ភ្នំពេញៈ ថ្នាក់ដឹកនាំស្ថាប័នសារព័ត៌មានមួយចំនួន បានផ្តួចផ្តើមគំនិតរួមគ្នា បង្កើតសមាគមសហគ្រិនសារព័ត៌មានសេដ្ឋកិច្ចកម្ពុជា (CEMEA) ដោយបានចុះបញ្ជីនៅក្រសួងមហាផ្ទៃជាផ្លូវការ កាលពីថ្ងៃទី១៣ ខែមីនា ឆ្នាំ២០២៤ ដើម្បីរួមចំណែកលើកកម្ពស់ការផ្សព្វផ្សាយព័ត៌មានទាក់ទងនឹងសេដ្ឋកិច្ច ប្រកបដោយមូលដ្ឋានវិជ្ជាជីវៈ និងក្រមសីលធ៌ម។
ថ្នាក់ដឹកនាំសមាគមនេះ មកពីស្ថាប័នជាច្រើនដូចជា លោក យិន លាងគង់ ស្ថាបនិកនិងអគ្គនាយកគេហទំព័រPropertyarea.asia & Cambodia Financialtimes.com លោក កៃ គឹមសុង អតីតនិពន្ឋនាយកសារព័ត៌មានភ្នំពេញប៉ុស្ត៍ និងជាស្ថាបនិកសារព័ត៌មាន Amazadia Education លោក លីម ឡាយហ៊ត ស្ថាបនិកសារព័ត៌មាន Asean Properties លោក សយ សុភា និពន្ឋនាយកសារព័ត៌មានដើមអម្ពិល លោក អាន ចាន់ថ្លា និពន្ឋនាយកសារព័ត៌មាន CEN លោក ផ្លុង វិចិត្រ ស្ថាបនិកនាយកសារព័ត៌មាន CCTIMES លោកស្រី ហាន ស៊ូជីន ស្ថាបនិកព្រឹត្តបត្រសកល លោក អ៊ុំ សារ៉ាវុធ ស្ថាបនិកសារព័ត៌មាន CFN ជាដើម។
លោក យិន លាងគង់ ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា បានលើកឡើងកាលពីល្ងាចថ្ងៃទី២៦ ខែមីនា កន្លងមកថា នៅសម័យសាធារណៈរដ្ឋប្រជាមានិតកម្ពុជា ចុងទសវត្សរ៍ទី៧០ ដល់ទសវត្សរ៍ទី៨០ ប្រព័ន្ឋផ្សព្វផ្សាយនៅកម្ពុជា ផ្សព្វផ្សាយតែពីបញ្ហាសង្រ្គាម និងការអំពាវនាវឲ្យជនរងជាតិខ្មែរវិលត្រលប់ចូលមាតុភូមិ។ នៅទសវត្សរ៍៩០ ប្រព័ន្ឋផ្សព្វផ្សាយបានផ្សាយផ្តោត លើការបោះឆ្នោត និងលទ្ឋិប្រជាធិបតេយ្យ និងការរួបរួមជាតិ។ នៅទសវត្សរ៍ឆ្នាំ២០២០ គេផ្តោតតែលើលទ្ឋិប្រជាធិបតេយ្យ ជម្លោះនយោបាយ និងសេដ្ឋកិច្ចខ្លះ។
ប៉ុន្តែចាប់ពីទសវត្សរ៍ឆ្នាំ២០១០ ដល់ឆ្នាំ២០២៤នេះ សារព័ត៌មានក្នុងស្រុកបានផ្តោតលើកត្តាសុខសន្តិភាព ការរីកចម្រើនសេដ្ឋកិច្ចជាតិ និងវិបត្តិសកលផងដែរ។ លោក យិន លាងគង់ បញ្ជាក់។
លោកបានបន្តថា “អ្វីៗបានផ្លាស់ប្តូរហើយលើនិន្នាការសង្គម សេដ្ឋកិច្ច ដែលប្រព័ន្ឋផ្សព្វផ្សាយនានា គួរផ្តោតលើព័ត៌មានសេដ្ឋកិច្ច និងព័ត៌មានជាចំណេះដឹង ដែលមានលក្ខណៈវិជ្ជមានដល់ប្រជាពលរដ្ឋឲ្យបានដឹង”។ លោកបន្ថែមថា “ប៉ុន្តែយើងសោកស្តាយ ដែលស្ថាប័នសារព័ត៌មាននៅកម្ពុជាតិចតួច បានផ្តោតលើផ្សព្វផ្សាយរឿងសេដ្ឋកិច្ច ព្រោះអ្នកសារព័ត៌មានជំនាញខាងសេដ្ឋកិច្ច មានចំនួនតិចតួចបំផុត ដោយសារពួកគេទទួលការបណ្តុះបណ្តាល ពីគ្រូដែលគ្មានជំនាញខាងសេដ្ឋកិច្ចកន្លងមក”។
ហេតុនេះ ទើបសមាគមនេះ ត្រូវបានបង្កើតឡើងដោយអ្នកសារព័ត៌មាន ដែលមានជំនាញ និងវិជ្ជាជីវៈច្បាស់លាស់ខាងសេដ្ឋកិច្ច ដើម្បីរួមចំណែកផ្សព្វផ្សាយព័ត៌មាន សេដ្ឋកិច្ច ប្រកបដោយវិជ្ជាជីវៈ គ្រប់ជ្រុងជ្រោយ និងប្រកបដោយពុទ្ឋិ ដល់សាធារណៈជនជាតិ និងអន្តរជាតិអាចជឿ និងទុកចិត្តបាន។
លោក យិន លាងគង់ បានគូសបញ្ជាក់ទៀតថា គោលដៅរបស់សមាគម គឺចង់រួមចំណែកជាមួយរាជរដ្ឋាភិបាលកម្ពុជា ក្នុងការផ្សព្វផ្សាយលើកកម្ពស់មុខមាត់របស់ជាតិ ទៅកាន់មជ្ឈដ្ឋានជាតិ និងអន្តរជាតិ ក៏ដូចជាចូលរួមជ្រោមជ្រែងដល់សហគ្រិន អ្នកធុរកិច្ច និងអ្នកអភិវឌ្ឍន៍នានា ឲ្យទទួលបានព័ត៌មាន ដែលមានមូលដ្ឋានច្បាស់លាស់ សម្រាប់ពួកគេ ធ្វើការពិចារណានិងសម្រេចចិត្តមកវិនិយោគនៅកម្ពុជា៕
