសចិនមានគម្រោងសហការជាមួយក្រុមហ៊ុន Wuxi វិនិយោគនៅខេត្តព្រះសីហនុ ដោយសម្លឹងឃើញភាពទាក់ទាញរបស់តំបន់សេដ្ឋកិច្ចពិសេស ក្រុងព្រះសីហនុ ដោយសារកត្តាធំៗចំនួន៤ គឺ៖ទី១.ទទួលបានការយកចិត្តទុកដាក់ពីរាជរដ្ឋាភិបាលកម្ពុជា
ទី២.ជាសមិទ្ធផល នៃចំណងមិត្តភាព សាមគ្គីភាពកម្ពុជា-ចិន ទី៣.តំបន់សេដ្ឋកិច្ចពិសេសមានលទ្ធផលផ្លែផ្កា និងទី៤. កាលានុវត្តភាពយ៉ាងខ្លាំងក្នុងការវិនិយោគ និងដឹកជញ្ជូន»។
គួរបញ្ជាក់ដែរថា បើគិតត្រឹមខែសីហា ឆ្នាំ២០២៣ កម្ពុជាមានតំបន់សេដ្ឋកិច្ចពិសេស(ត.ស.ព) កំពុងដំណើរការចំនួន ២៤ទីតាំង នៃ៩រាជធានី-ខេត្ត ជាមួយគម្រោងវិនិយោគសរុបប្រមាណ ៦៥៥គម្រោង ដែលបានផ្ដល់ការងារជាង ១៧ម៉ឺនកន្លែង។ ដោយក្នុងនោះ ខេត្តព្រះសីហនុ មានតំបន់សេដ្ឋកិច្ចពិសេស.កំពុងដំណើរការចំនួន៤៕ អត្ថបទ៖ រង្សី
