ពន្លកថ្មីពិតជាមិនធម្មតា! ចូលវិស័យសិល្បៈមិនទាន់បានប៉ុន្មានផង កូនស្រីលោក ខាន់ ជេមស៌ ធ្វើឱ្យមហាជនផ្ទុះការគាំទ្រដូចទឹកបាក់ទំនប់

កញ្ញា អេមមី តារាចម្រៀងប្រចាំនៅក្នុងផលិតកម្ម ហ្គាឡាក់ស៊ីណាវ៉ាត្រា ដែលជាកូនស្រីបង្កើតរបស់តារាចម្រៀងលោក ខាន់ ជេមស៌ កំពុងធ្វើឱ្យមហាជនផ្ទុះការចាប់អារម្មណ៍ខ្លាំង បន្ទាប់ពីបានចេញបទចម្រៀងថ្មីៗ និងមានអ្នកចូលទស្សនាដល់ទៅរាប់លាននាក់។ ជាក់ស្តែងថ្មីៗនេះ មានអ្នកយកបទចម្រៀងរបស់កញ្ញា ទៅលេង TikTok និងមានអ្នកឱ្យបេះដូងដល់ទៅ ១ លាននាក់ និងអ្នកទស្សនាជាង ១២,៣ លាននាក់ ។

បន្ទាប់ពីមានការគាំទ្រយ៉ាងច្រើនបែបនេះ លោក ខាន់ ជេមស៌ បានបង្ហាញអារម្មណ៍រំភើប សប្បាយរីករាយ និងមានមោទនភាពលើកូនស្រីយ៉ាងខ្លាំង។ នៅលើបណ្ដាញសង្គមផ្ទាល់ខ្លួននាពេលថ្មីៗនេះ លោក ខាន់ ជេមស៌ បានលើកឡើងថា « Wow ពិតជាអស្ចារ្យមែន.!! បទរបស់កូនស្រី អេមមី « កុំចង់ត្រូវគ្នា » ដែលប្អូនស្រី Mei Mei យកទៅលេងមានអ្នកអោយបេះដូងរហូតទៅដល់ ១លាននាក់ និងអ្នកទស្សនាជាង 12.3 លាននាក់ » ។

សូមជម្រាបជូនថា នៅពីក្រោយភាពជោគជ័យរបស់កញ្ញា អេមមី គឺតែងតែមានវត្ដមានលោក ខាន់ ជេមស៌ នៅចាំជួយទំនុកបម្រុក បង្ហាត់បង្រៀន ទាំងយប់ ទាំងថ្ងៃ ដុសខាត់សមត្ថភាពកូនស្រីជានិច្ច។ កញ្ញា អេមមី គឺជាតារាចម្រៀងពន្លកថ្មីដ៏មានទេពកោសល្យ ត្រឹមតែរយៈពេលខ្លីនាងអាចធ្វើឱ្យអ្នកគាំទ្រជាច្រើនស្រឡាញ់ពេញចិត្ត ថ្មីៗនេះក៏បានចេញបទចម្រៀងថ្មីៗជាច្រើនទៅតាមការសំណូមពររបស់អ្នកគាំទ្រ ។ កញ្ញា អេមមី សន្យាថា នាងនឹងខិតខំប្រឹងប្រែងផលិតបទចម្រៀងថ្មីៗជាច្រើន ដើម្បីជាកាដូដល់អ្នកគាំទ្រ ៕