ការនាំចេញកៅស៊ូរបស់កម្ពុជាកើនឡើងជិត១៣% ក្នុងរយៈពេល៥ខែ ឆ្នាំ២០២៤នេះ គិតជាទឹកប្រាក់ប្រមាណជាង១៦៥លានដុល្លារអាមេរិក។នេះបើតាមរបាយការណ៍របស់អគ្គនាយកដ្ឋានកៅស៊ូ។
![](https://www.oknha.news/wp-content/uploads/2024/06/image-386-1024x683.png)
របាយការណ៍អគ្គនាយកដ្ឋានកៅស៊ូ បានឲ្យដឹងថា ចំណូលពីការនាំចេញជ័រកៅស៊ូរបស់កម្ពុជា គិតត្រឹមខែឧសភា ឆ្នាំ២០២៤ មានចំនួន១៦៤ ៤៩០ ៦០០ដុល្លារ។ ចំណែកឯការនាំចេញឈើកៅស៊ូ មានចំនួន១ ០៤៩ ៥០៩ដុល្លារ។ដោយក្នុងខែឧសភា កម្ពុជាទទួលបានចំណូលជិត ៤០លានដុល្លារ ពីការនាំចេញជ័រកៅស៊ូជាង២៥ពាន់តោន។
បើតាមអគ្គនាយកដ្ឋានកៅស៊ូ គិតត្រឹមខែឧសភា ឆ្នាំ២០២៤ ជ័រកៅស៊ូមានតម្លៃ ១,៤៨៥ដុល្លារ ក្នុង១តោន កើនឡើងចំនួន៦៩ដុល្លារ ក្នុង១តោន ស្មើនឹង៤.៨៩% ធៀបនឹងរយៈពេលដូចគ្នា នៃឆ្នាំមុន។ ចំណែកឯតម្លៃនៃការនាំចេញឈើកៅស៊ូ ជាមធ្យមក្នុងខែឧសភា ឆ្នាំ២០២៤ មានតម្លៃ២៩៤ដុល្លារ ក្នុងមួយម៉ែត្រគីប។
![](https://www.oknha.news/wp-content/uploads/2024/06/20231107_120019-1024x576.jpg)
ពាក់ព័ន្ធនឹងតម្លៃកៅស៊ូនេះ បើម្ចាស់ចំការកៅស៊ូមួយកន្លែង នៅខេត្តត្បូងឃ្មុំ បានឲ្យដឹងថា តម្លៃកៅស៊ូក្នុងខែនេះ គឺនៅដ៏ដែល ពោលមានតម្លៃចន្លោះពី ២,៧០០រៀល ទៅ២,៩០០រៀលក្នុង១គីឡូ ទៅតាមតំបន់ និងគុណភាពនៃជ័រ។
លោកបានបន្តថា ទិន្នផលជ័រកៅស៊ូនៅឆ្នាំនេះ គឺមានការថយចុះ ដោយសារតែអាកាសធាតុក្ដៅ។
សូមជម្រាបជូនថា ផ្ទៃដីកៅស៊ូនៅកម្ពុជាសរុបមានចំនួន ៤០៧ ១៧២ហិកតា ក្នុងនោះ ផ្ទៃដីចៀរជ័រមានចំនួន ៣២០ ១៨៤ហិកតា ស្មើនឹង៧៩% និងផ្ទៃដីថែទាំមានចំនួន ៨៦,៩៨៨ហិកតា ស្មើនឹង២១%៕
![](https://www.oknha.news/wp-content/uploads/2024/06/IMG-20230911-WA0000-1024x576.jpg)