លោក វ៉ាង វិនធាន (Wang Wentian) ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា បានគូសបញ្ជាក់ថា រដ្ឋាភិបាលចិននឹងនៅតែបន្តគាំទ្ររដ្ឋាភិបាលកម្ពុជា ដើម្បីរួមចំណែកអភិវឌ្ឍសង្គម-សេដ្ឋកិច្ចកម្ពុជា ឲ្យកាន់តែរីកចម្រើនបន្ថែមទៀត។
ការគូសបញ្ជាក់បែបនេះរបស់លោក វ៉ាង វិនធាន នៅក្នុងឱកាសសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា អនុញ្ញាតចូលជួបសម្តែងការគួរសម និងជម្រាបលាក្នុងការបញ្ចប់អាណត្តិ កាលពីថ្ងៃទី២៨ ខែឧសភា ឆ្នាំ២០២៤។
ក្នុងជំនួបនោះ លោក វ៉ាង វិនធាន បានសម្តែងនូវការកោតសរសើរ និងវាយតម្លៃខ្ពស់ចំពោះរាជរដ្ឋាភិបាលកម្ពុជា ដែលបានសម្រេចនូវសមិទ្ធផលធំៗជាច្រើនលើវិស័យនយោបាយ សេដ្ឋកិច្ច ការទាក់ទាញវិនិយោគិន ការដាក់ចេញកម្មវិធីកែទម្រង់ស៊ីជម្រៅ និងការធ្វើឲ្យប្រសើរឡើងនូវវិស័យទេសចរណ៍ជាដើម។
លោកក៏បានសម្តែងការពេញចិត្តដែលបានរួមចំណែកពង្រឹង និងពង្រីកទំនាក់ទំនង និងកិច្ចសហប្រតិបត្តិការចិន-កម្ពុជា ក្នុងបេសកកម្មការទូតរបស់លោកនៅកម្ពុជា ដោយសម្រេចបានសមិទ្ធផលធំៗគួរឲ្យកត់សម្គាល់ដូចជា ពហុកីឡាដ្ឋានជាតិមរតកតេជោ, ផ្លូវល្បឿនលឿនភ្នំពេញ-ព្រះសីហនុ, អាកាសយានដ្ឋានអន្តរជាតិសៀមរាប-អង្គរ, ក៏ដូចជាការរួមចំណែកក្នុងការប្រយុទ្ធប្រឆាំងកូវីត១៩ផងដែរ ដែលទាំងនេះបានឆ្លុះបញ្ចាំងពីទំនាក់ទំនង និងកិច្ចសហប្រតិបត្តិការល្អប្រសើរ ក្នុងឋានៈជាមិត្តដែកថែប។
ជាមួយគ្នានោះ លោកក៏បានគូសបញ្ជាក់ថា រដ្ឋាភិបាលចិននឹងនៅតែបន្តគាំទ្ររាជរដ្ឋាភិបាលកម្ពុជា ដើម្បីរួមចំណែកអភិវឌ្ឍសង្គម-សេដ្ឋកិច្ចកម្ពុជាឲ្យកាន់តែរីកចម្រើនបន្ថែមទៀត។
ជាការឆ្លើយតប សម្រេចធិបតីបានវាយតម្លៃខ្ពស់ចំពោះបេសកកម្មការទូតរបស់លោក វ៉ាង វិនធាន នៅកម្ពុជា ដែលបានរួមចំណែកយ៉ាងសកម្មក្នុងការពង្រឹង និងពង្រីកទំនាក់ទំនង និងកិច្ចសហប្រតិបត្តិការកម្ពុជា-ចិន ឲ្យកាន់តែរឹងមាំ និងសម្រេចបាននូវសមិទ្ធផលសំខាន់ៗជាច្រើន ដែលបានរួមចំណែកអភិវឌ្ឍសង្គម-សេដ្ឋកិច្ចកម្ពុជាឲ្យមានការរីកចម្រើនជាលំដាប់៕
