ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បានលើកឡើងថា នំអន្សម មានកំណើតតាំងពីបុរាណកាលមក ក្នុងប្រវត្តិនំប្រពៃណីខ្មែរ ខណៈសម្តេចធិបតី ក៏បានបង្ហាញពីសកម្មភាពនៃធ្វើនំអន្សមនា រដូវកាលបុណ្យភ្ជុំបិណ្ឌ ប្រពៃណីជាតិខ្មែរផងដែរ។
សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅថ្ងៃទី៣០ ខែកញ្ញា ឆ្នាំ២០២៤ បានលើកឡើងបង្ហោះពីអត្ថន័យនិងសារៈសំខាន់នៃការវេចនំអន្សមខ្មែរថា នំអន្សម មានកំណើតតាំងពីបុរាណកាលមក ក្នុងប្រវត្តិនំប្រពៃណីខ្មែរ។ ប្រជាជនខ្មែរ តែងតែជួបជុំគ្នា វេចនំអន្សមនារដូវ បុណ្យភ្ជុំបិណ្ឌ ចឹងហើយទើបហៅថា «ភ្ជុំបិណ្ឌវេចនំអន្សមជុំញាតិមិត្ត» ។
ទន្ទឹមគ្នានេះ សម្តេចធិបតី បានឱ្យដឹងទៀតថា របៀបធ្វើ យើងប្រើ ស្លឹកចេក ឬស្លឹកផ្អាវ ហើយហាលថ្ងៃឲ្យទន់ល្អចំពោះស្លឹកចេក។ បន្ទាប់មកត្រូវយកស្លឹកចេកមកជូតឱ្យស្អាត និងត្រូវត្រៀមខ្សែ សម្រាប់ចង ។ លាងអង្ករដំណើបទុកឱ្យស្ងួត ហើយត្រូវលាងសណ្ដែកលឿងទុកឱ្យស្រស់ទឹក។ លាស្លឹកចេកទ្រាប់លើគ្នាឲ្យក្រាស់ ល្មម ហើយត្រូវដាក់អង្កររាយលើស្លឹកចេក ។ រោយសណ្ដែកលឿងពីលើរួចដាក់ សាច់ជ្រូកហើយបត់ចុងនៃស្លឹកទាំងពីរចូលគ្នា។
ត្រូវចងឱ្យណែនល្អ ទើបនៅពេលស្ងោរ ទឹកមិនចូលក្នុងនំ ដែលអាចធ្វើឱ្យអង្កររលាយចេញ។ ការស្ងោរត្រូវចំណាយពេលប្រមាណពី៥ ទៅ៦ម៉ោង ទម្រាំតែឆ្អិនល្អ។ យើងត្រូវនៅចាំមើលតជាប់ជានិច្ច ។នេះបើតាមការបញ្ជាក់បន្ថែមពីសម្តេច។
សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏បានស្នើឱ្យចូលរួមថែរក្សា វប្បធម៍ ប្រពៃណី និងទំនៀមទំលាប់ពីសកម្មភាពវេចនំអន្សមដែលបន្សល់ទុកពីដូនតាយើងផងដែរ៕
