ក្រុមប្រឹក្សាអភិវឌ្ឍន៍កម្ពុជា (CDC) បានបើកកិច្ចប្រជុំពិនិត្យវឌ្ឍនភាពការងាររៀបចំប្រព័ន្ធបច្ចេកវិទ្យា របស់ក្រុមប្រឹក្សាអភិវឌ្ឍន៍កម្ពុជា ដើម្បីជំរុញការងារវិនិយោគ ពិសេសសម្រួលការងារវិនិយោគឱ្យកាន់តែមានប្រសិទ្ធភាព និងកាត់បន្ថយពេលវេលា។ នេះបើយោងតាម កិច្ចប្រជុំនេះ ដែលធ្វើឡើងកាល ថ្ងៃទី២៤ ខែកក្កដា ឆ្នាំ២០២៤ ក្រោមការដឹកនាំដោយ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។
![](https://www.oknha.news/wp-content/uploads/2024/07/image-737-1024x682.png)
លោក ស៊ុន ចាន់ថុល បានឱ្យដឹងថា តាមរយៈកិច្ចប្រជុំនេះ បានពិនិត្យលើវឌ្ឍនភាពការងាររៀបចំប្រព័ន្ធបច្ចេកវិទ្យារបស់ស្ថាប័ន ដែលត្រូវបានអភិវឌ្ឍឡើងសម្រាប់ជំរុញការអនុវត្តនីតិវិធីផ្ដល់សេវាសាធារណៈដោយប្រើប្រាស់ថ្នាលបច្ចេកវិទ្យា ដើម្បីពង្រឹងប្រសិទ្ធភាព តម្លាភាព កាត់បន្ថយពេលវេលា និងបង្កើនភាពងាយស្រួលលើការតាមដានការផ្ដល់សេវាសាធារណៈនានារបស់ក្រុមប្រឹក្សាអភិវឌ្ឍន៍កម្ពុជា។
ជាមួយគ្នានេះ លោកបានបញ្ជាក់ថា៖« កិច្ចខិតខំប្រឹងប្រែងក្នុងការអភិវឌ្ឍប្រព័ន្ធបច្ចេកវិទ្យាបម្រើដល់ការងារទាក់ទាញវិនិយោគិនមកកម្ពុជានេះ គឺអនុវត្តស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្នុងនីតិកាលទី៧ នៃរដ្ឋសភា ដែលបានកំណត់យកបច្ចេកវិទ្យាឌីជីថល ជាអាទិភាពគន្លឹះទី៥ សំដៅលើការកសាងសេដ្ឋកិច្ច និងសង្គមឌីជីថលនៅកម្ពុជា និងជំរុញកំណើនសេដ្ឋកិច្ចជាតិ សំដៅសម្រេចឱ្យបាននូវទិសដៅប្រែក្លាយកម្ពុជា ជាប្រទេសដែលមានចំណូលខ្ពស់នៅឆ្នាំ២០៥០»។
សូមជម្រាបជូនដែរថា បើគិតចាប់ពីខែមករា រហូតដល់ខែមិថុនា ឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មី, គម្រោងពង្រីកផលិតកម្ម, និងគម្រោងវិនិយោគបង្កើតតំបន់សេដ្ឋកិច្ចពិសេសសរុបចំនួន ១៩០គម្រោង ដែលមានទុនវិនិយោគសរុបប្រមាណ ៣,២ពាន់លានដុល្លារអាមេរិក ដែលអាចបង្កើតការងារបានចំនួន ១៦៨.៥៧២កន្លែងជូនប្រជាពលរដ្ឋកម្ពុជា។
CDC បានបន្តថា បើធៀបនឹងរយៈពេលដូចគ្នានៅឆ្នាំ២០២៣ ការអនុម័តគម្រោងវិនិយោគមានការកើនឡើងចំនួន ៧៧គម្រោង ខណៈទុនវិនិយោគមានការកើនឡើងគួរឱ្យកត់សម្គាល់ដល់ទៅប្រមាណជាង ២ពាន់លានដុល្លារអាម៉េរិក៕ អត្ថបទ៖ រង្សី
![](https://www.oknha.news/wp-content/uploads/2024/07/image-738-1024x682.png)