ភ្នំពេញ៖ សមាគមស្វាយចន្ទីកម្ពុជា សមាគមត្រចៀកកាំខ្មែរនិងសមាគមសម្ព័ន្ធដំឡូងមីកម្ពុជា-ចិន និងរដ្ឋបាលគយចិន នៅថ្ងៃទី ២៦ ខែកញ្ញា ឆ្នាំ ២០២៤ បានចុះអនុស្សរណៈយោគយល់គ្នាជំរុញវិស័យស្វាយចន្ទី សំបុកត្រចៀកកាំ និងដំឡូងមី នៅទីក្រុងណាននីង ខេត្តគ័ងស៊ី ប្រទេសចិន។ តាមរយៈMOUនេះ ស្វាយចន្ទី សំបុកត្រចៀកកាំនិងដំឡូងមី នឹងអាចនាំចេញដោយផ្ទាល់ទៅកាន់ប្រទេសចិន។
លោក ស៊ុយ កុកធាន ប្រធានសមាគមត្រចៀកកាំខ្មែរ បានឱ្យដឹងថា អនុស្សរណៈយោគយល់គ្នានេះ ផ្តោតទៅលើកិច្ចសហប្រតិបត្តិការ និងជំរុញការនាំចេញឱ្យបានឆាប់ និងដោយផ្ទាល់លើវិស័យស្វាយចន្ទី សំបុកត្រចៀកកាំ និងដំឡូងមី។
លោកប្រធានសមាគមត្រចៀកកាំខ្មែរ ធ្លាប់បានលើកឡើងថា តាមរយៈកិច្ចព្រមព្រៀងនេះ សំបុកត្រចៀកកាំនឹងអាចមានការឡើងថ្លៃមិនខាន ដោយសារតែយើងអាចនាំចេញទៅប្រទេសចិនបានដោយផ្ទាល់មិនឆ្លងកាត់ប្រទេសទី៣។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានមានប្រសាសន៍ថា ការចុះអនុស្សរណៈនេះក្នុងគោលដៅសម្រួលការនាំចូលផលិតផលកសិកម្មមួយចំនួនចូលក្នុងខេត្តគ័ងស៊ីដោយមិនចាំបាច់ឆ្លងកាត់ប្រទេសទី៣៕
