សមាគមធនាគារនៅកម្ពុជា ប្រាប់ឱ្យពលរដ្ឋប្រយ័ត្នចំពោះគេហទំព័របោកបញ្ឆោត បន្លំជាគ្រឹះស្ថានធនាគារ

សមាគមធនាគារនៅកម្ពុជា បានក្រើនរំលឹកឱ្យប្រុងប្រយ័ត្នចំពោះគេហទំព័របោកបញ្ឆោតមួយចំនួន ដែលបន្លំជាគ្រឹះស្ថានធនាគារ ផ្តល់ «សេវាកម្ចី អនឡាញ»។នេះបើយោងតាមសេចក្តីជូនដំណឹង ដែលផ្សាយចេញនៅថ្ងៃទី១០ ខែមិថុនា ឆ្នាំ២០២៤។

សមាគមធនាគារនៅកម្ពុជា បានឱ្យដឹងថា ក្រុមការងារប្រឆាំងការឆបោកនៃសមាគម បានកត់សម្គាល់ឃើញថា ថ្មីៗនេះមាន គេហទំព័របោកបញ្ឆោតមួយចំនួន បានបន្លំជាគ្រឹះស្ថានធនាគារ ឬហរិញ្ញវត្ថុស្របច្បាប់ ផ្សព្វផ្សាយពាណិជ្ជកម្ម ក្លែងក្លាយទាក់ទង ទៅនឹង “សេវាកម្ចី អនឡាញ តាមរយៈទំព័រហ្វេសប៊ុក ។

សមាគមធនាគារនៅកម្ពុជា បានពន្យល់ពីការឆបោកថា ជនឆបោកបង្កើតទំព័រហ្វេសប៊ុកក្លែងក្លាយដោយប្រើឈ្មោះធនាគារណាមួយ ចម្លងរាល់មតិការដែលមាននៅលើទំព័រហ្វេសប៊ុកផ្លូវការរបស់គ្រឹះស្ថាននោះ ហើយតភ្ជាប់ទំព័រហ្វេសប៊ុកក្លែងក្លាយ ដែលទើបតែបង្កើតទៅនឹងគេហទំព័ររបស់ពួកគេ (ឧ. http://khmersp.com/) ។

បន្ថែមពីនោះ ជនឆបោក ក៏បានក្លែងបន្លំជាបុគ្គលិក ធនាគារ ដោយចម្លងយករូបថតបុគ្គលិកនោះ ដើម្បីទាក់ទងទៅជនរងគ្រោះក្នុងការផ្តល់សេវាកម្ចី ។ ជនឆបោក នឹងណែនាំទៅ ជនរងគ្រោះឱ្យបញ្ចូលលេខទូរស័ព្ទ និងលេខសម្ងាត់នានា និងបញ្ចុះបញ្ចូលជនរងគ្រោះឱ្យផ្ញើប្រាក់ទៅពួកគេតាមរយៈ ខេអេច ឃ្យូអរ (KHQR) ដើម្បីបង់សេវាផ្ទៀងផ្ទាត់នៅ CBC មុននឹងផ្តល់កម្ចី ឬដើម្បីហេតុផលណាមួយទៀត។

ដើម្បីកត់សម្គាល់ពីករណីឆបោកខាងលើ សមាគមធនាគារនៅកម្ពុជា បានបញ្ជាក់២ចំណុចដើម្បីដឹងថា កំពុងមានការឆបោក៖១. ជាទូទៅទំព័រហ្វេសប៊ុកក្លែងក្លាយ ពុំមានព័ត៌មានធនាគារច្បាស់លាស់ ឬមាននិមិត្តសញ្ញាធនាគារ (Logo) ខុសប្លែក ពីរូបភាពដើមរបស់និមិត្តសញ្ញានោះ។និង២. សំណេរនៅលើទំព័រក្លែងក្លាយ ជាទូទៅ តែងតែខុសវេយ្យាករណ៍ និងមានការផ្សាយពាណិជ្ជកម្មដដែលៗ។

សមាគមធនាគារនៅកម្ពុជា ក៏បានរំលឹកដល់សារធារណៈមេត្តាប្រុងប្រយ័ត្នជានិច្ច កុំផ្ទេរប្រាក់ កុំបង់អ្វីមួយ តាមការស្កេន KHQR ឬផ្តល់ព័ត៌មានផ្ទាល់ខ្លួននានា។ ក្នុងករណីសង្ស័យ សូមទាក់ទងជាបន្ទាន់ទៅគ្រឹះស្ថានរបស់លោកអ្នកដើម្បី បញ្ជាក់អំពីព័ត៌មានបន្ថែម ដូចជាមធ្យោបាយដែលគ្រឹះស្ថានផ្លូវការប្រើក្នុងទំនាក់ទំនងជាមួយអតិថិជនរបស់ខ្លួន ឬស្នើសុំការ ណែនាំផ្សេងទៀត។ ក្នុងករណីនេះដែរ សមាគម ក៏បានបញ្ជាក់ផងដែរថា គ្រឹះស្ថានធនាគារ និងហិរញ្ញវត្ថុផ្លូវការនឹងមិនសុំឱ្យអតិថិជនរបស់ខ្លួនផ្តល់លេខ សម្ងាត់ធនាគារ ឬព័ត៌មានផ្ទាល់ខ្លួនណាមួយឡើយ៕